1 «ካዎ ናዳ ሎኢዛሬ!

ኔ ቶሆቲ ኔኒ

ናጻላ ጫማ ኣ ዲሺን

ቤኢዛ ዎዴ ኣይ ማላ ሎኢዞ!

ኔ ሼቻቲ

ሂላንቻ ዎጋጬይ ቆጺዲ

ሎኤ ኣሌቂሲዳ

ኢንቁ ሚሳቴስ።

2 ኔ ጉልኣይ ዎይኔ ኡሺ ኩሚዳ

ቢሪሌ ሚሳቴስ፤

ኔ ጼሳይ

ሎኦ ጪሻን ቃሼቲዳ

ጊስቴ ሚርቄ ሚሳቴስ።

3 ኔ ንቲ ሜንቴ ዬሌቲዳ

ዉሻ ላቃ ሚሳቴቴስ።

4 ኔ ቆይ ዳንጋርሳ

ዛሌን ኣሌቄቲዳ

ኣዱሳ ጊምቤ ሚሳቴስ፤

ኔ ኣይፌይ ጊታ ሃሴቦኔ

ካታማ ፔንጌ ማታን ዲዛ

ኤሌ ሃ ሚሳቴስ፤

ኔ ሲይ ዳማስቆ ጼሊሲዲ

ጊምቢዳ ሊባኖሴ

ጊምቤዛ ሚሳቴስ።

5 ኔ ሁኤይ ቃርሜሎሴ

ዙማ ሚሳቴስ፤

ኔ ሁኤ ቢናናይ

ጻጼቲ ኡቲዳ

ጺላታ ሚሳቴስ፤

ኔ ሁኤ ዳይካ

ካዎዛ ዎዚና ኤኪዴስ።

6 ታ ጎዴ!

ኔ ኣይ ማላ ሎኣይ!

ኔ ኣይ ማላ ካይሻይ!

ኔ ሲቆይ ታና

ኣይ ማላ ኡፋይሲዜ!

7 ኔ ጌሳይ ዛምባ ጌሳ ሚሳቴስ፤

ኔ ንይ

ዛምባ ዉርጮ ሚሳቴስ።

8 ታኒ ሃ ዛምባ ቦላ ኬዛና፤

ኬዛዳ ኢዛ ኣይፌታ ማጻና፤

ኔ ንቲ ዎይኔ ኣይፌ ማላ

ዉርጮቲ ኡቲዳ፤

ቃሴ ኔ ፔኖይ

ኣፒሌ ኣይፌ ማላ ሳዌስ።

9 ኔ ሜቴርሻቲ

ኤሳ ኢሊሎ ማላ

ማልኤቴስ» ጊዴስ።

«ሂስቲኮ ሄ ሎኦ ኢሊሎይ

ታ ሲቆዛ ሜቴርሻታ ጊዶራኔ

ኣቻታ ጊዶራ ዱጌ

ዎሎሉ ጊ ጎጎ።

10 ታኒ ታ ሲቆዛሳ፤

ኢዚካ ታና ኣሞቴስ።

11 ታ ሲቆዞ! ሃ ያ፤

ናምኣይ ካታማፔ ኬዚዲ

ኣኔ ጌዴ ጋጻሬ ቦስ፤

ሄን ኦማርስ ኣኔ ኢሲፌ ኣስ።

12 ማላዶ ዎንታራ

ኣኔ ዎይኔ ኣታኪልቴ

ጊዶ ቦስ፤

ዎይኔይ ጪዪዳኮ፥

ኦሮማኔይካ ኣይፊዳኮ

ኣኔ ቤዮስ፤

ሄን ታኒ ታ ሲቆ

ኔስ ቆንጪሳና።

13 ኢንኮ ኣይፌ ሳዎይኔ

ዱማ ዱማ ኣይፌ

ኢሚዛ ኣታኪልቴቲ

ኑ ካሬን ኩሚዳ፤

ታ ሲቆዞ!

ሃ ኣይፌታፔ ቴሪዳይታኔ

ኦራ ማጼቲዳይታ

ኔስ ዎዲስ።