1 ጎዳይ ዎርዶ ጌዳራ ኢጼስ፤

ጊዶ ኣቲን ሱሬ

ጌዳራን ኡፋዬቴስ።

2 ኦቶሮቴ ካዉሻቴ ካሌስ፤

ኣሽኬቴ ጊዲኮ

ኣ ኤራቴ ኤሄስ።

3 ጺሎታ ኢስታ ሱሬቴ ካሌስ፤

ጊዶ ኣቲን ዎርዳንቻታ

ኢስታ ዎርዶቴ ይሴስ።

4 ሃንቆ ጋላስ ዱሬቴ ጎኤና፤

ጊዶ ኣቲን ጺሎቴ

ሃይቆፔ ኣሼስ።

5 ቦሬይ ባይንዳ ኣሳታ

ኢስታ ጺሎቴ

ኢስታስ ኦጌ ሱሪሴስ፤

ጊዶ ኣቲን ኢታቲ ባንታ

ኢታቴን ኩንዴቴስ።

6 ሱሬታ ኢስታ ጺሎቴ ኣሼስ፤

ጊዶ ኣቲን ማልቴቲ

ባንታ ኢታ

ኣሞን ኦይኬታና።

7 ኢታ ኣሲ ሃይቂዛ ዎዴ

ኢዛ ሂዶታይ

ሃዳ ጊዴስ፤

ባ ዎልቃን ኢዚ ጬቄቲዛዚ

ኡባይካ ዬስ።

8 ጺሎይ ሜቶፔ ኣቴስ፤

ጊዶ ኣቲን ሜቶይ

ኢታ ኣሳ ቦላ ጋኬስ።

9 ኢታ ኣሲ ባ ዶናን

ባ ላጌዛ ይሴስ፤

ጊዶ ኣቲን ጺሎቲ ኤራቴን

ኬሲ ኤኪ ኣቴቴስ።

10 ጺሎታስ ኢንጄቲዛ ዎዴ

ካታማይ ኡፋዬቴስ፤

ቃሴ ኢታቲ ይዛ ዎዴ

ሃሹ ጌስ።

11 ሱሬታ ኣንጆ ጋሶን

ካታማይ ዲጬስ፤

ኢታ ሃሳያን ጊዲኮ

ካታማይ ዬስ።

12 ዎዚና ፓጬ ኣሲ

ባ ሾሮዛ ካስ፤

ኣኬካንቻ ኣሲ ጊዲኮ

ባ ዶና ሺሺ ኤኬስ።

13 ዚጊርዛ ኣሲ ጹራ ላሌስ፤

ኣማኔቲዛ ኣሲ ጊዲኮ ጹራ ናጌስ።

14 ካሌ ፓጬን

ካዎቴ ኩንዴስ፤

ዳሮ ዞራንቻቲ ዴኢኮ

ሳሮይ ዴስ።

15 ኤሮንታ ኣሳስ ዋሴቲዛይ

ሜቶን ጌሌስ፤

ዋሴ ጌላናስ ጫቆንታዴ

ኣይኮይካ ቦቼና።

16 ኡሎ ኪያ ማጫሳያ

ቦንቼታዉስ፤

ዎልቃዛ ኣሳቲ

ዱሬቴ ጻላ ዱሬቴቴስ።

17 ኪያ ኣሲ ባና ጎኤስ፤

ሜንጼ ኢታ ኣሲ ጊዲኮ

ባ ቦላ ሜቶ ኤሄስ።

18 ኢታ ኣሲ ዴሚዛ ዎይ ዴና፤

ጺሎቴ ዜሪዛ ኣሲ ጊዲኮ

ሱሬ ዎይቶ ኤካና።

19 ጺሎይ ዴኦ ዴማና፤

ጊዶ ኣቲን ኢታቴ

ካሊዛ ኣሲ ሃይቃና።

20 ጎዳይ ኢታ ቆፋይ

ዴኢዛ ኣሳታ ሻቴቴስ፤

ጊዶ ኣቲን ሱሬ

ሄሜቲዛይታን ኡፋዬቴስ።

21 ኢታ ኣሲ ቃጻዬቶንታ ኣቴና፤

ጊዶ ኣቲን ጺሎቲ

ቃጻዬቴቴና።

22 ኣኬካይ ፓጪዳ

ማጫሳ ፑላቴ

ጉዱን ሲን

ኣዳ ዎርቃ ማላ።

23 ጺሎታ ኣሞስ ዉርሴ ሎኦ ጻላ፤

ጊዶ ኣቲን ኢታታ ኣሞስ

ዉርሴ ሃንቆ ጻላ።

24 ኢሲ ኢሲ ኣሳቲ

ጮ ኪያቴ ኢሜቴስ፤

ጊዶ ኣቲን ኢስታስ ኣቆይ

ሃ ሃ ዳሬስ።

ባጋቲ ኬሂ ኡዜቴቴስ፤

ጊዶ ኣቲን ኢስቲ

ማንቂ ማንቂ ቤቴስ።

25 ኪያ ኣሲ ዱሬታና፤

ሃራታስ ኢሚዛይ

ባስ ዎፓ ዴሜስ።

26 ጌማራ ካ ዳጋሲዛዴ

ዴሬይ ቃንጌስ፤

ኬሲ ባይዚዛዴይ ጊዲኮ

ኣንጄቴስ።

27 ሎኦ ሚሽ ሚን ኮይዛዴ

ሎኦ ሚሺ ናጌስ፤

ጊዶ ኣቲን ኢታ ሚሽ ኮይዛዴ

ኢታ ሚሺ ጋኬስ።

28 ባ ዱሬቴን

ኣማኔቲዛ ኣሲ ኩንዳና፤

ጺሎቲ ጊዲኮ

ሎኦ ሚ ማላ ጪሊላና።

29 ሶ ኣሳ ቦላ ሺሮ ዴንዛ

ኣሲ ጎኣይ ባይንዳ ኣታና፤

ኤያቲካ ኣ ኤራንቻታስ

ኣይሌ ጊዳና።

30 ጺሎ ኣሲ ዴኦ ኣይፌ

ኣይፊዛ ሚ ማላ፤

ሼምፖታ ኣሺዛይ

ኣ ኤራንቻ።

31 ጺሎቲ ሳኣን

ባንታ ኦሶ ዋጋ

ኤኪዛ ጊዲኮ፥

ኢታቲኔ ናጋራንቻቲ

ባንታ ኦሶስ ኤካና ዋጋይ

ዋኒ ዳራንዴሻ!✝