1 Yessuusi Kiristoosike ergemmallo kade'eeke Pheexiroosi;

Na'no alagiinke boga'ni hexxiineke Phanxoosike, Gelaatiyake, Qeephphedooqiyake, Issiyake, Bitaaniyake boga'n xexxeereme alagake kadeexxi hedhaa'neeke Mageni fi'leeke manni'a, 2 Mageni Aabi edise ege'neemmak Yessuus Kiristoosii'i ajajematee munde isixxi insa'ne'n fiffixxende'eekinna Hafuuri darree'ni woyyoommeekeeri'a, badhaadhikinna nage'i ha'no'aa bira sa'owwaal.

3 Lumoxxe isixxe marartenaa'ni kexxeexxa Yessuusi Kiristoosi reyotenaa'n ke'atixxe buuttonni hexxaaxxe adde'a kaddaaxxa haarroxxe ilensha'a oose ifixxe asseeki Gootta no'oke Yessuusi Kiristtoosik Anni Mageni saademmowwaal. 4 Isinna baxxabaaxxa, balleessemabaakanna jijjiiremabaaka qadaada iimate'n ha'no'aa qophpheesse'een. 5 Ha'noonna udumike barro'ni ifisendo'aa qophpheessendeexxi anjira dagaa qico'n amanati darree'ni Mageniinxe hunnanni heqqendine'een. 6 Ta'a ha'no heddo gargar gargar hexxeexxa hega uushsho giddo hexxineexxi heenoxxe yanna'a rakkatino'ole midde tenne'ni lumoshsha gammadinaan. 7 Tinni yaanuwwa ha'no'n gelteechchi giirate'n hega uudendeexxi luqqi hitootollenna, ba'ammaxxe worqe caala lumoshsha ulfate'eexxi ha'nooxxe amanaxxi dhugaaleessumma kokeessendeexxenna Yessuusi Kiristoosi leellaxxe yanna'ni galata, ulfinnakanna saadinoo ha'no'aa afissaashshaten. 8 Yessuusi Kirisitoosii'i uudanna gophphino'ole midde eettinaan; ta'a isoo uudanna gophphino'ole iso'ni amandinaan; haaso'ik tennete hiyyendaaxxanna ulfinni wo'me'eexxe gammashshonni gammadine'een. 9 Ha'nooxxe amanaka muuxama tinninna ha'nooxxe lubboxxa anjira adhdhate'n hexxineen.

10 Ha'no'aa uwwema'neeke badhaadhiinka raaga haasoteexxi wabeeko tennee anjiraxxee siitteexxi xexxe'achchoti qo'nissa'emman. 11 Insa'ne giddo hedhemmak Kiristoosik Hafuuri Kiristoosi jabaxxe rakko adhdhatixxeenna iittanni rakkoti uduma kaddaake ulfinnixxe ediseenni haaso'ati leellishshee wodda iikki haaso'inna hitta muuxemmaaxxa insa'ne qo'nissa'emman. 12 Ta'a iimatenaa'ni ergemeek Woyyichchi Hafuurinni wengeele ha'no'aa lallabeekiri ha'no'n kuleemmaxxa yaane ha'no'ni odeesinne wodda ha'no'ate malee umo ifikee ergatemmebaaxxa insa'ne'ni iffe; erganna midde gattebaang tennee yaanuwwa jaba qicini halchitaamman.

13 Tennexxee ha'nooxxa qalbe qophpheefatte; ifinna hirre; Yessuusi Kiristoosi leella wodda ha'no'aa uwwaake badhaadha'ni wo'ma qicinni ha'nooxxa adde uggudhe. 14 Ha'no ajajajendinaaxe oose kaddinemma qicinni edo ege'na gophati hexxinammaxxa fuggoxxa gaabbe hordofinoqqe'e. 15 Yaane kinni ha'no ye'eek isi woyyichchake kademmashsha ha'nonna galduma ha'nooke duuchchinni woyyoolete kadde.

16 Tinni buutonna «Ani woyyichchaken ha'nonna Magenokee woyyolete kadde» hiyyende borreessende'een.

17 Manjokee gamisebaang mitte mittennige'n huje hujeshshanni muraaka Mageno «Anna no'okee» hitine ye'exxina'neexxe kaddoole, tenne butta'ni keessummamma hexxinee qico'n soda'ati hedhdhe. 18 Ha'noke edike annuwwinaa'n dhaaldineexxe wayi fuldabaaxxe hedhonaa'n wodendineek baxxaaxxe yaane birreti sibilinn yookaan worqeti kaddebaaxxa egendine'een. 19 Yaane kinni ha'no wodendineek shookishabaaxxenna ci'ma affeebaaxxe gedhechchiinxi munde, Kiristoosixxe ulfaateexxe mundenne. 20 Isi ediseexxi ege'nemeek butta duuchcha dadendebaa edi darre kadaa wodda ta'a kinni udumike barro'n ha'nooxxee leelle. 21 Amana ha'nooxxinna adde ha'nooxxi Magenoke'nite kaddaashsha Yessuusii'i reyotenaa'n ke'isseekenna isoo ulfeesseeke isi darree'n Magenoke'n amandinaan.

22 Yoona dhugaatee ajajemati lubbo ha'nooxxi luqqi assendeemmaxxee dayyuwwa ha'nokee qajeelto jaalala ha'no'ni hexxowwaal; mitte godobinni jaba qicinni weli'aanni weli eeyye. 23 Langaxxa ilendine'eek baxxaaxxe sannena'nite kaddebaang hedheekenna ti'ni hiyye hedhaake Magenike hiyyichchi darree'n baxxabaaxxe sannenaa'niten. 24 Yaane kinni woyyichchi maxaafuwwi

«Maala oddo'week duuchchi badda'atishshaten;

ulfinni isiki duuchchinna badda'atike daraarishshaten;

Badda'atinna qoortaan; Daraarikinna harca'aan.

25 Goottink hiyyichchi kinni

duuchchii woddi'a hedhaan»

ha'noo'ni wengeeleti lallabemeeke hiyyichchinna konneten.