1 Iittanni ha'noonna aruwwa aro'o ha'nooke hiremme; mitti mitti Mageniike hiyyichchi'a ajajemabaak hedheexxe kaddoole isike hiyyichchi belonna ifixxe aruwwaxxe hedhonni booji'emme'e higaan. 2 Tinni kaddaachchi luqqitenna manjo ulfeesaaka ha'nooxxe hedhoka galduma uudaa woddan. 3 Ha'nooxxi danchumma umo ga'nati, worqeti seefatatinna ulfateexxa seemma oddo'wati gadho leellitaaxxe seefachchoxxe kaddoqqe'e. 4 Yaane kinni danchumma ha'nooxxi Magenii edo hiri isek yo'oshsha fiixxe'eexxa ba'lummanna siggumma afe'eexxe, haanonna baxxabaaxxe giddixxe hedhoxxe danchumma kaddowwaa. 5 Adde ifixxa Magenoke'n uggudhitemmaxxa edixxi woyyitte melaalle hedho ifixxa danchoosexxeemmak konne orinni aro'o ifikee hirematitemman. 6 Saaranna Abirihaamii'i anke gootta hita'n isi'a ajajenda'eemman; ha'noonna mitteechchonna sodaatinebaang eloxxa assitinoole isexxe oosen.

7 Ha'noonna aro'uwwi, soodachcho ha'nooxxi hoyyendabaashsha ha'nooxxe aruwwanni welti qalbeeffachchot mitteba hedhdhe; insa'nenna gophaaleeyyete kandeemmaxxeenna hedhotika badhaadha ha'nooni welti dhaalaammaxxee insa'ne ulfeesse.

8 Udumitaaxxe'n ha'no duuchchiing, mitte yaadinni hedhdhe; mitti mittiinxa rakko ifixxishsha asseexxi uudowwaal; dayyummatixxe jaalalanni weli eeyye; ba'lakenna o'waloke kadde. 9 Eebisse malee'e fuggoxxa fuggoxxinni yookaan yowwichcho yowwichchiinxe bado'aa hiissitinoqqe'e; ha'no ye'endineechchi tennee assati eebba dhaaldino'aaten.

10 Tennexxee

«Hedho eeyaak

eloxxa barra uudo'a hasaak

Arbo ifika fuggoxxenaa'n

suume ifixxanna shokko haaso'atenaa'n hoyedhowwaal.

11 Fuggoxxenaa'n bayyatowwaal eloxxanna hujowwaal;

nage'a halsowwaal, hordofowwaal.

12 Tinninna Goottiinxi illuwwa qulliyye uudaan:

manshuwwa isixxinna soodachcho insa'neexxa laqqatee banedeexxen;

Goottinki mufetiki albi fuggoxxa assaakeera'niten.»

13 Eloxxa hujatee gaabbitinoole ha'noo miidhaak ayyete? 14 Yaane kinni qullummatixxe rakko ha'no'n gelteele eebbisendineeken; ha'noonna dhaadachcho insa'nexx'e mee sodaatte, weekendinoqqe'e. 15 Kiristoosii'i Goottake assexxineexxi ha'nooxxe qalbe'ni isoo woyyoonse. Ha'no affine'eexxe addexxee'e ha'noo'ni buutto hasee qoraake duuchchi'a hiissichcho uwwa dandeetinaashsha duuchchii wodda qixxeffatineeke kadde. Yaane kinni tennee duuchcha shaqqummatinna ulfinnik assee. 16 Kiristoosike kadati affineeka eloka adaba fuggiseexxi haaso'aakiir, ifixxe hamenni shookaashsha luqqitte sammo horate. 17 Mageniinxi fedhi iittate kaddeechchinni fuggoxxa assitineexxi rakko adhdhati mannii'n eloxxa assineexxi rakko adhdha woyyan.

18 Kiristoosinna isi umo ifikinni no'oo Mageniibaa shiqisho'aa isi qullichchake kadeeni hedheexxi no'o qullumma anfebe'nokee no'oxxe cubboxxe buuto'a langaxxa kaddabaaxxa mittele rakko adhdhati reyeedheen. Isi maalki reyeedheen Hafuurki kinni hedhotike kade. 19 Kirisitoosinna ookkone hafuurinninni usurriinke mine'n hexxeemmaxxe reyemake mannixxe lubbuwwabaa mareexxi eettene eloxxe odoka hiyyichcho insa'ne'ni lallabe. 20 Iitti usurriinke mine'n hexxeemmaxxi reyemake mannixxi lubbuwwa, edo wodda Nohike baro'n markabi hujemaamma wodda Mageni insa'nee ossunteti heqqa'emmake ajajema gibe'eemmakeerixxemman. Wode'ekenaa'ni anjiremeemmak heenok manni kinninna saddeeta manna callamman. 21 Kunni wodi'inna ta'a xammaqatike fakkeenna kadeexxi ha'noo anjira'neen; kunninna bisiinka xure ca'a assatike kadebaaki luqqitte sammonni Mageni edo shiqqaaxxe kadhan; kunni wodi'inna ha'noonna anjira'neeki Yessuusi Kiristoosi reyote'aa'ni ke'ati darree'niten. 22 Isinna iimi'a me'eexxi Mageniinke midda'ni hedheen; erganna, baalloomuwwikinna hunnuwwa isi'a hirende'een.