1 Yoona Kiristoosi ifike maalinni rakko adhdheemmaxxee ha'noonna konne yaadinninni ka'litine ke'we; tinni kaddaachchinna maala ifikenni rakko adhdhaak manji cubbo hujaa waaleke kadeemmaxxeeten. 2 Tennenaa'n kexxeexxa isi'a gattaaxxe tenne butta'ni hedhaaxxe hedhonni Mageniinxe fedhiishsha hedhaa malee'e maaliinxe gaabbeshsha hedhaba'a. 3 Mageno ege'nebaak manni eeyyeexxa assammashsha qii'misati, maalnxe gaabenni, machcho'ati, sirbiki, sacco sa'isse ha'wati diqachchiisaxxa magenoonfachchotixxa fakkuwwa magenoonfachchoti sa'issitinemakk barruwwi geyaan. 4 Tennee fakkaattaaxxa fuggoxxa hujati sacco sa'atixxe hedhonni insa'nenni mittooma gopha ha'nooxxi insa'ne'n keessummate kaddee'naa mambe'a hiyyati ha'noo yowwinaan. 5 Yaane kinni insa'ne ookkone hedhoti hedheekeera'ninna reyeekeera'n muro'a isoo ookkone qophpheeffateeke hiissichcho uunaan. 6 Wengeele reyeekir midde gatebaang lallabendeechchi tenne buutonniten; tennexxee hoone manjishshanni maalki insa'ne'ni murte uwwendaan; hafuurik kinni Magniinxe fedhishsha he'naan.

7 Yaane duuchchik muuxami shiqeedheen; tenneexxee soodata dandeetinaashsha ca'itte sammo horatte; ifinna hirre. 8 Jaalala heddo cubbo buqqammaxxee duuchchiinxi iimi darre weli'anni weli eeyye. 9 Weli'anni weli maamuqa belo keessummumma adhdhe. 10 Mageniinka gargar gargar hedheeka badhaadha xuurammeesummati ergatemammake manjiinsha mitti mitting manji adhdheeke badhaadhixxe uwwanni wele manji'a ergatemowwaal. 11 Ha'no giddii'n ayyinna haaso'ak hedhoole Mageniike hiyyichchishsha haaso'owwaal; ergatemaak hedheexxe kaddoole Mageni uwwaake udduudinni ergatemowwaal; tinninna Mageni Yessuusi Kiristoosi darree'n ulfato'aten; ulfinnikinna hunna isi'a duuchchi woddinaa'n duuchchii woddi'a kaddowwaal. Hameen.

12 Jaaluwwaa! Ha'noo giiratishsha hega uuddaaxxa rakko adhdhitinaa wodda keessumma yaane ha'no'n kade'eeshsha mambe'a hitinoqqe'e. 13 Yaane kinni ulfinni isiki leellaxxa yanna gammashsho ha'nooxxi lumoxxe kaddaashsha Kiristoosixxa rakko qoodendinaake kada ha'nooxxe'ni gammadde. 14 Kiristoosike summixxee buuto'a yowwendinoole ulfinniinke Hafuura kade'eek Mageniink Hafuuri ha'noo'ni hedhaammaxxee'e ha'noo eebbisendineeken. 15 Ha'no giddii'ni ayyinna rakko adhdhaak hedheexxe kaddoole manjo anga sa'eeke yookaan moodhalcho yookaan fuggoxxa asseeke balleesanjo yookaan manjiinxe yaane giddo sa'eeke kadati rakko adhdhoqqe'e. 16 Kiristoositote kadati rakko iso'ni geltoole kinni konne summixxee Mageno galateefato malee'e shookkoqqe'e.

17 Murte Mageniinke mininaa'n saffaaxxi yanna gelte'een; murte no'onaa'n saffa'neexxe kaddooleta Mageniinxe wengeele'a ajajema'nebaakeeriki muuxamitaa maachcho kadaa? 18 Yoona «Qullichchi anjirema'neek abaratite kaddoole xaqartichchikinna cubbichchi hitta kadotaate?» 19 Tennexxee Mageniinxe fedhiishsha rakko adhaak duuchchi eloxxa huja'ni lubbo ifixxa ookkone xuurammeesi dadallo'ni maganne uwwedhowwaali.