1 Yoona fuggo duuchcha shokko duuchcha ifi uggudha duuchcha gaabbetanna hamata duuchcha fuggusse. 2 Anjirensha ha'nooxenni nophphitinaashsha reefi ilendeexxe annooleshsha ca'itte Hafuuriinxa ado halche. 3 Halchiyyo hasisaakinna Gootti eloke kadeexxa egendine'eexxe kaddo'oleten.

4 Manjoke'ni tuffaatemeeke Magenoke'n filemeekenna ulfaateeke konne hedhaake kinjibaa kinn shiqqina'ni, 5 Gootta Yessuusi Kiristoosi darree'ni Mageno gammachchiisaaka Hafuuriinka tolcha shiqishinoo'a, woyyoole qeese kaddino'aa hexxaaxxe kinoshsha Hafuuriinke mine kadatee ijaarendinaan. 6 Yaane kinni woyyichcha maxaafuwwa'ni,

«Kunnise filemeekanna ulfaateeka dhaaddoti kinjo

Tsiiyooni'n uggannon;

Iso'ni amanaaki haranga salphatabaa» hiyyende borreessende'een.

7 Yoona ha'noo amandinaakee kunni kinji ulfaate'eken; amanabaakeeri'a kinni

«Iikki miniik ijaaralluwwi tuffatemmak kinji

isi shoole kasike dhaaddoti kinjo kade.»

8 Iitanni «Manna guggufachchiisaak,

Insa'nee ibissaxxe rassa kade» hiyyaan.

Insa'ne hiyyichcho ookkone amana gonpheemmaxxee guggufantaan. Insa'ne tenne assatee edonni Mageni muree qiconi.

9 Ha'noo kinni dukkanatenaa'n konne mambe'iinke isike ifibaa ye'eeke Mageniinxa lumoxxa huje lallabino'aa filendineexxe ilaa, moyanjiinxe qeese, woyyichcha ardaa, Mageni umo ifike gargar ha'no foyeeke ardan. 10 Ha'no edo isike ardammabaan; ta'a kinni Mageniinke ardani; ha'no edo mararte alfitineemmabaan, ta'a kinni mararte alfitine'een.

11 Jaaluwwaa, tenne butta'ni keessumatenna alaga kaddineemmashshanni lubbo aataaxxe maaliinxe gaabbenaa'n bayyatinaashsha ha'no kadhata'ennen. 12 Fedhee qiconna ha'no fuggoxxa assitina'neeshsha assine ha'noo Ayihudak kadebak manni hamatoole isi murte uwwo'a dagaa wodda eloxxa ha'nooxxa huje uundeexxi Mageno galateefataashsha Mageno ege'nebaake manni giddo eloxxe hedhonni hedhdhe.

13 Goottakee hitineexxi buttatike baalloomiinke manni'a ajajemme; baalloomiinke umo kandemmaxxee moyanjokeenna kaddoole ajajemme. 14 Yookaan fuggoxxa assaakaara mura woxisatee eloxxa assaakaara galateefatatee isi baalloonseeke manni'a ajajemme. 15 Tinni kaddaachchi eloxxa assattixxa ege'naa afebaake mannika wayi fulabaaka haaso'a sammi assitino'a fedhii Mageniinxen. 16 Mageniinke erganjuwwishsha kaddineexxi leexummati hedhdhe malee'e leexumma ha'nooxxa fuggoxxa buqatixxe assitnoqqe'e. 17 Manji duuchchi'a hasisaaka ulfinna uwwe; ammaanye dayyuwwa eeyye; Mageno sodaate; moynajokanna ulfeesse.

18 Ha'no erganjuwwi elokenna ba'lake ha'nooke goottuwwi'a callaate kaddebaang fuggichchiwwakeenna wo'ma ulfinnini ajajemme. 19 Mageniinxe hiyyeexxi hasisabaaxxa rakko adhdhaak manji galata alfaan. 20 Fuggoxxa assitineexxi mura woxxine ossitnoole maa galata affina? Yaane kinni eloxxa assitineexxi jabaxxa rakko adhdhitineexxi ossitinoole tennenni Magenokenaa'n galata alfitinaan. 21 Ha'noo ye'endinneechchinna tennexxeeten; tinni kaddaachchinna Kiristoosi ha'nooxxee rakko adhdheechchi ha'no isixxa faana hordofino'aa faakkeenna ha'no'aa waalo'aaten.

22 «Isi cubbo hujebaan; afo'o isikee'ninna shokko afendebaan» 23 Isoo yowwinee wodda hiisse yowwebaan; jabaxxi rakko iso'ni geltaa wodda afo'o fulchedhebaan: yaane kinni qullummati muraake Mageni'a ifi sa'isse uwwe. 24 Cubbotee rennennexxi qullummatee ha'nannoshsha isi umo ifikenni cubbo no'oxxa ifike maalinni fannote'ni ba'edhe; isixxe madanni ha'no fayyitine'en. 25 Ha'no edo ba'eeke gedhebishsha jeeki hitinaamman; ta'a kinni ha'noxxe lubboke allalisanjibaanna heqqanjibaa higgine'een.