1 Phawuloosinaa’n Sillaasinaa’ninna Ximotoosinaa’n Mageno annikenna Gootta Yessuusi Kiristoosike Kaddeexxe Teseloonqe giddo hexxeexxe Mageniinxe tuuta’a Mageno anna no’okik Gootta Yessuusi Kiristoosik Badhadhinna na’ge’i ha’no’aa kadowwaal.

2 Soodachcho no’oxxe’n ha’noo qalli hina’ni duuchchi wodda ha’noo duuchchiingee Mageno galateenfanta’ennen. 3 Amanatenaa’n kaddeexxa ha’nooxxa huje, jaalalatenaa’n fiildaaxxa ha’nooxxe elo Gootta no’oke Yessuusi Kiristoosi’n afineexxe adde’naa’n dageeka ha’noka jabeena Mageni no’oki edonna anni no’oki edo duuchchi wodda qalli hinannon. 4 Magenoke’n eeyyendineeke dayyuwwa isi ha’no’o fi’leexxa ege’neennen. 5 Tinninna kaddeechchi wengeele no’oxxi ha’noba gelteek hunnati Woyyichchi Hafuurninna lumoxxe qalbeeffachchonnite malee haaso’i callinntebaan. Iittanni ha’no’a hinennexxi ha’noxxe oddo’n hitta he’nennaxxa egendine’een. 6 Ha’no no’onna Gootta labbine’een; Fedhe qicinn jabaxxi rakko ha’no’ni gelteexxe kaddolenna hiyyichcho ookkone woyyichchi Hafuurixxe gammashshonni adhdhitine’een. 7 Tennenaa’ni kexxeexxa Meqedooniya giddonna Akkaayiyaa giddo afendaaxxe amaanye’a eloke fakkeenna kadine’een. 8 Goottiink hiyyichchi ha’nonaa’n fuleexxi Meqedooniya giddonna Akkaayiyaa giddo laqema calla kaddeebaak Magenoke’ni ha’no affineexxa amana duuchchi booncho’n ege’nende’een. Tennexxe no’o tenne yaane’n mitteelchonna haasoa’a hassissabaan. 9 Hitta hexxexxe keessunsanni no’o adhitineexxanna hedhaakanna dhugaatika Mageno ergatemaaatee dharcha magenuwanaa’n hitta Magnibaa ille iima higgineexxa insa’ne umo insa’nenginni haasona’neen; 10 Iittanni Mageni reyortnaa’ni ke’isseeka, iimi’n dagaak isik belti daggaaxxe mufenaa’n no’o anjiraaka, Yessuusi hitta heqqexxina’neexxa insa’ne haasonna’een.