1 Ani ha'no'o yaadisabe'noshsha hediyooti langaxxa ha'noba'a dagabe'noshsha mudheenan. 2 Yoonna, ani ha'no'o yaadiseneexxe kaddole yaadisenenge ha'note malle'e weli mann ane'e gammachisaaki ayyeete? 3 Ani ha'no'a itta borreeseneelchi ha'noba'a dagano wodda ane'e gammachchisa hassissaak manni ane'e yaadisabaasha hiyyeteni. Anxi gammasho kinni ha'no duuchchingixxe gammasho kadeexxa amana'enne. 4 Lumoxxe yaadoni, qalbeti wixixiyat indido dunaa'ni ha'no'a borreeseneelchchi lumoqico ha'no eeyaannexxa egendinaashsha hiyyeete malle'e ha'no'o yaadisona'a hiyyetebaan.

5 Ayyinna manji yaadisoole ani yaane eebisahatee kadebaag iikk manji yadisseke ane calla kadebe'nog heenoqicinte kaddoolenna ha'no duuchingen. 6 Itta hedhheeke manji'a, ha'no giddi'ni heddi mann uwweek mura woxxa gelte'een. 7 Kaddolenna, isi lumo qico yaadiyotenaa'ni kexxeexxa haranga godoba kultabaasha ta'a langaaxxa higineexxi gattowaali hiyyiyoti dayeesiyyo hasisaani. 8 Iittanni iso'o eetina'neexxa kokkesitino'a ha'no kadhata'enen. 9 Eetenne erga ha'no'a borreeseneelchi duuchchinxenni ajajendina'nexxa ha'no'o hega uudona'a hiyyeten. 10 Ha'no gattowaali hitinaake manjichi'a aninna gattowaali hiyyanoni. Isi'a gattowaali hiyyendaaxxi balleesa hexxexxe kaddole ani Kiristoosi edo isi'a gattowaali hiyyanelchchi ha'noxxeten. 11 Tenne asaanelchi Seexanxa shokko egenenaxxe'e Seexanni bakka alfabaashsha hiyyeeten.

12 Kiristoosixxa wengeele lalabona'a Xiro'aadaka qachcha geyyene wodda Gootti ba'laxxa ergatenshatixxa hula ani'a banneeman. 13 Yaane kinni dayyo anka Titoo'o afa gophenaxxe'e qoxxiyene. Ani ookko hexxexxa addatameeyye, «Nage'ik hedhdhe» hiyyeneexxi Meqedooniyake bogibaa me'eneeni.

14 Kaddolenna, no'o duuchchi wodda Kiristoosinni injifantanoke asseexxi no'o'o akeeka'nekenna eloka foole afeexxe shittoshsha Kirsitoosixxe anfeenexxa ege'na bonchcho duuchcha'ni geesinsanooshsha asa'neeke Magen'a galati gewowaali! 15 No'o anjiremakenna kado'o, ba'aakeri'a Magenoke Kiristoosixxe fishen. 16 Ba'aake mann'a, no'o shiyyaake foole kandeeneeni; fayyaake manni'a kinni hedhdho uwwake hedhdhotike foole kandeeneni. Yoona tenne ergatenshsha'a geyyaki ayyete? 17 No'oqa Magenka hiyyichcho dadalinke miyishsha asinaa'ni dadalamake heddi mannishatebaani; luqqitte qalbenni no'o Magenbaa'ni ergemeeneke Kirsitoosixxe erganjuwwa kandeneexxi Magen edo dhugaati haasonan.