1 Yoona anke jaaluwwa! Konne addachchisatika hiyyichcho anfe'enaxxe maalakanna irra no'oka battoositaxxe fedhexxe yaanenaa'n umo no'oka ifi luqqasino! Mageno sodaatati woyyumma no'oxxa womate kaddaashsha assino.

2 Godoba no'o'a ba'late! Ayyeenna balleesinebo'noni; ayyeenna miinebo'noni; ayyeena'ninna saamebo'non. 3 Aninna tenne ha'no'ni hiyyanelchi; ha'no'ni murrite murona'atebaani. Konnechchi edo ha'no'ni kullenshanni; ha'no qalbe no'oxxi giddo hexxinen; hedhotinna kaddo'o, rewotinna kaddo'o duuchchi wodda ha'noni welti he'nannoni. 4 Ani ha'no lummoqico addatanon; ha'noxxe'e lummoshsha ifi saadanen; ittani yo'oshsha dayyefatene; rakko no'oxxe duuchcha'ni gammasho anxinna bira saxxexxeni.

5 Meqedooniya gennenne wodda heddo tooranaa'ni rakko no'o'ni geltemaxxe'e; hafuura adhinebo'noni; gadhi'ni naaphunte, no'oni giddonna soda'ate hexxemani. 6 Yaane kinni yadeeka dayyesak Magen Titoxxe daga'n no'o dayyeese. 7 No'o dayyesemenlchinna isixxe daga'nite calla kaddebangi; ha'no iso'o dayyesitinxa laqiyoti weltiteeni. Ha'no ani'a afineexxa quqquxensha yaadonna rakko; ittani no'o'a hitta garigaryote'e qixxefatinnexxa kulle wodda; saxxeexxa gammadeneeni.

8 Fedheqiconna konnechchi edi darre ha'no'a borreesseneexxi erga ha'no'o yaadisexxenna kaddole ani borreeseneexxe hansha hiyyabe'no. Hansha hiyyenexxe kaddolenna midde erga anxi ha'no yaadiseek heenoxxe yanna calli'ate kaddeexxa ege'neenen. 9 Ta'a kinni gammadenneni; gammadeennelchinna ha'no yaadisennexxete kadebaangi; yaado ha'noxxixxe buutonni aadde agineexxi jijjirendinnexxeteni. Yaado ha'noxxi Magenke ajajishshate kademaxxe'e; no'o ha'no'o mittelchonna balleesinebo'noni hiyyiyyoteni. 10 Magenxe fedhiisha kaddaaxxi yaado hansha affebaaxxa, anjirnshatiba gesisaaxxa aadde agiyyote'e geesisan. Tenne buttaxxi yaado kinni rewote iyyedagaani. 11 Yoona, Magenxe fedhiin kaddeexxi tinni ha'noxxi yaado hitta si'a, hitatadheeka faachefachotka hiisichcho, hitta hexxeexxa mufe, hitta hexxeexxa soda'a, hitta hexxeexxa halcha, hitta hinaafe hita hexxeexxa fuggoxxe mura woxxisa ha'noxxe oddo'n kaddaashsha assiteexxe ege'ne. Duuchin darre tenne yaane'e balleesabelsabelo kadineexxa kokeesitine'en. 12 Ani iitta ha'no'a borreesenlchi; no'o'a afine'eki jabeeni Magen edo ha'no'ni farri hiyye leelaashsha hiyyete malee'e; miicekixenna miicemebaakixxe hiyyetebaan. 13 Dayyefacho no'oxxi irra Titoke gammado'ni no'onna yo'osha gammandeenen. Gammandenlchinna ha'no duuchching Titoo'o dayyesitinmaxxenna irra isika ti'ni assitinemaxxeten. 14 Ani ha'no'ni afenexxa ifi saada Tito'n kullenneni. Ha'nonna ane'e shokishinebaani; duuchchi wodda dhugaate ha'no'ni kulleeneni; iittanni ha'noxxe'e ifisada'n Tito'n kulleneexxi yaane dhugaate kaddeexxa kokeesende'een. 15 Ha'no duuchchingi ajajendinaa'n, soda'atinna roqonsaati Tito'o adhdhitinqico kassi hiyyano wodda ha'no'a afee'exxi eeyunte lummoqico bira saxxe'eexxe kade'eni. 16 Aninna duuchchini gami'ni ha'no'ni adde assedhati yo'osha gammadeenen.