1 Yoonna ani ha'noba'a daga'naani tinni sakkaaxxeni; duuchhcinxi yaane kokeesendak lame yookaani sase dhugaaniten. 2 Langaxxa ha'noba dagen wodda xexxe'achchisati ha'noo'ni haaso'enan; ta'anna kinni bayya hedhenexxi konnechchini edi darre cubbo hujemakeari'a, welekanna xexxe'achisati haaso'anen; ta'a ha'noba'a illema hige dagano wodda; ayyi'ana mararabo'noni. 3 Konne toorini ani gami'ni haaso'aaneki Kiristoosite kadeexxa egendinaani; ha'nooba leeliteexxi Kirstoosixxe hunna malee'e; gonphe isixxebaani. 4 Isi fannote'ni fannsemeexxi reyechchi gonphaalsinsha kaddolna; ta'a Magenxe hunnaani hedhoti hedha'neeni; no'onna isinni welti ifi gonpheeneke kandeeneeni; no'onna ha'noni welti anfeeneke mittomini kinni isinni welti Magenxe hunnani he'naanoni.

5 Amanati hexxinnexxa kokeesate'e umo ha'noka qorqodhdhe; ifi hega uude; Yessuusi Kiristoosi ha'no giddo hedheexxa egendinebaata? Iitta kada gophphool hega uushote'ni iibinee hiyyoten. 6 No'o hega uudemate'ni inbebe'noxxa ha'no egendinaaxxa adde asse'nanon. 7 Ha'no hara elobaaxxa yaane assitinabaasha Magenba'a soodantanoni; soodantaanelchi fedhdheqico no'o wo'make kada gonpholenenna midde ha'no duuchchi wodda eloxxa yaane assitinaashate malee'e; wo'ma kandeenaxxa leelshatetebaan. 8 No'o dhugaate'e hunjan malee'e dhugaate kadebaaxxa fedheexxa yaane hunjabo'noni. 9 No'o ifi gonpheneke kandano wodda; ha'no kinni jabaatineeke kadinna wodda; gammandaaneni; soodachcho no'oxxi; ha'no wo'make kadinaashateni. 10 Tenne erga ha'nona'ni bayyate hedhenexxi borreesinenelchi tennexxeeteni; tenne buutonni ha'noba'a dagano wodda; Gootti ani'a uwwexxe dande'ani ha'no'o rakisabo'noni; Gootti dande'a an'a uwwechchi; ha'no'o ijaarate'e malee'e; ha'no diigateteban.

11 Yoona anke dayyuwwa nage'iki hedhdhe! Wo'ma manna kadde! Gorisa anka laqqe! Weli'ani weli aage! Nage'iki hedhdhe! Iitta kadinoole eeyyuntetikinna nage'inki Magen ha'noni welti hedhdhaani. 12 Qullumat weli sunqexina'ni weli nage'a aadhdhe! 13 Amaanye duuchcha nage'a ha'no'aa dhaande'een.

14 Gootta Yessusi Kirsitoosiki badhaadhi; Magen eeyuntenna Woyyichchi Hafuurki mittoomi ha'no duuchchingeninni welti hedhowaali!