1 Magen mararte ifixxenni tenne'e ergatensha no'o'ni uwwemaxxe'e godoba kultinabe'no. 2 Sho'ondeexxenna shookishshaaxxe kadeexxa yaane waallenneni; shokoti hunjabe'noni; Magenka hiyyichchonna dharki welti karisinabe'no. Tenne irra Magen edo dhugaa ifinse leelinsha'n umo no'oka manji duuchchike wodani'a Magen edo luqasino. 3 Odeesinenexx wengele sho'ondeexxe kaddole sho'ondeechi ba'aake manni'a callani. 4 Insa'ne aman gonpheechchi Mageniinxe bifi kadde'exxa Kiristoosike ulfinke wengeleka ifi undabaashsha tenne buttak mageni amanandabaaxxa insa'nexxa sammo duuchemaxxeten. 5 No'o Yessuusi Kiristoosixxe Gootta kaddeexxa malee ifi lalaba'be'no. Gootta Yesuus Kirstoosxe no'o ha'no'a ifi erganjuwwake assinano. 6 «Ifi dukannati giddo ifowwaali!» hiyyeexxi haaso'eemak Magen Kiristoosixxe bifanni ookkonee ifaaka Mageniinka ulfinna ege'ntika ifa no'aa uwwo'a iikki ifi no'oxxe qalbe'n ifaashsha asse.

7 No'o ulfeesendeexxa tenne yaane anfeeneki mann faarinke miyini hujemeeke miyishshateni. Tinninna itta kadeechchi lumoxxi hunna Mageniinxe mallee no'oxxe kadebaaxxa ege'nendaashaateni. 8 Ora oranaa'nini rakko no'o'ni geltaani; yaane kinni injifatemabo'noni. Heddo yanna memmi hinnanoni; yaane kinni godoba kultinabe'no. 9 Naaphi no'o shorshan yaane kinni jaaluwwa gonph egenebe'no gannemme inbanooni, yaane kinni rennabe'n. 10 Yessuusixxi hedhdho manjjunte no'oxxe'ni leelitaashsha duuchchi wodda Yessuussixxa rewo manjjunte no'oxxe'ni dulkinne mareemaanneni. 11 Isixxi hedhdho tennee rertaaxxe no'oxxe manjjunte'n leellito'a ta'a no'o hedhdhoti he'nennek duuchchi wodda Yessuusixxe'e reyotee sa'issemmee uwwemmannoni. 12 Iitta kadeexxini no'o rewote'e sa'isemennexxi he'nanno wodda ha'no hedhdhoti hexxinaani.

13 Kaddo malee'e, «Amanene tennexxenna haaso'enne» hiyyende borreesendemashanni; no'onna ookkonne mitte amanatka hafuura anfeenaxxe'e amanaane; tennexxenna haasonaane. 14 Gootta Yessuusii'i reyotenaa'n ke'iseemak Magen no'onna Yessusinni welti ke'isaaxxanna ha'noni welti isi edo shiqishshaxxa egenneneni. 15 Tinni duuchcha ha'no'a la'ote kadek badhaadh bira sa'e heddi mann'a geyemashanni Magenoke'e ulfinni'a kadaak galati bira sa'ashaten.

16 Tennexxe adde no'oxxa goonfabe'no; gadhixxi manjunnite baxxole giddixxi no'oxxi manjunte no'oxxin kinni barra barrande'ni haaro'maan. 17 Tinni shollaxinna yannatixxi no'oxxi rakko; haraanga lumoke kadeeka duuchchi Woddika ulfinna no'o'a afisaani. 18 No'o uundanek leelitabaaxxe yaane malle'e, tenne leelita'nexxebaani. Tinni leelitaaxxi yaanenna yannatixxen; yaane kinn leelitabaaxxi yaane duuchchi woddixxeni.