1 Qulliyyete assemaake gargarsixxee ani ha'no'a borreessa hasisaba'a. 2 Ha'no Akkaayiyaake boga'n hexxineek manni gargarsake afineexxa hinaaffe ege'nenaxxe'e «Akkaayiyaak mann saxxexxe wogganaa'ni ke'iseexxi gargariyyote'e qixxefate'eeni» hiyyeneexxi ha'noxxe Meqedooniyake manna'n ifi saada'ni kulleeneeni. Tinni ha'no garigariyyote'e afineexxi si'a heddo manna onnosit'e ke'isete'een. 3 Yaane kinni ha'noni ifi saadaneexxi saadino itta tolake kade'e gatabaashsha konne dayyuwwa ha'noba'a erigineeneni; konnechi edi darre kullenaashaani qixxefatineexxi heqqe. 4 Meqedooniyak mann anini welti ha'noba'a dageexxi qixxefatinebaake kaddineexxa afoole; ha'no'ni holinenaaxxe'e shoonkanoni; ha'nofa'i lumo qico shookinaani. 5 Tennexxee uwwiyote'e weli aaginemaaka edisineexxi qixxeesitinaashsha kassi assona'a hiyyiyyoti ediseneexxi dayyuwwi kunn ha'noba'a dagaashsha aseneeni. Konne toorini ani dagaano wodda uwwa ha'noxxa qixxesitine heqitinaani; ha'nonna uutina'neek eeyya ha'noxxinite malle'e hunnati kadebaaxxa leelishaan.

6 «Hennoka facaaseek hennonge buki asedhdhani lummoka facaaseeki kinni lummonge buki asedhdhani» hiyyemaka hiyyichcho kassi hiyye! 7 Magen eeyyaki gammashshoti uwwake manjoni. Tennexxee mitti mittinigi uwwate'e haseechcho qalbete'ni heddexxi gammashshoti uwwo'o yaada'n yookaani gamada'nebaak uwwoqe'e! 8 Duuchchinxe yanna'a gayaaka alfitineexxi elloxxe huje duuchcha'ni hosisate geyaasha Magen birasa'iseexxi eeba isixxa uwwiyyote'e dande'aani. 9 Tinninna,

«Hiyyeyyete'e arjoome uwweni;

qulluma isixxinna duuchchi wodda hexxaani» hiyyende borreesendemashshanden.

10 Ittani facasaake sanne, itate'e waassa uwwaki Magen; facasinaaxxa sanne birasa'ise'e ha'no'a uwwani. Ha'noxxa arjumatixxa gummanna bira sa'isaani. 11 Arjunteeti uutina'nexxa uwwa no'o daree'ni adhdha'neeki mann duuchchi Mageno galatefataashsha duuchchi wodda arjunteeti uutinaashsha Magen duuchchiinxe yaanneni ha'no'o durroonsaani. 12 Tinni ha'no uutina'neexxe uwwaxxi ergatenshsha amaagnetixxa rakko hoyyiyyatenaa'n saxxaaxxen; Magenoke'e lummmoka galata shiqiinshaashsha asitaani. 13 Tenne ha'noxxe arijunteeti uwwatixxe erigatenshshani Kiristoosixxa wengeele adhdhitinne'e addatineeke kadineexxa wele manni'anna ege'nishshamaxxe'e mann Mageno saadaani; ittani insa'ne'anna wele mann duuchchi'a arijunteti uwwitmaxxe uwwaaxxe Mageno ulfesinaan. 14 Insa'nenna Magen ha'no'a uwweke lummoke badhaadhdhanaa'ni kexxexxa ha'no eenemaxxe'e ha'no'a soodantta'neeni. 15 Konne qicon hiyyendeexxi kullendabaaxxe isixxe uwwa Mageno galati gewowaali!