1 Kunni yannatike duunkaanishsha kadeek buttatik maali no'oki diigema wodda manjinxe angante kadebaangi Magenxe angaani ijaaremeeki duuchchi woddiki mini iima no'o hedhdhexxa egeneneeni. 2 Iima hedheka no'oka mine seemmatishsha odo'wiyote'e quqquxema'ni foo'late'ni he'nenneni. 3 Ookkonne no'oka mine seemmatishsha odo'winaanno wodda duwwiti he'nabe'noni. 4 Konne buttike duunkaana kadeeke maali no'oki giddo he'nanno wodda, no'o'n a'uree'na'a foo'linaaneni. Foo'linaanelchinna iikki reyamak hedhdhoti liqisemasha iimika no'oka mine odo'wiyyote'e malee duwwiti gantona'atebaan. 5 Tenne yeene'a no'o'a qixxeseeki Magenokeni. Heger no'o'a uwwendaaxxe yaane'anna abidlshake kadaashsha Woyyichcha Hafuura no'o'a uwweki isoten.

6 Tennexxe buttatik bisi no'oknn he'neneqico'ni Goottakena'n bayyantenxa egenonolenna midde duuchchi wodda addante he'nano. 7 No'o he'nanelchi amanatite malee'e iso'o uudatitebaani. 8 Konne he'naneeke minsha hedheeke no'oke maalanaa'n gargarit hingeneexxi Gotti welti he'nona'a fi'linnanoxxa afo'o wo'me haaso'anen. 9 Konne maali no'oken he'nonnole yookaani konne maalanaa'ni gargariti hingonoole yorte no'oxxi Gootta gammachisiyoteni. 10 Mitti mitti no'onigi buttate'ni hunjennexxe hujenxe eloxxeenna kaddo elobaaxxe hunjenaxxe hujeka hira alfaatee Kiristoosixxe murtetixxe moote edo shinqaanoni.

11 Mageno soddata maachcho kadeexxa egennenaxxe'e mannake'e kullaneni. Magen no'oxa ayyunte ege'ne'eni ha'nonna qalbe ha'noxxenne egendinaxa addantanon. 12 Qalibete'ni hexxexxe yaanenaa'nite kaddebaangi leelitaaxxe yaane'ni ifi saadake'e hiisa dandeetinasha; ittanni ha'no no'o'ni ifi saadinasha no'o ha'no'a daafeete kandona'ate malee'e higgen no'o ha'oxxe'e galateefatemona'atebaani. 13 Maraatake kandonole; Magenoke hinneteni; wodannke manna kandonole kinni ha'no'a hinneteni. 14 Mittele Kiristoosi duuchchingee reyexxanna duuchchingi mann isixxa rewo qoodemaake kadeexxa egenenaxxe; Kirsitoosixxi eeyunte no'o hujete'e tirtirisita'neeni. 15 Hedhoti hedheeki mann duuchchi insa'ne'a reyekeenna rewotenaa'ni ke'emakee'e hedhashshate malee'e konnechchini edi'a mann umo ifikee hedhabaasha Kirsitoos duuchchinge'e reyeni.

16 Tennexxee konnechchin edi'a ayyeenna maalnxe uushonni uundabe'no. Konnechchini edi darrenna Kiristoosii'i uundeneeki maalinxe uushontenna kaddole midde yoona konechchini edi'a uundanoki konne orintebaani. 17 Tennexxee ayyinna Kirsitoosini mittomoole isi haarooxxe dadani. Dullate dada saxxe'eni; kunse haaroxxe dada kade'een. 18 Tinni duuchchi kadeechchi; no'o isini welti Kiristoosi gamii'n arraariseekenna arraarinxa erigatensha uwweke Magenonaa'niteni. 19 Tinninna, Magen Kirsitoosi gami'ni manjo duuchcha isini welti arariseeni hiyyoteni. Balleesa insa'nexxanna laako'ebaani; no'o'anna araarisatika hiyyichcho uwwe'eni. 20 Tennexxee no'o Kiristoosixxe tukkuwwan; Magen no'o gami'n manna ye'aan; no'onna ha'no'o «Magenk welti araareeme!» hinenexxi Kirsitoosike summini kadhantaanon. 21 No'o Kirsitoosini welti mitteba higati Magenxa qullumma alfinanoshsha; Magen cubbo afebaaka Kirsitoosi'i no'oxxa cubbo dulkaashsha asseeni.