1 Higeeni no'o umo no'oka galateefantona'a ke'nanno? Yookaani mitti mitti mann asa'neeshsha ha'no yookaani ha'nonaa'ni borreesendeexxi galatiinxi borro no'o'a hasisa? 2 Ha'noqa manji duuchchi ege'na'neekenna haasesa'nexxe qalbe no'oxxi giddo borreesendeexxi borro no'oxxi ha'noteni. 3 Ha'no umo ha'nongeenini borrotishshateni. Kiristoosibaa'n dagineexxe eriga kadineexxa ege'nendeexxeni. Tinni eriganna borreesendeeki hedhdho afeeke Magenke hafuurinte malle'e qalametitebaani. Ittani borreesendeekinna manjiinxe qalibee'nite mallee kinjoke'nitebaani.

4 Kiristoosi gamii'ninna Magenoke'n no'o iitta hexxeexxa adde anfe'ene. 5 Tenne yaane asiyyote'e gennanosha dande'a no'o'a uwa'neki Magenoke malle'e no'o umo no'oke mittelchonna assiyyote'e dande'a anfebe'non. 6 Fidalk borreesendeexxe kakonte kadebaak Woyyichchi Hafuur borresendeexxe haaroxxe kakko'a ergatemanoshsha no'o geesiseek kinni Magenoken. Tinninna kadaachchi fidalk borreesendexxi kako rewote'n geesisaani; woyyichchi Hafuuri kinni hedhdhote uwwa.

7 Seer borreesendeek kinjoke'n hana borrotitemaani; seeri uwwemeema wodda Magenki ulfini cala cala hiyyiyyoti lelleeni. Fedhdhe qiconna Muuseke albaa'n cala cala hiyyamaaki ifi heeno'ma'n me'eexxe kaddoolenna Isira'eelik ardi Muusseka alba dhaphphi hiyye'e uudatee dande'ebaan. Rewote'e geesisaaki seeri konne orike ulfinini lelleexxini, 8 Yoona, woyyichchi hafuuri gami'ni afendaaxxi erigatenshsha hitteqico sa'eeke ulfinna affuta? 9 Mann murte adhaaxxi erigatenshsha konne ulfinna afeexxeni, mann fayaaxxi erigatenshsha hitte qico sa'eeka ulfinna affa gophphaata? 10 Edi wodda ulfata'emak ta'a caala ulfinna afe'eken welt heregema wodda ulfinna afebaake kade'een. 11 Iikk baxxama ulfinni konne qico ulfinna afeexxeni yoona duuchchi woddi'a hedhaak ulfinnita caala ulfaata gopha?.

12 Iitta hexxeexxa adde anfenaxxe'e afo'o wo'mine haasonanon. 13 No'o ookkone uuduma ba'aaka ifike albika ulfinna Isira'eelito uuddabaashsha seemat alba ifika buqedhemake Muuseshateba'a. 14 Insa'nek yaadi dhugaandinni dillo'e'en. Telchchi qico'ni siretixxa kakkoka Maxaafa haasosinna wodda; yaadi insa'neki eetenne seemmani buqeme'emashan hedheman; ikki buqe'emalchi hoyyemaak kinni Kirsitoosi callinteni. 15 Telchchi qico'nitenna kaddole Muusseka seera haasesinna wodda yaadi insa'nek ookone buqe'emalchinni buqeme'eni. 16 Fedhdheki manji Goottiba'a higa wodda kinni buqemalch itti hoyyendaani. 17 Gootti Hafuurakeni, Goottik Hafuur hedheeba garbunte hexxeba'a. 18 Ta'a kinni no'o buqemebaake albini Goottinka ulfinna da'witetisha calalasinanon; isixxa bifa lanbano'a ulfinakenaa'n ulfinba'a jijiremanon; tinninna kaddaachi Hafuurake kade'eke Gootti'niten.