1 Sakka baro Asteeri ifixxa mootummatixxa seemma oddo'witeexxi moyanjiinxe ba'laxxe kuta edidarre hedheeke mootummatike minike giddike ba'linna'n e'yite uurrite. Moyanjikinna eettene ba'laxxe kuta giddo eyichchiinxe hulake kallachcha'n ifixxe moote'n offo'leemman. 2 Mootitte Asteerinna ookkone mootummatike mini giddike ba'linna'n uurritee'na afee wodda gammade; anga afeemmaxxa ifixxa worqetixxa zangenna ise'a diriirse; Asteerinna shikkiteexxi zangetixxa qacce tuqqe. 3 Ookkonechchi uduma moyanji Asteeri, «Mootitte Asteeri mayee daggette? Ane'e kadhaattaattexxi yaane maacho? Wele waalini anxe mootummake gamis qici ati'a uwwemaan» hiyye. 4 Asteerinna, «Moyanjo fedhe atixxe kaddoole ati'a qixxeesseennexxe ita'n telcho Hamaanenni welti afemme» hite. 5 Moyanjikinna «Asteeri hiteexxa assinannoshsha Hamaane rakkine ye'we» hiyye. Tennexxee moyanjikinna Hamaane Asteeri qixxeessiteexxe itabaa me'ine; 6 Woyinetixxa booka ha'winanenge'n moyanji langaxxa Asteerii, «Halcha atixxi maachcho? Ati'a uwwendaan; kadhatta'ettelchchi maacho? Anxe mootummake gamis qico'n midde ati'a uwwendaan.»

7 Asteerinna, «ani kadhataannelchchinna qoraannelchchi: 8 ani ate'e moyanjoke'n elle alfo'onole yora'enexxanna kadhata'ennexxa ani'a uutottaa atee moyanjo gammachchiisoonole ati moyanjikinna Hamaane soodo ha'no'a qixxeessaannexxe ita'n afemme; ookkonechchi uduma ani ati moyanji qortetteke qortumika hiissichcho uwwannon.»

9 Hamaane eettenee barra gammade qalbe isixxi lashshiteenaa fule; yaane kinni Merdokiyoosii moyanjiinxe hula edo ofole'leenaa afe; yaane kinni isi isi'a offo'leexxe bakkanaa'n iimi'a ke'a gopheexxanna iso'o ulfeessatee weekemeebaaxxa afee wodda Merdokiyoosi'ni aare bubbiyye. 10 Hamaane kinni osse ifi abide mine ifikibaa me'e; jaaluwwa ifikanna are ifixxa Zereeshinna ye'iseexxi mitteba bukk asseechchi uduma 11 Hamaane isi hittee qico dureessake kadeexxa, heddo oose afeexxanna iittanni moyanji isoo hitta ulfeesseexxa, wele baalloominikenna ja'laabuwwi caala isoo hitta kubbiseexxa ifi duka'n insa'ne'n haaso'e. 12 Hamaanenna, «Tenne callabaan» hiyye; «Moyanjo Asteeri qixxeessiteexxe ita'n moyanjik welt maronnaa yexxeek manji mitte ane callan; soodonna moyanjiki welt anee yexxeen hiyye. 13 Yaane kinni Yihudichchi Merdokiyoosi moyanjiinxe hula'n ofo'laa afonnole tinni duuchchi anee gammachchiisaaba'a.» 14 Are isixxi Zesreeshinna jaaluuwwi isik duuchchi isoo, «Ejjuma onde tomme ciqilexxa fanno uurrissettexxi Merdokiyoosi itti fannisemaashsha gorsa moyanjoke'n kul; ookkonechchi uduma gammaddettexxi moyanjik welt eettene itabaa e'yi» hine. Kunni yaadinna Hamaane lumoshsha gammachchiise; fannotika haqichchonna uurrise.