1 Eettene barra moyanji Arixxekisiissi Ayihudiinke naapha kadeemmake Hamaaneke minixxa karra mootitte Asiteeri'a uwwe. Asteerinna Merdokiyoos hoone orni ise'a firomaaxxa moyanjoke'n kuldeemmaxxee Merdokiyoos moyanjiinbaa edo shiqqe. 2 Moyanjikinna ifiki beessis itti hedheexxa qube fulche'e Merdokiyoosi'a uwwe. Asteerinna Merdokiyoosii Hamaaneke minixe karra'ni baalloonsite.

3 Asteeri moyanjiinxe lekka'n ibbe ooxxa'ni ku'la ifixxa haaroba moyanjoke'n shiqishshe. Agaagichchi Hamaane Yihudootake'ni asseemmaxxa shokko yaada hoyyaashsha isoo kadhatte. 4 Ookkonechchi uduma moyanji eettenee worqetixxa zange Asteeri'a diriirse; isenna kexxeexxi isi edo uurrite.

5 Moyanjoke'n hiteeqici, «Atee moyanjo gammachchiisaneexxe kaddoolenna aninna ati edo elle alfe'onoole, iittanni tinni yaanenna ate moyanji edo seeriinxe kadde afendoolenna aninna ate'ni eeyyemoonnoole; Hagaagichcho Hamadaadik belt iikki Hamaane moyanjiinke awurajjuwwi duuchchi giddo afemaaka Ayihudoota biro'a xaxeemmaka ookkonee shookotika yaadanna borreessemmaka borreessa jijiiraak ajaji borreessemowaal. 6 Anke arda'ni ba'ne dagga'naa hittata uuda'ni ossa dande'anno? Hadi ankixxa ba'ne uuda'ni hitta ti'ni hiyya dande'anno?»

7 Moyanji Arixxekisiissinna mootitte Asteeri'anna Ayihudichcho Merdokiyoosi'a hiyya'n hiissichcho uwwee qici, «Kunse Hamaane Ayihudoota biro'a yaada fulchedheemmaxxee isixxa karra duuchcha Asteeri'a uwwenne; isoonna haqichoke'n fanninseen. 8 Moyanjiinke summinni borreesendeexxenna qubeeti maxxensendeexxi borreessa jijjiirema dande'agophaammaxxee ha'no kinn Ayihudoota uudaxxenni ha'no'n eloxxe kadde leellitteexxa wele lassa moyanjiinke summinni borreessitineexxi moyanjiinxxa beessisiinxa qube itti maxxanse.»

9 Eettene yanna Niisaan hiyyemaake sakkake agenjixxe lame tommenna sakkaxxe barra'ni mootummatike minik borreesanjuwwi wiinamik ye'emeemman. Insa'enna Merdokiyoosika ajaja duuchcha Yihudootakee iittanni Hinidike boginaa'n sanfe Tophiyin qico'n hedheeke dhibbanna lame tommenna torbaane awuraajuwwa'n hedheeke ja'laabuwwa'ni awurajjiinke galchalluwwa'inna wele baalloomiinke manna duuchcha'n borreessine. Kunni ajajuwwi borreessemeek mitte mitte awuraajiinke fidalinninna mitte mittenge gosake laagadinni, iittanni Ayihudootakee insa'neenge fidalinninna insa'neenge laagadinnitemman. 10 Mordokiyoos ookkonee ajaja moyanjo Arixxekisiissike summinni borreesseexxi moyanjiinxe qubeka maxxansa itti hana maxxanse. Ookkonechchi uduma moyanjoke lenjisemeeke qolchalluwwa fadhadoo'n gulufaake erganjuwwa'n erge.

11 Iitti moyanjiink lallab qachcha qachcha'n hedhaak Ayihudooti duuchchi bukki hiyyeexxi ifinaa'n ba'ne faachcheffataashsha, iittanni ifixxe aruwwanaa'ninna oosee'n miidhensha geessisaaka hoone bogika manjo yookaan awuraajiixxa bagedo ka'liteexxa hunna birro'a, shinno'a, bakka insa'neexxa balleessino'anna ifike naaphixxa karra saammo'a eeti insa'ne'a uute. 12 Ayihudooti moyanjo Arixxekisiissike awuraajja duuchcha'ni tennee muunxaashsha murendeki Adaar hiyyemaake tommenna langeessoke agenjixxe tommenna sakkaxxe barra'nitemman. 13 Yihudoot eettenee barra naapha ifike'n halo fulatee qixxeeffataashsha, eettene ama lallabi seerixxi koppe awuraajja awuraajja'n ergendee'naa bogi bogingi ardi duuchchi ege'naashsha assende. 14 Ookkone mootummatike minike fadhado'n gulufeemmak erganjuwwinna moyanjiinke ookkone wiinansaake ajajinni qolchisa'n fulle; lallabikinna Suusake qachchi giddo ardake'n lallabemme.

15 Merdokiyoosinna iimatixxe bifanninna golaloke shimalixxe mootummatike minixxa seemma oddo'weexxi, lumooka werqetika kallachcha umoke'n uggudhdheexxi, layinotike shimalinninna baddeessichcha shimalinni giissemeeka kaabba oddo'weexxi moyanjiinbaa'n fulle; Suusak qachchinna gammashsho wo'miteeka ayaanna ulfeesse. 16 Iitti yannanna Yihudootakee gammashotixxenna fenxe hiyyatixxe, xoo'mamiinxenna ulfaatatixxe yanna insa'ne'a kadde.

17 Moyanjiinke lallabi geyeemmake mitte mittenge awuraaja'ninna mitte mittenge qachcha'n Ayihudooti gammande, ililinse, xoo'mamiinxenna fenxe hiyyatixxe eloxxe barra insa'ne'a kadde. Ayihudoota soda'atenaa'n kexxeexxa wele bogi bogik heddi manni Ayihudake kade.