1 Adar hiyyemaake tommenna langeessoke agnjixxe tommenna sakkaxxe barra'ni moyanjiinke ajajinni fuleemmak lallabi muuxemaaxxe barramman. Tenne barra'n Ayihudootiink naaphuwwi duuchchi Ayidoota ifi hunda sa'isse'naaxxa addanteemman; yaane kinni jeeji jijjiiremee'na'a Ayihudooti insa'ne giba'eemmaka manna ifi hunda sa'issedhe. 2 Insa'neexxa ba'ne eeyyaammake arda'n fuggoxxa geessiso'a Ayihudooti moyanjo Arixxekisiissike awuraajji giddo duuchcha'n hedheeke qachchuwwa'n bukki hiyyeek. Wele bogik ardi duuchchi insa'nee sodaanteemmaxxee ayyinna insa'nee le'misa dande'ebaan. 3 Awuraajji awuraajjiki ja'laabuwwi duuchchi weli baalloomiink manni, iittanni awuraajiink galchalluwwinna iitanni moyanjiinxi tukkuwwa duuchchi Ayihudoota gargaarte. Insa'ne tenne assineelchi Merdokiyoosii sodaantemmaxxeetemman. 4 Merdokiyoosi mootumatike mine'n baalloomik lumoke kada'n me'e; gurri isikinna awuraajja duuchcha'n laqeme; hunnatinna jabaatta'ni me'e.

5 Tennexxee Ayihudooti naaphuwwa ifika wolaantichchik kamma'n shinneexxi birre; insa'nee gibaammake duuchcha'n eeneexxa assine.

6 Ayihudooti suusake qachcha'n onde dhibba manna shiye bire. 7 Parshandaataa'a, Dalfoonii'i, Asipataanii'i, 8 Paraataa, Adaliyaa, Aridaataa, 9 Parmaashitaanii, Arsayi, Ayiridayiiniinna Wayizataanii'i shinne. 10 Kunniir Yihudootiinke naapha kadeemmake Hamedaatuka belto Hamaanexxe tomme labbaxxe oosemman. Tinni duuchcha kadda wodda insa'ne karra boojinebaan. 11 Eettenne barra'n Suusake qachchi giddo shiyemeeke mannik laakkossi moyanjoke'n kuleme. 12 Moyanjikinna mootitte Asteerii, «Ayihudooti Suusake qachcha'n onde dhibba manna tomme Hamaanexxa labbaxxa oose shiyeen, bakka insa'neexxa balleesseen. Insa'ne wele gateeke moyanjiinke awuraajjuwwa'nita hittata assinuta? Ta'ata ati wele kadhatta'ettelchchi maacho? Ati'a uwwaan; Qorta'ettelchchi maacho? Eeti'i ati'a uwwendaan» hiyye.

13 Asteerinna, «Moyanjo atee gammachchiissaneexxe kaddoole Suusake qachchi giddo hedha'neek Ayihudooti telchixxa lassa soodonna lenbaashsha eeti atixxe kadduun; tomminiingi Hamaanexxi labbaxxi oosenna haqichoke'n fannisendowwaal» hite. 14 Moyanjikinna tinni assendaashsha ajaje; Suusake qachcha'n lallabi kuleme; tomminniinxa Hamaanexxa oose fanninse. 15 Suusa giddo hedha'nek Yihudooti Adaar hiyyemaake agenjixxe tommenna sholgeessoxxe barra'n bukki hineexxi dange, insa'nenna Suusake qachcha'n sase dhibba kadaaka manna shinne; kaddo malee karra boojinebaan.

16 Eettene yanna wele moyanjiinke awuraajja'ni hedhaak gateek Ayihudooti ifinaa'n faachcheefato'anna naapha ifikenaa'n hafuura adhdhatee bukki hine; insa'nee gibaammakaranna torbaane tommenna onde kuma manna shinne; kaddo malee karra boojinebaan. 17 Tinni assendeek Adaar hiyyemaake agenjixxe tommenna sakkaxxe barra'nitemman. Insa'nenna tommenna sholgaxxe barra'ni hafuura adhdhine, eettenee barranna itatixxe ha'wiinxenna gammashshotixxe assine honse.

18 Suusake qachcha'n hedhemmak Ayihudooti kinni tommenna sakkaxxe'ninna tommenna sholgaxxe barra'n bukki hineemman; ookkonechchi uduma tommenna ondixxe barra'n hafuura adhdhine; eettenee barranna itatixxe, ha'wiinxenna gammashshotixxe assineexxi honse. 19 Olla'a olla'ange'ni hedhaammak hadi giddik Ayihudooti, Adaarike agenjiinxa tommenna sholgaxxa barra itatixe, ha'winxenna gammashshotixxe, weli'an weli uwwa uunaaxxe barra assine ulfeessina'neek tennenaa'ni kexxeexxinniten.

20 Merdekiyoosinna assendeexxa tenne yaanuwwa borreesseexxi duuchchiinge Arixxekisiissike awuraajjuwwi giddo shiqonna bayya hedha'neeke Ayihudoota duuchcha'n erge. 21 Ergeekinna Adaarixxa tommenna sholgaxxanna tommenna ondixxa barra wogga woggande'ni ulfeessinaashshaten. 22 Ulfeesina'nelchinna Ayihudooti naaphuwwa ifikenaa'n hafuura adhdheexxe barra, yaaddo insa'nexxi gammashshote'n, oodhishsha insa'nexxinna ayyaanna ulfeessatixxe barrabaa jijiirendeexxe barra kaddemmaxxeete; tennee barruwwannna itatixe, ha'wiinixenna gammashshotixxe barruwwa asse'neexxi weli'an weli itatixxa uwwa uuno'anna hiyyeeyyeteenna uwwa uuna'ni ulfeessinaashsha insa'ne'a borreesse.

23 Tennexxe Ayihudooti Merdokiyoos insa'ne'a borreesseemmaxxa yaane muunxo'anna sanfeemmaka ayyaana ulfeessatee weli aange. 24 Tinni kaddeechchi Ayihudooti duuchchike naapha kadeemmak Agaagichcho Hamadaatuk belt Hamaane Ayihudoota biratee shokko hujeemmaxxeeten; isinna insa'nee biro'anna bakka insa'neexxa balleesso'a Fuuri hiyyemaaka hixa hibiseemman. 25 Assendeexxi shokko moyanjoke'ni ege'ndeeshshanni Haama Yihudootake'n hujeexxi shokko umo isinge'n higgaashsha isinna isixxe tomminiinxi labbaxxi oose haqichoke'n fannisendaashsha borreessatika ajaja sa'isse. 26 Tennexxee tinni barruwwa Fuur hiyyendaaxxe hiyyanaa'n «Fuuriimi» hiyyende ye'endo'a gelte. Tenne borreessaa'n borreessendeemmaxxi yaane duuchchixxe, insa'ne uundeexxenna insa'ne'n gelteemmaxxe yaane duuchixxeetera, 27 Ayihudooti ajajemeexxenna murendeexxe yanna'ni insa'nenna horte insa'neexxi, Ayihudake kado'a hasaak duuchchi tenne lame barra wogga wogga'n uurrisabelo ulfeessaashsha aadate asse'ne ifi'a murre. 28 Tinne barruwwa ila ila'ni, mitti mittinge mini hado'ni, mitte mittenge awuraaja'ninna mitte mittenge qachcha'ni qaabanta'ni ulfeessa hassissaan; tinninna kaddeechchi tinni Fuuriimixxi barruwwa Yihudootake'n ulfeessinebaang gattabaashsha, qalliitinna horte insa'neexxi giddii'n baxxabaashshaten. 29 Tennexxee Abihayi'eelixxi belto mootitte Asteeri Yihudichcho Merdokiyoosinni welt Fuurimii uuddaaxxenni tennee konnechchi butta hexxeexxa langaxxa borreessa dudhatee wo'ma baalloominni borreesine. 30 Mordokiyoosinna eloxxe yortexxe ifisa kaddeexxa borreessa Arixxekisiissixxe galcha giddo duuchcha hedha'neeke dhibbanna lame tommenna torbaane awuraajjuwwi giddo hedha'neeke Yihudooti duuchchi'a erge. 31 Ergeexxi buutonna Yihudichchi Merdokiyoosinna Mootitte Asteeri insa'ne'a lallabeemmaxxanna iittanni agabo goddoxxanna abariinxxe barraxxa uuddaaxxenni insa'ne'anna insa'neexxe horte'a duuneemmaxxe murteshsha tinni Fuuriimixxi barruwwa uwwende uwwendeemmaxxe ifi ifixxe yanna'n ulfeessendo'aten. 32 Mootitte Asteeriki lallabinna Fuuriimixxe eettene fuldeemmaxxa aadanna hudhudhdhi assite; tinninna maxaafake'ni borreesende.