1 Hinidike boginaa'n Tophiyiinke bogi qico'ni hedheeka mitte dhibbanna lame tommenna torbaane boguwwa galcha'emmake Arixxekisiissike mootummatike baro'n kaddee qici, 2 Ookkone baro'n moyanji Arixxekisiissi mowe galcheek Suusa qachcha'n hedheeke moyetike mine'n hedha'neetemman. 3 Isinna moyeexxe sakkaxxe woggaa'ni ifike jalqabuwwakeenna ja'laabuwwakee lumoxxa ita qixxeesse. Eetenne ita'ninna Faarsikenna Medoonike loliinke mannik ajajalluwwi, hayyooletinna awuraaji awuraajiink jalqabuwwi ookko afemmeemman.

4 Moyanjikinna insa'ne'n ifixxe mootummaxxe karraxxa birasa'ne, ifike gaachchanike ulfinna mitte dhibbanna saddeeta tomme barra duuchcha insa'ne'aa leellishe. 5 Tinni barruwwa saxxeechchi uduma moyanji suusake qachcha'n hedhemmake shiixxarammakenaa'n lumokenaa'n hedhemmake ardi duuchchi'a ifike moyetike min giddo qaraqari isik hiddichchik qoqqobemeeke ba'linne'n torabaane barra'a turteexxa ita ha'wa qophpheesse. 6 Kunni ba'linninna golaloxxenna cuqullitte seematika goluwwa afeemman; kunni seemmatik goluwwinna birretike sibljixxe qube ise'a giissendeexxe golaloxxe baddeessitte boo'eexxe wodaruwwanni cabbetike utuphuwwi hana fannisemeemman; golaloxxinna diimmoxxe bifaxxi boo'e welti makende giissendeexxe fayemeeke boonchi hana quphphichchi worqetikinna birretike sibljixxe taquwwa hexxemman; tinni taquwwanna golalxxe diimoxxe, baaxxittenna cuqullitte booxxe afeeke booncho'n hanna hexxemman. 7 Iitti woyinetixxe bookanna mitti mitting welekenaa'n gargar gargar hedheeke worqetike qasha'ni shiqa'emman; moyanjiinxe arjummanaa'n kexxeexxa isike moyetike minixxe woyintixxe booka hara bira saxxeexxe kaddeemmaxxe ca'lneexxi ha'winaashsha asse. 8 Moyanjikinna huuni manjinna daandee qico ha'waashsha moyetike minika erganjuwwa ajaje'emmaxxe moyajiinke ajajishsha mitti mittendi keesumma haaseeshsha ha'witaamman.

9 Mootitte Asxiininna moyanjo Arixxekisiissike mootetike mine'n melaalletee ita ha'wa qixxeessiteemman.

10 Torbaxxe barra'n moyanji Arixxekisiissi woyinetixxe bookanaa'n kexxeexxinni gammadeemmaxxe isike erganjuwwa kadeemmaka ookkone torbaane middissuwwi Mihuumaanii, Bigiita, Harboona, Bigitaa, Abagita, Zetaarinna Karkasii hiyyeexxi ajajee qici: 11 «Mootitte Asixiini moyetike minixxa ifixxa seemma oddo'witeexxi, kallachchakanna umoke'n uggudhdhiteexxi kabaa daggaashsha asse» hiyye; isi tennee asseechchi mootitte Asixiini hara danchummati quba saxxeexxe kaddeemmaxxe isike ja'laabuwwi baalloomiinke manna'ninna ye'endeemmaxxe keesumma duuchcha'n ise uudendaashshateemman. 12 Yaane kinni iikki erganjuwwi moyanjiinka ajaja isie'n kulle wodda mootitte Asixiini mara gibbe; tennexxe moyanjikinna lumoshsha mufate aare. 13 Seerakanna dhugaa uuddaaxxenni moyanji gorsa uwwaaka beeka manna qodhdha baratendeexxe kaddeemmaxxe baro uudaxxenni ege'na afeeke beeka manninni welt haaso'e. 14 Insa'neinna Karshena, Sheetaataar, Adimaata, Tershiishi, Meereesi, Maalese'aari, Memuka hiyyemaak kunni torbaan Faarsikinna Medoonik ja'laabuwwi moyanjin edo gargar hexxeexxa bakkanna moyanji galcha giddo jabaxxa bakka afeemmake mannamman. 15 Moyanjikinna konne ja'laabuwwa, «Ookkone middisuwwi darre'n ise'n ergemeeka moyanjo Arixxekisiissika ajaja muuxa gophpheemmaxxe seeriinxe aadashsha mootitte Asixiini'ni maachcho assemiyyo hassissa?» hiyye qore. 16 Ookkoneechchi uduma Memuka moyanji edonna ja'laabuwwi edo hiyya'n hisse haaso'ee qici: «Mootitte Asixiini balleessiteek moyanjo calla kadebaak isika ja'laabuwwanna duuchchinga moyanjinke Arixxekisiissi awuraajjuwwa'n hedhaaka arda duucha mittenbaten. 17 Tinni mootitte assiteexxi yaane wele melaalle duuchcha'n laqendaammaxxe ifi ifika aro'uwwa tuffattaan; ‹Moyanji Arixxekisiissi mootitte Asixxiinii isibaa daggaashsha isee ajajee'naanni ise isiba'a mara gibbeen› hinaan. 18 Tenne telchixxe barra'n mootitte assiteexxa yaane laqqeexxi Faarsixxenna Medoonike ja'laabuwwixxi aruwwa moyanjiinke ja'laabuwwa duuchchi'a konnee qicika hiissichchcho hiissinaan hiyyoten; iittate kaddoole kinni uurrichcho affebaaxxi tuffenna lolake ilemaan. 19 Teennexxee koo moyanjo, fedhi atixxe kaddoole ta'an elqi'a Asixxini atee moyanjibaa hara shiqqabaashsha hiyyendaaxxi murtek lallabi lallabemowwaal; tinni murtenna jijiirendabaaxxe kaddeexxi Faarsikenna Medoonike seeruwwa'n borreessendowwaal; iittanni ati moyanji isek mootomatik baallooma isenaa'n saxxaaxxe wele manjo'a uwwi. 20 Ookkoneechchi uduma ate moyanjink lallabi hara birasaxe ba'lateeke atixxe galchuwwa duuchcha'n kulendaa wodda shiixxarammatenaa'n lumollati qioc'n hexxeexxi melaalle ifi ifika aro'uwwa ulfeessitaan.» 21 Moyanjikinna isik ja'laabuwwi duuchchi konne yaada'n gammande; moyanjikinna Memuka shiqisheeka yaada hujete'n hosise. 22 Tennennaa'n kexxeexxa mitti mitting manji ifike mini hado'n galchalloke kadaashsha erga sa'isse. Tinni erganna mitte mittenge awuraaja'n ififixxe borreessaninna mitte mittinge arddi'a ifi ifike laagadinni borreessendeexxi isixxe galcha duuchchibaa sa'issende.