Jó 11

Sofaal ná-kpɔɛzuɠula mɔungi

1 Sofaal nii é zeɠezu Naama, naa kpɔɛi zeɠeni, é ɠɛ ma:

2 «Gooɠaaʋote ge la zɔlɔɔga kpɔɛzuɠula mɔinmɔingi niiti bɛ ɓaa?

Daawɔɔlɔi ɠa a kɛ nu gaama zɔlɔɔ ɓaa?

3 Ɗa-ɓɔɛzuɠula wafuungiti ta nuɓusɛiti maaɠɛ kpɔ ɓaa?

Ɗa ɲɛɛɠula nuɓusɛi zu, ti la è unfega, nɛi?

4 È boni ɠite, è ɠɛ ma: ‹Nii gè bosu, gaamai ʋe, ɲàdegɛ è ɠaazu.›

5 Ee, ni é nɛɛni GALA bɛ, é ɓɔɛ è ʋɔ tɔ ɓɔɠɔi,

é lakɔlɔgi wuzeɠe, é ɓɔɛ è ʋɔ!

6 A la ná-ɠimalai ma lɔɔɠuzu vai lɛɛna ga ɗe,

mazɔlɔɔ gola ɠaaɠoozaʋɛ ada-ɠeleɠelegi ʋa.

Ɗa la suɠwɛɛ naazu, ga GALA zeemaʋɛ ɗa-vaaɠaazagi ɠilazu ma.

7 «Ɗa zoo nɛi, è GALA ná-faiti kpomaʋɛti kwɛɛ ɓaa?

Ɓaa è Zɛbɛi-Pɛ-Maliɠii ná-daazeeli vaiti kwɛɛ?

8 Gaaɠoozaʋɛ ga geeɠɔlɔgi ɠɛʋele, leeni ɠa ɗa kɛ?

Kpomaʋɛ ɠoozaʋɛ gɔvɛalaazu ɓomaʋɛ ʋa, leeni ɠa ɗa kwɛɛ naa zu?

9 Sakpai ɠoozaʋɛ eteai ʋa,

kogi wɔɔlɔ kpoloɗɛi ʋa.

10 Ni GALA ga ɠɛna leʋega, é yeeʋɛɛ nu ma, é pili kaso ɠa,

ɓaa é toli tukpɔɠaaleʋezuʋɛ, ɓɛ ɠa a ɠɛlɛ lii vai ʋa?

11 Mazɔlɔɔ GALA ge nu ɲakaiti kwɛɛ,

é faa ɲɔi ɠwɛɛ, ʋɛ é ná, kpɛdɛ la ba ga é gaiziɛ.

12 Kɛlɛ faaɠaaɠalala nui a ɠɛna ɠeleɠelega,

kɛni voloi dɔɓɔzu zoovale ziʋoi zɔlɔɔsu da ga maaɠoloai.

13 «Ɗɔun ɗa, naa ɠa é ba, è-yii lati GALA ma,

è maanɛɛnɛ, è yeeiti maale pɔ pelei.

14 Ni è-yeeiti nɔɠɔʋɛ ga faa ɲɔi, ti ɠaagba,

è mina seizu ve telebotalai ʋɛ.

15 Ɗa ungi wuzeɠe názu, unfe ge la su,

ɗa lo kpaan, è la lua ani nɔpɛ ba.

16 Ɗa yeema ɗa-ɓɔlɔi ma,

È-ɠigi a loona su, toɠa ɠɛ eɠɛ ziɛi zeiɗai ná.

17 Ɗa-eteai zu ɠa ɠala, é leʋe folo gaalɔgai ʋa,

kpidii volo eɠɛ geelaalaosuʋɛ.

18 È-yiimaʋɛ laa ɠa ve ga ladalai, mazɔlɔɔ kitogi ɠa ɠɛ è ʋɛ.

Ɗa wɛlɛ è-maaɠoolii zu, è la gaanɛ zu.

19 Nu nɔpɛ ge la ʋaa é ʋa ɗa-looɠogi zuɠoloɠolo.

Nu mɔinmɔin ka ʋa è ʋɔ, ti kpɔbai ɠaiziɛ.

20 Kɛlɛ nu ɲɔiti gaaɓelagi ɠa ga ti-ɠaazuʋɛ za su,

ti-lɔɔɠuzu la ɠɛa ná,

ta-ɠito gila kpegi ɠa ɠɛ ga ti za.»