Zɔɓe 34

1 Eliyu kpɔɛi zeɠeni ʋolu, é ɠɛ ma:

2 «Ɠima nuiti, à woilo gòoiti ma!

Wɔiti wo ɠigai, à woilo gòoiti ma!

3 Mazɔlɔɔ nu woiyeɠei ɠa ɗa wooiti zɔɠɔzuɠa,

eɠɛʋelei nu laaɠoozuʋɛ daamianigiti ta-nɛɛi yɔɠɔzuɠaazu la.

4 Fai sɔlegai, de naa yeeɠaaɠwɛ lɛɛ da ɓɔɠɔi.

Nii pagai, de ɠɛ naa ɠwɛɛ da ɓɔɠɔi.

5 «Wɛlɛ nii Zɔɓe ɠisiɛzu su:

‹Nà ga telebo nu, kɛlɛ GALA ge la nà-sɔle fai tanɔpɛ pɛtɛsu.

6 Anɛɛ tèlebogɛ, gè levea ga zɛɛ nu.

Gè la tɔ koloɠoloni, kɛlɛ gè wɔa ga mɛɛinti.›

7 «Nu ɠa ná nɛi nii kulaai ga Zɔɓe,

nii é ɲɛɛɠulasui ɓɔlezu, eɠɛʋelei nu a ziɛi ɓɔle la,

8 ta faa ɲɔu ɠɛ nuiti ka ti siɛpolui zu,

ti ɗa ziɛ ʋɔɔma ta nu ɲɔiti?

9 Mazɔlɔɔ tɔ ɓɔɠɔi boni, é ɠɛ ma: ‹Toɠa ga wafuun faa

nu ʋa ɠaaɓa ga é GALA ɛnɛkɛ.›

10 «Wɔi ɠi pagɔi wo ma, à woilo gòoi ma!

GALA ge la zooga faa ɲɔu ɠɛɛzu pɛ,

Zɛbɛi-Pɛ-Maliɠii la zooga ɠɛɛzu ga telebotala ɠɛ nu.

11 Mazɔlɔɔ toɠa ɗa nui ɠilagilagi zala é zoloo ná-kɛɛwotiiti ma,

é ɛsɛ gilagilagi zo eɠɛʋelei siɛ ʋelei la.

12 Gaamai zu, koleʋɛ ga GALA ge la ɗa ga faaɠaaza kɛa,

kaipa, Zɛbɛi-Pɛ-Maliɠii la ɗa ga telebotala ɠɛa.

13 Taɠili ka ná, bɔɔlɔai, é eteai ma masadai vea GALA zea ɓaa?

Ɓɛ ɠa é eteai ɠalivaai ma?

14 Ni GALA ge ɠɛni ɠigaiziɛzu ɓɔɠɔ nɔ zu,

é ná-Zɛnvui ta ná-fiilɛiti gaaʋote ɓɔɠɔ nɔ ma,

15 kpɛtɛaniiti pɛ undaa ɠa ʋili ʋɔɔma,

nuɓusɛi ɠale ma fufiligi zu.

16 «Ni è ɠeleɠelegɛ, woilo dɛɛ nii ma,

ɠida lɛɛ dàawooiti bu.

17 GALA ka zoo nɛi, é zei eteai unda ɓaa, ni é la wɔinni ga sɔledai?

Ɗa yiilɔɔzu è naa ʋeelala, nii zobogi tɔ ɠila kpe zea, sɔlegai?

18 Ɗa zoo è ɠɛ masagi ma: ‹Nu ɲakai,›

è ɠɛ nu wolaiti ma: ‹Faa ɲɔu ɠɛ nuiti›?

19 GALA ge la ɗa ga loga kundiɠia ʋolu yɛ,

é la kpɛtɛ nu vizɔga bala nu ʋa.

Tɔɔzei tɔ ɠa é ti felegɔ pɛ kpɛtɛa.

20 Gaamago nɔ, saai ʋaa, kua zaamai,

nuɓusɛi ɓakaga, undaaʋili,

ti zobobɛ nui ɠula ɓɔɠɔ zaama lɛilaa nɔ.

21 Mazɔlɔɔ GALA ka wɛlɛzu nuiti siɛ ʋeleiti ba,

toɠa ti-ziɛzuʋɛti pɛ pɛtɛsu.

22 Ma ɓidii la ná, ɓaa kpidi ɓɔii,

nii a pele leʋe tuɠɔ ga é mina faa ɲɔu ɠɛ nuiti ka.

23 «Ungo, GALA kpɛdɛ la ba ga é lɛbi nui zumɔsu ɠeke, é ʋa leɠa tukpɔ.

24 Toɠa ɗa zobobɛ nuiti koloɠolo, kpɛdɛ la ba ga é faa wuuɓɛ naazu,

é taɠiligaa zei ti-ʋotogi zu.

25 Mazɔlɔɔ é ta-ɠɛɛwotiiti zɔɠɔzuɠwɛɛ.

Toɠa ti lokasu, é ti lɛɛvɛ kpidi ɠila nɔ.

26 Toɠa ɗa ti loɠa kɛlɛzu eɠɛ nu ʋaa nua.

27 Ti ʋoluavega tɔun ba,

ti ná-kala gooiti kɛ ga ɠwɛɛtala zu vaa.

28 Mazɔlɔɔ ti yɛga su, bala nuiti kpain gooi lɛa naa ʋɔ bɛ,

é maanɔɠɔ nuiti ta-ɓee wooi mɛniga.

29 «Zenɔ ɠana é la, ni GALA ka maaɠɛna kpɔ, ɓɛ ɠa a peelala?

A ɠɛna pɔ é lɔɔɠu, ɓɛ ɠa a ka, anɛɛ naa ʋe?

Naa ɠa ga gaama zii ɠiligiti faa ma, ta nuiti kpein,

30 nii a kɛ telebotala nui mina masada ɠɛ,

é ʋa ɠɛ ga balii nuɓusɛiti bɛ.

31 «Tanisu nui ɠa nii wo GALA ma ga:

‹Gè nà-maaɠoloi zɔlɔɔga, gè la mɔ ɠɛa ga faa ɲɔu ɠɛ nu eyɛsu pɛ.

32 Nii gè la dɛ kaani, ɗɔun naa lɛɛlɛ ga ze.

Ni gè faaɠaazagaa ɠɛɛʋɛ, gè la mɔ naa ta ɠɛa ʋolu pɛ.›

33 GALA maanɛɛʋɛ é sala?

È ɠisu vai ɠa ga leeni, deɠɛmu? Ɗa ɲɛɛɠulazu GALA su.

Tɔɔzei ɗa ɠa è devei wosu, nà laade, è ɠisu vai wo!

34 «Gi zoloogɛ ma gá ɠi pagɔ nuiti, ta ɓɔga ɠima nui, niiti ti woilosu gòoi ma:

35 ‹Zɔɓe ɠa ɓɔɛzu, é la gaaɠaazu,

ná-kpɔɛ wooiti ta keleɠeletalai lɛɛzu.

36 Ná-ʋoluɠulai maanɛɛʋɛ é zeeli kwɛgi ma,

tɔɔzei toɠa gooɠaaʋotegi veezu eɠɛ telebotala nu.

37 Toɠa kpakagi ɓɔsu ná-faaɠaazagi ʋa,

é inɛinɛgi lɔ ade zu.

Ná-kpɔɛzuɠulai mɔinʋɛ GALA daalɔɠɔma.› »