1 «Ungo, gaamazu, naati kpein, gè ti ɠaani ga nà ɓɔɠɔi gàazuʋɛ.

Gè ti mɛnini ga nà ɓɔɠɔi gòiyeɠeiti, gè ti ɠaaɠa ga pagɔ.

2 Nii wo kwɛɛ, gè naa ɠwɛɛ nà ɓalaa,

gè la kula bu wo ʋɛ ga tago ɓalaa.

3 «Kɛlɛ Zɛbɛi-Pɛ-Maliɠii ɠa gè wɔinni gè ɓɔɛ pɔ,

GALA ɓɔɠɔi ɠakalaʋɛ ɠa gè pɔ gè ɓɔɠɔ maalobo ná.

4 Wɔun wa, bɔ̀ɔlaiti, zɛɛi ɠa wo kpɛtɛzu,

wo kpein wa ga zɛɛ zale ɠula nuiti.

5 A la vizɔ wo ma, wo maaɠɛ kpɔ suɠila!

Wa la ɠɛ ga ɠima nuiti.

6 Nà wo maanɛɛnɛzu, à woilo nà-kpaazaɠa wooi ma,

wo ɠida tùkpɔ wooiti bu.

7 Wa ɠisiɛzu ga GALA ka wo botii ɠɛɛzu bɛ ga faa maaʋegai?

Wa maalobosu ga kazemazu vaiti ɓaa?

8 Wa pɔ wo lo GALA polu?

Wa pɔ wo daalukpɔi lo bɛ?

9 Ni a ɠɛna é wo vɛɠɛlɛfɛɠɛlɛ, toɠa ɠɛ nɛi ga faa ʋagɔ wo ʋɛ?

Nu la GALA yaava, eɠɛʋelei nu a nui yaava la.

10 Gaamazu, toɠa zeliiti to wo ma,

ni topolu ɠa wo kɛɛzu dɔɔɠuzu.

11 Wo la luazu GALA ná-maayikii ʋa ɓaa?

Maaluai é bosu, naa la wo zasuɓalizu ɓaa?

12 Kalagi niiti wo lɛɛzu ti ma kenein kenein, ta-ɠulanumai wola lɔiʋɛ eɠɛ zuʋui,

wa-wooɠaaʋotegiti ta ga aniiti ti ɓɛtɛai ga penɛi.

13 «À maaɠɛ dɛɛ kpɔ, wo ɓe bà! Nà ɠa gè pɔ gè ɓɔɛ!

Nii a ɠɛ ga ze, naa ɠɛ ga ze.

14 Nà ziiɠulakoozui ɠɛɛzu,

gè ɠikula zɛ̀nvui zu.

15 GALA ge pàa, ni naa ɠa é pɔ, kito nɔpɛ ge la mɔ bɛ̀.

Kɛlɛ tɔun gaazu, nà sìɛ ʋelei maalobo.

16 Tɔun vɔlɔ, naama ɠɛʋelei mu ka zoo é kìzo.

Mazɔlɔɔ woovele nu nɔpɛ ge la lɔɔzu zɔlɔɔga tɔun pɔ bɛ.

17 À woilo naa ma fɔɔn, nii gè ʋaazu bosu.

À ɠida bu, gòoiti poluʋɛ lɔ wo woizu ga pagɔ.

18 Mazɔlɔɔ kɛ̀ʋele ɓɛtɛʋɛ ga gè ɓɔɠɔ maalobo.

Gè kwɛɛ ga nà-gaamai ʋe.

19 Ɓɛ ɠa é wɔinni é sàkpe názu?

Kɛ̀ʋele ɓɛtɛʋɛ, ni gè la ʋeeni, gè maaɠɛ kpɔ ta gè za.

20 «Nà-GALAGI, faa felegɔ nɔ ɠa gè ɠɛ è kɛ bɛ̀,

nà zoo naazu gè ɠula kɛlɛma è ʋɛ.

21 Mɔunpa, è-yeei é wuizu mà gola, naa zeɠe màazu,

mina mɔ ɓe maalua ɠasɔi ʋa, é ʋa gàalua.

22 Naa ʋolu, ɓɔɛ pɔ̀, nà è wooɠaaʋote,

ɓaa mu nà ɓɔɛ, è gòoɠaaʋote.

23 Faaɠaaza golai, dielegɔ ɠa gè kɛai, ta kotoi?

Nà-kotoiti dɛɛ ga ze, ta nà-tɔ koloɠologiti.

24 Leeni vaa zu è ɠaazulɔɔɠuzu bà,

è ɗa pɛ̀tɛ ga è zili nu?

25 Ɗa pɔ è daai ɲiikpi, nii é ɓalizu?

Ɗa pɔ è ʋilɛ daa vɔɔi ʋolu, è kpɛ?

26 Mazɔlɔɔ ɗa tùkpɔɠaaleʋezu ga woo wanaiti,

è ɗa nà-nu niinɛlai ma vaaɠaaza golai ma ɠasɔiti da ùnma.

27 È kɔ̀ɠɔ felegɔiti pɛ gilia ga kɔlui,

è ɠaazulo bà kpaan sìɛ ʋeleiti pɛ su,

è ɗa kɔ̀ɠɔʋo gaiziɛ.

28 Nuɓusɛi zu ɠa lulusu, eɠɛ gului duulai,

eɠɛ seɠei ɓaɠaɓaɠai miizu.»