1 Eliyu kpɔɛzuɠulani ʋolu, é ɠɛ ma:

2 «Zɔɓe, ɗa-ɠaama ɠa è su ɓaa, siɛgi zu è bosu la ga:

‹Ungo, tèlebogɛ GALA ba›?

3 Mazɔlɔɔ ɗa ɠɛɛzu ma: ‹Lee ɠulanuma ɠa é naa zu è ʋɛ?

Toɠa leeni ʋaa mà, ni gè la koto ɠɛɛni?›

4 Nà ɠa gè è wooɠaaʋotesu,

wa ɓɔga è-wɔɔlaiti ʋɔɔma.

5 «Geeɠɔlɔgiti pɛtɛ dɛɛ.

Tonaɓiingiti pɛtɛ, ta zɛlɛni è maazu poun!

6 Ɗa faa ɲɔi ɠɛɛna, naa ɠa GALA kpɔlɔzu ɠale?

Siɛgi zu è tɔ koloɠologi zuwɔɔlɔzu la, naa ɠa leeni ɠɛɛzu la?

7 Ɗa ɠɛna ziaa ga pagɔ, leeni ɠa è feezu zea naazu?

Leeni ɠa é sɔlɔɔsu è ya?

8 Kɛlɛ ɗa-nu ɲɔulai è kɛɛzu, naa ɠa è-wɔɔla nuɓusɛi tanɔ ɓɔlɔ,

ɗa-lelebodai ɠa ɓɔ è-wɔɔla nuɓusɛi tanigaa nɔ ʋa.

9 «Wɔinzeɠemai a wɔɔlɔna, nuiti ta ɗa kpeei loo,

ti ɓɔɠɔ maaloli bo zɛbɛsu nuiti ta-zeiungai laalɔɠɔma.

10 Kɛlɛ nu nɔpɛ ge la ɠigaiziɛzu, é ʋa ɠɛ ma:

‹GALA ka mini, nii é kpɛ̀tɛni,

nii é koozunɛ wuyeiti feezu zèa kua zaamai?

11 Tɔ ɠa é de ɠalasu, é leʋe dɔɓɔ zuaiti ba,

é ɠimalai ve de ʋɛ, é leʋe wɔniiti ba.›

12 Naazu kpeei ɠa loozu, kɛlɛ GALA ge la gooɠaaʋote feezu,

faa ɲɔu ɠɛ nuiti ta-wasogi maaʋele ma.

13 Ungo, ta kpeei loozu wafuun, GALA ge la woiloga ma,

é la Zɛbɛi-Pɛ-Maliɠii ɠaazu ga faa nɔpɛ.

14 Toɠa è wooɠaaʋote ɠale, ɗɛi è ɠisiɛzu ga è la kaazu,

ɗa maaɓɔunsu yeenɔpɛ, tɔɔzei è è-maavaiti daa bɛ.

15 Tɔɔzei ná-ziiɠaawanai la dɛ losuʋɛ ɠɛɛni,

kɛai eɠɛ ná-faa la kpaka fai zu,

16 Zɔɓe ná-kpɔɛzuɠulai kpein ka nɔ ga fiilɛi,

toɠa kpɔɛzuɠulai mɔinzu, é la kwɛɛ nii é bosu.»