1 «Gè tɔgi zeini gàazuʋɛ ma

ga é mina gaazuɠulapɔ wɛlɛ wo anzalopo ʋa.

2 Ni naa laade, leeni ɠa nà la sɔlɔɔ faa maaɓɔun

GALA Zɛbɛi-Pɛ-Maliɠii ya, nii é geezuʋɛ?

3 Tɔɔzei maanɔɠɔi la makɛni telebotala nuiti bɛ ɓaa,

ta nimizai naati bɛ, niiti ti faa ɲɔi ɠɛɛzu?

4 GALA ge la sìɛ ʋelei ʋɛtɛsu nɛi ɓaa?

É la kɔ̀ɠɔlo daa ɠilagilagi pɛ gaalusu ɓaa?

5 «Zɛɛi ɠa nɛi gè ɠɛa ziɛzu su?

Kɔ̀ɠɔ zu ɠɛa vilɛzu ga gè li kakama vaa ɠɛɛzuʋɛ?

6 GALA ge kɔ̀ɠɔ telebo kilo ɠa,

é ɠɛ nà-sɔledai ɠwɛɛ!

7 Ni kɔ̀ɠɔi zeɠeni pele ʋagɔi ma,

ni zìi ʋilɛni nà-gaazuɠulapɔ vaiti polu,

ni zèeiti kɔzɔʋɛ ga kɛɛwoti ɲɔi ta,

8 naazu nii gè fazasu, taɠili ge naa mi,

niiti gè ti ziinni, taɠili ge naati tɔɔɠula.

9 Ni gè looni anzanu lɛga zu,

gè li, gè ɗa maaʋɛɛnɛ seiɲɔɠɔi ná-pɛlɛlaʋɛ,

10 naazu ànzai boti ɠɛ nu ɠili bɛ,

nuiti ti-yiimai ɠɛ su!

11 Mazɔlɔɔ maaɓoo vaa ɠana, ɲamaba vaa ɠana,

nii tukpɔɠaaleʋe nuiti ta ɗa ma lukpɔi ɠaaleʋe.

12 Nà-faaɠaazagi a la ɠɛ ga abui, a la gàla, eyɛsu é kòloɠolo,

é naa kpein koloɠolo, nii gè sɔlɔɔni.

13 «Nà-botiɠɛ zunui ta, ɓaa nà-botiɠɛ anzanui ta, a la ɓaazaɠana mà,

gè ɓena gaaɠula ba, gè maalobo.

14 Ni naa laade, leeni ɠa nà kɛ, siɛgi zu GALA ge wuzeɠezu la ga é tùkpɔ?

Gè la zooga gè ʋa gooɠaaʋote, ni a ɠɛna gè ʋoluvaawo ma.

15 Zɔi é kpɛ̀tɛai dèe ɠoozu, tɔun taade é ʋa ti ɓɛtɛ ɓalaa ɓaa?

Ungo, ma GALAGI ɓɔɠɔi nɔ ɠa é gi kpein kpɛtɛni gi-lee ɠoozu.

16 «Yeelɛ ɠa gè ɠɛlɛni la maawɔin nui ná-kpɔba vaa ʋa,

ɓaa gè poanzai yɛ ná-kitotalai zu?

17 Anɠɛ nɛi nà ɠila ka gè ɠɛni nà-daamianigi miizu,

podoin la ta miini?

18 Tɔun é zo mà loungo ziɛgi zu ma,

bɔɔlɔʋɛ zèa, eɠɛ ɠɛɛɠɛi.

Siɛgi kpein su gè ɠɛni poanzai lɛnɛ nui.

19 Kaipa gè maawɔin nu ɠaa ʋɛ, gè zɛ seɠe ʋalagi zu,

ta bala nui gè naa yɛ pɛɛmazeɠe ʋalagi zu?

20 Ɓa-o, tɔun ti ɠɛni tuya loozu bɛ̀,

tɔɔzei gè ɠɛni seɠei veezu ti ya nii su ɓadiai, kpɛtɛai ga nà-baalagiti maaleɠai.

21 Ni nà ɠɛna podoun maaluani tukpɔɠaaleʋezuʋɛ

tɔɔzei gè kwɛɛ ga tukpɔɠaaleʋe nuiti ta ga nà-poluzeigiti,

22 kpàkigi ɠula pòluzaamaʋɛ ʋa,

ta zèei ɠula zeeɓoɓolaʋɛ ʋa, é ɠaleɠale!

23 Mazɔlɔɔ nà luazu maanɔɠɔi ʋa, nii GALA ge teʋeni,

maayikiʋɛ, gè la zooga gè ʋa lo tuɠɔ.

24 «Gè ɠitoni nɛi zanugi ʋa? Ɓaa gè ɠɛ ma: ‹Dɔ̀ɔɠuzuʋɛ ɠa!›

25 Gè la ɠɛni ɠoozunɛɛni nɔ zèaɠɔligiti mɔin vai zu,

naavoloiti gè ti zɔlɔɔgai ga zèei.

26 Siɛgi zu gè foloi ʋɛtɛni da, é ɗa volo ná-keɠaaɓaai zu,

ɓaa siɛgi zu gè alugi ɠaani la, é ɗa ziɛ geezuʋɛ ná-maayikii zu,

27 gè ɠakani zìimaʋɛ dɔɔɠuzu,

gè ʋa yeeʋɛɛ la, ga gè nɔkɔ ti wu ɓaa?

28 Kaka faa ɠana, nii maanɛai é lukpɔ.

Nà la ɠɛlɛ GALA ba, nii é geezuʋɛ.

29 «Yeelɛ ɠa gè ɠɛni ɠoozunɛɛzu la, ga gè sìli nui ɠaa dɔai maanɔɠɔi zu,

kòozunɛ, tɔɔzei faaɓaagi zeelia ma,

30 nɛ̀i gè la vaani bu pɛ nɛ̀gi ʋa koto ɠɛ,

ga gè ʋa foovo, gè ɠɛ GALA ma, é za.

31 Ɓɛ ɠa gè la kɔnɔkulani ga suai, é ʋa yiɠo?

Niiti kpein gè ti laazuʋɛɛni, naati ta naama zeele wooi wo.

32 Wɛɛn la ɲiini etea,

gè nà-pɛlɛi laalaoni siɛ wo nuiti bɛ.

33 Eɠɛʋelei nuɓusɛ mɔinmɔin ga ɗa kɛ la,

gè nà-tɔ koloɠologi lɔɔɠuni nɛi ɓaa?

Gè ɠɛlɛ ga gè mina nà-faaɠaaza golai ɠwɛɛ?

34 Kaipa gè la luani nui zɔiti ta-lukpɔɠaaleʋei ʋa.

Ti ɠɛni zoosu ti ɲɛɛɠula sù, naa la ɠɛni màaluazu,

naa la dàaɠuluni kaipa,

ɓaa é ʋa pele ɓesa tùɠɔ ga gè mina ɠula.

35 «Ee, ni nu ɠɛni bɛ̀, nii é woilosu gòoi ma!

Gòo ɠaaɓelagi ɠana!

GALA Zɛbɛi-Pɛ-Maliɠii ná-gooɠaaʋotegi ve zèa.

Nii é ga maalɔɔ vai sìli nui sɛʋɛai,

36 nà naa laazu ɠɔma, gè dɔ ùnba eɠɛ masa bɔɔlɔgi.

37 Nà ʋoluvaawo ma ga nà-kɛɛwotii ɠilagilagiti pɛ,

gè li tɔun pɔ bɛ eɠɛ masa!

38 Ni nà-zooiti ti pèelalani,

ni gè ta-wozawoliaiti gaawɔlɔni,

39 ni gè ti-ʋaalɔnɔgiti miini nɔ, gè la ti ɠeyani,

ni gè naati nimizani, niiti ti ɠɛni ti botii ɠɛɛzu,

40 adaʋɛ moloi naa ná, nii é ga ɓeleegi, ɠaingiti ti ʋɔnɔ miná,

ta moloi nii daa ga wɔɔlezegi, gui ɲɔi ʋɔnɔ naa ʋotogi zu!»

Zɔɓe ná-kpɔɛiti kwɛsuʋɛ ɠa.