1 ታኒ ክርስቶሳ ሌምሱዋ ካለይሳዳ፥ ህንተካ ታና ካልተ።✝

2 ህንተ ኡባባን ታና ቆፕያ ግሾነ ታኒ ታማርስዳ ትምርትያ ምንድ ናግዳ ግሾ ታኒ ህንተና ጋላታይስ። 3 ሽን ክርስቶስ አደ ኡባስ ሁጰ፥ አደይ ማጫሳስ ሁጰ፥ ቃስ ፆሲ ክርስቶሳስ ሁጰ ግደይሳ ህንተ ኤራና መላ ኮያይስ። 4 ባ ሁጵያ ጉሉንትድ ፆሰ ዎስያ ዎይኮ ትንብተ ኦድያ አደይ ኡባይ ሁጰ ግድዳ ክርስቶሳ ቶቼስ። 5 ባ ሁጵያ ቃጮና ፆሰ ዎስያ ዎይኮ ትንብተ ኦድያ ማጫስያ ሁጰ ግድዳ ባ አዝና ቶቻዉሱ። ባ ሁጵያ ቃጮና ማጫስያ ባ ሁጵያ ሜደትዳ ማጫሳ መላ።

6 ማጫስ ባ ሁጰ ካሞና እፅኮ፥ ባ ሁጵያ ቃንፀቶ። ሽን እዉ ሁጰ ቃንፆይ ዎይኮ ሜዶይ ቦርሶ ግድኮ፥ ባ ሁጵያ ቃጮ። 7 አደይ ፆሳ ሌምሶነ ፆሳ ቦንቾ ግድያ ግሾ፥ ባ ሁጵያ ካማናዉ በሰና፥ ሽን ማጫስ አደስ ቦንቾ።✝ 8 ማጫስ አደፈ መታሱፐ አትሽን፥ አደይ ማጫሳፐ መትቤና።✝ 9 ማጫስ አደስ መትስፐ አትሽን፥ አደይ ማጫሳስ መትቤና። 10 ሀይሳ ግሾነ ኪታንቾታ ግሾ ማጫስ ባዉ ማት ደኤይሳ በሲያ ማላ ባ ሁጰን ቃጫናዉ በሴስ።

11 ሽን ጎዳ ቆፋን ማጫስ አደይ ባይና ዴና፤ አደይካ ማጫስ ባይና ዴና። 12 ማጫስ አደፈ መትዳይሳዳ አደይካ ማጫሳፐ የለትስ። ሽን ኡባይካ ፆሳፈ መትስ።

13 አነ ህንተ ፕርድተ፤ ማጫስ ባ ሁጰ ካሞና ፆሳ ዎሳናዉ በሲ? 14 አደይ ባ ሁጵያ ድችኮ እያዉ ቦርሶ ግደይሳ ሀር አቶሽን መተ ህንተና ታማርሰኔ? 15 ሽን ማጫስ ባ ሁጰ ድችኮ እዉ ቦንቾ ግደኔ? ማጫሳስ ሁጰይ እመትዳይ እያ ባና ካማና መላሳ። 16 ሽን ሀይሳ ቦላ ፓላማናዉ ኮያ አስ ደእኮ፥ ኑስ ግድን ዎይኮ ፆሳ ዎሳ ኬታስ ግድን ሀይሳፈ ሀራ ዎግ ባዋ።

17 ህንተ እስፈ ሺቀይ ጎአስ ግዶናሽን ቆሆስ ግድያ ግሾ፥ ሀእ ታኒ እምያ ኪታን ህንተና ናሽከ። 18 ታኒ ኮይሮ ስእዳይ፥ ዎሳ ኬን ሺቅያ ዎደ ህንተ ግዶን ሻከተ ደኤይሳ። ሀ ታ ስእዳይስ ቱማ ግደይሳ አማናይስ። 19 ህንተ ግዶፈ ቱም ደኤይሳት ኦናንተኮ ኤረታና መላ ህንተ ግዶን ሻሆይ ዳናይስ አተና። 20 ህንተ እስፈ ሺቅያ ዎደ ህንተ ሺቀይ ጎዳ ካሁዋ ማናሳ ግደና። 21 ህንተ ካ ምያ ዎደ እሶይ እሱዋ ናጎና ባይሳ ባይሳ ምያ ግሾ፥ እሶይ ኮሻቴስ ሀንኮይ ቃስ ማቴስ። 22 ቱማ ህንተ ማናዉነ ኡያናዉ ህንተዉ ኬ ባዌ? ዎይኮ ፆሳ ዎሳ ኬ ካቲ? አይኮይ ባይና ማንቆታ ዬላየቲ? ታ ህንተና ዎይጎ? ሀይሳስ ታ ህንተና ናሾዬ? ናሽከ።

23 ታኒ ህንተዉ እምዳ ትምርትያ ጎዳፐ ኤካስ። ጎዳይ የሱሲ አድ እመትያ ቃማ ኡይ ኤክድ፥ 24 ፆሳ ጋላትስ። ኡይ ባድ "ሄእተ፤ ሚተ። ሀይስ ህንተዉ እመትያ ታ አሹዋ። ሀይሳ ምሸ ታና ሀሳይተ" ያግስ። 25 ሄሳዳካ፥ ካሁዋ ምድ ስምን፥ ፁኣ ኤክድ፥ "ሀይስ ፁአይ ታ ሱን ኤቅያ ኦራ ጫቁዋ። ህንተ እያፐ ኡያ ዎደ ኡባን ታና ሀሳይተ" ያግስ።✝ 26 ህንተ ሀ ኡይ ምያ ዎደነ ሀ ፁአ ኡያ ዎደ ኡባን ጎዳይ ያና ጋካናዉ እያ ሀይቁዋ ኦዴታ።

27 ሄሳ ግሾ፥ በሶና ኦገን ጎዳ ኡይ ምያ ዎይኮ ጎዳ ፁአ ኡያ ኦንካ እያ አሹዋነ ሱ ቶችዳ ግሾ ባ ናጋራን ኦይሸቴስ። 28 ሽን አስ ባና ፓጮ። ያትድ ኡይ ሞ፤ ፁአፐ ኡዮ። 29 ጎዳ አሹዋባ ሻክድ ኤሮና፥ ኡይ መይነ ፁአፐ ኡየይ፥ ባ ቦላ ፕርዳ ሜስነ ኡዬስ። 30 ሄሳ ግሾ፥ ህንተ ግዶፈ ዳሮት ዳቡርዶሶና፤ ሀርግዶሶና፤ ቃስ ኡንደና አሳት ሀይቅዶሶና። 31 ሽን ኑኒ ኑና ፓጭድ በእዳባ ግድያኮ፥ ኑ ቦላ ፕርደታናሽን። 32 አላመይ ፕርደትያ ዎደ ኑኒ አላምያራ ፕርደቶና መላ ሀእ ጎዳይ ኑና ሴሬስ።

33 ሄሳ ግሾ፥ ታ እሻቶ፥ ጎዳ ካሁዋ ኤካናዉ ህንተ ሺቅያ ዎደ እሶይ እሱዋ ናግድ ኤክተ። 34 ህንተ ሺቆይ ፕርዳስ ግዶና መላ ኮሻትዳ ኦንካ ደእኮ፥ ባ ሶን ሞ።

አትዳባ ታኒ ያ ባዳ ህንተዉ ኦዳና።