1 ታኒ አሳ ቃላነ ኪታንቾ ቃላ ኦደታናዉ ዳንዳእኮካ፥ ታዉ ሲቆይ ይኮ፥ ጮ ጊርያ ዳላ መላ። 2 ትንብተ ኦድያ እሞት ታዉ ደእኮካ፥ ፁራ ኡባ ኤርኮካ፥ ኤራተ ኡባይ ደእኮካ፥ ቃስ ደርያ ደንድ ሀራሶ ኤፍያ አማኖይ ታዉ ደእኮካ፥ ሲቆይ ይኮ፥ ታ አይኮካ ግድከ።✝ 3 ታዉ ደእያባ ኡባ ማንቆታስ እምኮካ፥ ሀር አቶሽን፥ ታና ታማስ አ እምኮካ፥ ሲቆይ ይኮ ታና አይኮካ ማደና።

4 ሲቆይ ዳንዳአንቾ። ሲቆይ ኬሀ። ሲቆይ ቃናተና። ሲቆይ ጬቀተና። ሲቆይ ኦቶረና። 5 ሲቆይ በሶናባ ኦና። ሲቆይ ኡዘተና። ሲቆይ ይሎተና። ሲቆይ ባ ቆሆ ፓይደና። 6 ሲቆይ ቱማን ኡፋይተስፐ አትሽን፥ ዎርዶን ኡፋይተና። 7 ሲቆይ ኡባ ዳንዳኤስ፤ ኡባ አማኔስ፤ ሎኦባይ ሀናና ግድ፥ ኡፋይሳን ናጌስ፤ ኡባ ገንጬስ።

8 ሲቆይ ዉርሰ ጋካናዉ የና። ሽን ትንብተይ አታና፤ ዱማ ዱማ ዶናን ኦደተይስ አታና፤ ኤራተካ አና። 9 ኑ ኤራተፈ ጉ ኤሮስ፤ ትንብተፐ ባጋ ኦዶስ። 10 ሽን ፖሎ ግድዳይስ ያ ዎደ ፖሎ ግዶናይስ አታና።

11 ታኒ ናአ ደእያ ዎደ ናአዳ ሃሳይስ፤ ናአዳ ቆፓይስ፤ ናአዳ አኬካይስ። ታ ካሃምዳ ዎደ ናአተ ሀኑዋ አጋስ። 12 ሀእ ፖኦይ ባይና ሶን ማስቶተን በኤይሳዳ በኦስ፥ ሽን ሄ ዎደ ኑ ቆንጨን በአና። ሀእ ኑ ኤራተፈ ጉ ኤሮስ፥ ሽን ሄ ዎደ ፆሳይ ኑና ኤረይሳዳ ፖሎ ኤራና።

13 ህዛ፥ አማኖይ፥ ኡፋይስነ ሲቆይ፥ ሀ ሄት ኤቅድ ዳና። ሽን ሀይሳታፐ አይ ሲቆ።