1 ሳሜላ ማፃፋ 12

ሳሜላ ዉርሰ ሃሳያ

1 ሳሜል እስራኤለ ኡባኮ፥ "ህንተ ታዉ ኦድዳ ኡባ ስአዳ፥ ህንተ ቦላ ካዎ ካዎስ። 2 ሀእ ህንተና ካለናዉ ካዎይ ደኤስ። ታኒ ዳሮ ጭማዳ ፑሉማስ፤ ታ ናይት ህንተራ ደኦሶና። ታኒ ታ ናአተፈ ዶማዳ ሀች ጋካናዉ ህንተና ካለስ። 3 ሄኮ፥ ታኒ ህንተ ስንን ኤቃስ፤ ጎዳ ስንንነ እ ትይዳ ካዋ ስንን ታ ቦላ ማርካትተ። ታኒ ኦደ ቦሩ ኤካድና? ኦደ ሀረ ኤካድና? ኦና ጭማድና? ኦና ኡንኤድና? በአሸ በኦናዳ ሀናናዉ ኦደፈ ዎፈ ኤካድና? ሀይሳታፐ እሱዋ ታኒ ኦዳባ ግድኮ ታዉ ኦድተ፤ ታ ቃንፃና" ያግስ።

4 ኤንቲ ዛሪድ፥ "ኔኒ ኑና ጭማባካ፤ ዎይኮ ኑና ኡንኤባካ፤ ነ ኦደ ኩሸፐ አይባካ ኤካባካ" ያግዶሶና።

5 ሳሜል፥ "ህንተ ታ ኩሸን አይ ባላካ ደምቦናይሳ ጎዳይነ እ ትይዳ ካዎይ ሀች ህንተ ቦላ ማርካ" ያግስ።

አሳይ፥ "ኤ፥ ፆሳይ ማርካ" ያግዶሶና።

6 ቃስካ ሳሜል፥ "ሙሰነ አሮና ዶርዳይነ ህንተ ማይዛታ ግብፀፈ ከስዳይ ጎዳ። 7 ሀእ ህንተዉነ ህንተ ማይዛታስ ጎዳይ ኦዳ ፅሎ ኦሶ ኡባስ ታኒ ህንተነራ ጎዳ ስንን ሞተታና መላ ሀይሳን ኤቅተ። 8 ያይቆብነ እያ ሶ አሳይ ግብፀን ደእሽን፥ ግብፀ አሳይ ኤንታ ኡንኤዳ ዎደ ህንተ ማይዛት ጎዳኮ ዋስዶሶና። ጎዳይ ሙሰነ አሮና ኪትስ፤ ኤንቲ ህንተ ማይዛታ ግብፀፈ ከስድ ሀይሳን ዎዶሶና።

9 "ሽን እስራኤለ አሳይ ጎዳ ባንታ ፆሳ ዶግዶሶና። ጎዳይ ኤንታ ሀፆራ ቶራ ሞጮና ስሳራ ኩሸን፥ ፍልስፄመ አሳ ኩሸንነ ሞአበ ካዋ ኩሸን አድ እምን ኤንታ ኦልዶሶና። 10 ኤንቲ፥ ‘ኑኒ ናጋራ ኦዳ፤ ጎዳ አግድ፥ ባኣለነ አስታሮታ ጎይንዳ። ሽን ሀእ ነ ኑና ኑ ሞርከታ ኩሸፐ አሻ፤ ኑኒ ነና ጎይናና’ ያግድ ጎዳኮ ዋስዶሶና። 11 ጎዳይ ገድዮና፥*12:11 ገድዮና፦ እብራወ ዶናን የሩባኣላ ጌተቴስ ባራቃ፥*12:11 ባራቃ፦ እብራወ ዶናን ባዳና ጌተቴስ ዮፍታሄነ ሳሜላ ኪትድ፥ ህንተ ዩሾ ኡባን ደእያ ሞርከታ ኩሸፐ ህንተና አሽስ። ያትን፥ ህንተ ሳሮ ደእደታ።

12 "አሞነ ካዎይ ናኦስ ህንተኮ ይዳይሳ በእዳ ዎደ ጎዳይ ህንተ ፆሳይ ህንተ ካዎ ግድኮካ፥ ህንተ፥ ‘አካይ፥ ኑኒ ካዎ ኮዮስ’ ያግደታ። 13 ሀእ ህንተ ዶርዳነ ኦይችዳ ካዎይ ሀይስሽ። ሄኮ፥ ጎዳይ ህንተ ቦላ ካዎስ። 14 ህንተ ጎዳስ ያይኮ፥ እያዉ ኪተትኮ፥ እያ ቃላ ስእኮ፥ እያ ኪታ ቦላ ማካሎና እፅኮ፥ ህንተነ ህንተ ቦላ ካዎትያ ካዎይ ጎዳ ህንተ ፆሳ ካልኮ ኡባባይ ሱራና። 15 ሽን ህንተ ጎዳ ቃላስ ኪተቶና እፅኮነ እያ ኪታ ቦላ ማካልኮ፥ ጎዳ ፕርዳይ ካሰ ህንተ አዋታ ቦላ ይዳይሳዳ ህንተ ቦላካ ያና።

16 "ህዛ ምንድ ኤቅተ፤ ጎዳይ ህንተ አይፍያ ስንን ኦና ግታባ በእተ። 17 ሀእ ግስተ ጫካ ዎደ ግደኔ? ጎዳይ ዳዳነ እራ የዳና መላ ታኒ ጎዳ ዎሳና። ህንተ ካዎ ኦይችድ፥ ጎዳ ስንን አይ መላ ኢታባ ኦዳኮ ህንተ አኬካና" ያግስ።

18 ሳሜል ጎዳ ዎስስ፤ ጎዳይ ሄ ጋላስ ዳዳነ እራ የድስ፤ ሄሳ ግሾ፥ አሳይ ጎዳነ ሳሜላ ዳሮ ያይዶሶና።

19 አሳይ፥ "ኑኒ ካዎ ኦይችድ፥ ኑ ናጋራ ኡባ ቦላ ሀ ኢታተ ጉጅዳ ግሾ ኑኒ ነ አይለት ሀይቆና መላ ኑስ ጎዳ ነ ፆሳ ዎሳርክ" ያግስ።

20 ሳሜል አሳኮ፥ "ያዮፍተ፤ ህንተ ሀ ኢታተ ኡባ ኦደታ፤ ሽን ህንተ ኩመ ዎዛናን ጎዳስ ኪተትተ፤ እያ ካሎ አጎፍተ። 21 ፓናባ ግድያ ግሾ ማዶናነ አሾና ኤቃታ ካሎፍተ። 22 ጎዳይ ባ ግታ ሱን ግሾ ባ አሳ አገና፤ እ ህንተና ባ አሰ ኦናዉ ኡፋይቴስ። 23 ህንተ ግሾ ዎሳ አጋዳ ጎዳ ቆሆይ ታፐ ሃኮ፤ ታኒ ህንተና ሎኦነ ሱረ ኦግያ ታማርሳና። 24 ጎዳ ያይተ፤ ህንተ ኩመ ዎዛናን አማነትድ፥ እያዉ ኪተትተ፤ ህንተዉ እ ኦዳ ግታባ ሀሳይተ። 25 ሽን ህንተ ዛር ዛር ናጋራ ኦኮ፥ ህንተነ ህንተ ካዎይ ያና" ያግስ።