1 ሳሜላ ማፃፋ 28

ሳኦላነ ሞይትለ ፄግያ ማጫስዉ

1 ሄ ዎደ ፍልስፄመ አሳት እስራኤለታ ኦላናዉ ባንታ ኦላንቾታ ሺሽዶሶና። አንኩስ ዳዊታኮ፥ "ነነ ነ አሳት ታራ ኦላስ ባናይሳ ቱማ ኤራ ኡታ" ያግስ።

2 ዳዊቲ፥ "ሄሳ ግድኮ፥ ታ ነ አይለይ ኦናባ ነ በአና" ያግስ።

አንኩስ፥ "ዳሮ ሎኦ፤ ታኒ ነና ታ ደኦ ላይ ኡባን ታና ናገይሳ ኦና" ያግስ።

3 ሀይሳፈ ካሰ ሳሜል ሀይቅን፥ እስራኤለ አሳ ኡባይ እያዉ ዬክድ፥ እያ ካታማን ራማን እያ ሞግዶሶና። ሳኦል ሞይትለ ፄገይሳታነ ማሮታ እስራኤለ ቢታፈ የደድ ከስስ።

4 ፍልስፄመ ኦላንቾት ሺቅድ፥ ሱኔማ ካታማን ዱንካንዶሶና፤ ሳኦል እስራኤለ አሳ ኡባ ሺሽድ፥ ግልቦአ ዙማን ዱንካንስ። 5 ሳኦል ፍልስፄመ ኦላንቾታ በእድ ያይስ፤ እያ ዎዛናይ ዳሮ ዳጋምስ። 6 ሄሳ ግሾ፥ አይ ኦነኮ ጎዳ ኦይችስ፤ ሽን ጎዳይ አሙሆን ዎይኮ ኡሪመን✝28:6 ከሳ 28:30. ዎይኮ ናበታ ባጋራ እያዉ ኦድቤና። 7 ሄሳፈ ጉየ፥ ሳኦል ባ አይለታ፥ "ሞይትለ ፄግያ ማሮ ታዉ ኮይተ፤ ታኒ ኢኮ ባዳ እዮ ኦይቻና" ያግድ ኪትስ።

ሳኦላ አይለት፥ "ሞይትለ ፄግያ እስ ማሮይ ኤንዶራን ደአኡሱ" ያግዶሶና።

8 ያግን ሳኦል ባና ኤርሶና መላ ሀራ ማኦ ማእድ፥ ናምኡ አሳታ ኤክድ፥ ቃማ ሄ ማሬኮ ብድ፥ ማጫስዉ፥ "ሀያና፥ ታዉ እስ ሞይትለ ፄጋርክ፤ ታኒ ሱን ኦድያ አሳ ታዉ ደንርክ" ያግስ።

9 ያግን ማጫስያ፥ "ሞይትለ ፄገይሳታነ ማሮታ እስራኤለ ቢታፈ ሳኦል ዋት የደ ከስዳኮ፥ ቱማ ኔኒ ኤራሳ። ታና ዎሳናዉ ኔኒ ታዉ አይስ ፅሄ የጋይ?" ያጋሱ።

10 ያግን ሳኦል ማጫስዉ፥ "ደኦ ፆሳይ ኤርያ መላ፥ ኔኒ ሀይሳ ግሾ ሴረታካ" ያግድ ጎዳን ጫቅስ።

11 ማጫስያ፥ "ታኒ ነዉ ኦና ደን?" ያጋዳ ኦይቻሱ።

ሳኦል፥ "ሳሜላ ታዉ ደን" ያግስ።

12 ማጫስያ ሳሜላ በአዳ፥ ዋሶ ጎቻዳ፥ ሳኦላኮ፥ "ኔኒ ታና አይስ ጭማዲ? ኔኒ ሳኦላ ግድክ!" ያጋሱ።

13 ካዎይ፥ "ያዮፋ! ነዉ አይበ በንተይ?" ያግስ።

ማጫስያ፥ "እስ ሞይትለይ ቢታ ግዶፈ ከይሽን በአስ" ያጋሱ።

14 ሳኦል ማጫስዉ፥ "እ አይ ዳኒ?" ያግስ።

ማጫስያ፥ "ካባ ማእዳ እስ ጭማ አደይ ከይስ" ያጋሱ።

ሳኦል ሄ አደይ ሳሜላ ግደይሳ ኤርድ፥ እያ ስንን ሳአን ጉፋንስ።

15 ሳሜል ሳኦላኮ፥ "ታና ደንዳ አይስ ዋይሳይ?" ያግስ።

ሳኦል፥ "ታኒ ዳሮ ኡንኤታስ፤ ፍልስፄመ አሳት ታና ኦሎሶና፤ ፆሳይ ታፐ ሻከትስ፤ ናበታ ባጋራ ዎይኮ አሙሆን እ ታኒ ኦይችያባ ኦደና። ሄሳ ግሾ፥ ታኒ ኦናባ ነ ታዉ ኦዳና መላ ነና ፄጋስ" ያግስ።

16 ሳሜል፥ "ጎዳይ ሻከትድ ነዉ ሞርከ ግድኮ ታና አይስ ዞረ ኦይቻይ? 17 ጎዳይ ታ ባጋራ ካሰት ኦድዳባ ኦስ፤ ጎዳይ ካዎተ ኔፐ ኤክድ፥ ነ ሾሩዋ ዳዊታስ እሚስ። 18 ኔኒ ጎዳስ ኪተታቦና ግሾነ እያ ኤፅያ እያ ሸንያ አማለቃ ቦላ ፖላቦና ግሾ ጎዳይ ሀች ሀይሳ ነ ቦላ ኤህስ። 19 ነናነ እስራኤለ፥ ጎዳይ ፍልስፄመታስ አድ እማና፤ ነነ ነ አደ ናይት ዎንቶ ታናን ጋሄታና፤ ጎዳይ እስራኤለ ኦላንቾታ ፍልስፄመታስ አድ እማና" ያግስ።

20 ሳኦል ሳሜላ ኦዳ ስእድ ያይዳ ግሾ ዳቡርድ፥ ባና ዶግድ ሳአን ኩንድስ። ሳኦል ቃማነ ጋላስ ካ ምቦና ግሾ እያዉ ዎልቅ እፅስ። 21 ሄ ማጫስያ ሳኦላኮ ያዳ፥ እ ዳሮ ኮኮረይሳ በአዳ፥ "ታኒ ነ አይልያ ነዉ ኪተታስ፤ ኔኒ ታና ኦይችዳባ ታ ሸምፑዋ ዶጋዳ ኦስ። 22 ሀእ ታኒ ነ አይልያ ግያባ ሀያና ስአ፤ ኔኒ ማዳ ጋሽታዳ ነ ኦግያ ባና መላ ታኒ ነዉ ጉ ካ ጊግሳስ" ያጋሱ።

23 ሳኦል፥ "ሚከ" ያግስ። ሽን እያ አሳት ሄ ማጫሴራ ግድድ እያ ዎስዶሶና፤ ኤንታ ዎሳ ስእስ፤ ቢታፈ ደንድድ ሂፃን ኡትስ። 24 ሄ ማጫስያ ባ ሶን ደእያ አንቃራ ማራ ሹካሱ፤ ለ ኤካ ሙኑቃዳ፥ ኡይ ኡካሱ። 25 ያታዳ ካ ሳኦላስነ እያ አሳታስ አን፥ ኤንቲ ምዶሶና። ሄ ቃማ ደንድድ ብዶሶና።