ሳኦላነ ሳሜላ
1 ብንያመ ኮቸ ግድዳ እስ ቂሳ ጌተትያ አደይ ደኤስ፤ እ ኤረትዳ አስ። እ አብኤላ ናአ፤ አቤል ፃሮራ ናአ፤ ፃሮር ባኮራተ ናአ፤ ባኮራት ብንያመ ኮቸ ግድዳ አፌቃ ናአ። 2 እያዉ ሳኦላ ጌተትያ እስ ማላ ሎኦ ግድዳ ፓን ናእ ደኤስ። እስራኤለታ ግዶን እያ መላ ማላ ሎኦይ ባዋ፤ እ አስ ኡባይ እያ ሀሸፐ ጋርሳን አትያ አዱሳ አስ።
3 እስ ጋላስ ሳኦላ አዋ ቂሳ ሀረት ይዶሶና፤ ቂስ ባ ናኣ ሳኦላኮ፥ "ኦሳንቾታፐ እሱዋ ኤካዳ ሀረታ ኮያናዉ ባ" ያግስ። 4 ኤንቲ ደረይ ዳርያ ኤፍሬማ ቢታራነ ሻልሻ ቢታራ ኮይሸ አዶሶና፥ ሽን ሀረታ ደምቦኮና። ቃስ ሻአልማ ቢታራ ኮይሸ አዶሶና፥ ሽን ያንካ ሀረት ዶኮና። ብንያመ ቢታራ አዶሶና፥ ሽን ያንካ ደምቦኮና።
5 ኤንቲ ዙፋ ቢታ ጋክዳ ዎደ ሳኦል ባራ ደእያ ኦሳንቹዋኮ፥ "ሃያ፤ አነ ጉየ ስሞስ፤ አዋይ ሀረታባ ቆፐይሳ አግድ፥ ኑስ ህርጋና" ያግስ።
6 ሽን ኦሳንቾይ፥ "ሄኮ፥ እስ ቦንቸትዳ ፆሳ አስ ሀ ካታማን ደኤስ፤ እ ኦድያ ኡባይ ፖለቴስ። አነ ሀእ ያ ቦስ፤ ኦን ኤር ኑ ባና ኦግያ እ ኑስ ኦዳነኮ" ያግስ።
7 ሳኦል፥ "ኑ ብያባ ግድኮ እያዉ አይ እማኔ? ኑ ኦይክዳ ካይ ዉርስ፤ ኑ ፆሳ አሳስ እምያባይ ባዋ። ኑስ አይብ ደኢ?" ያግስ።
8 ኦሳንቾይ ዛሪድ፥ "ታ ኩሸን ጉ ብራ ሳንትመይ ደኤስ፤ ኑ ባና ኦግያ ኑስ ኦዳና መላ ፆሳ ኡራስ ሀኖ እማና" ያግስ።
9 (በን ዎደ እስራኤለ ቢታን እስ አስ ፆሰ ኦይቻናዉ ብሸ፥ "አነ ቆንጨ በእያ አሳኮ ቦስ" ያጌስ። ሀእ ናበ ጌተተይስ ሄ ዎደ ቆንጨ በእያ አስ ጌተቴስ።) 10 ሳኦል ዛሪድ፥ "ሎኦ፤ የ" ያግን፥ ፆሳ ኡራይ ደእያ ካታማ ብዶሶና። 11 ኤንቲ ፑደ ካታማ ከይሽን፥ ሃ ትካናዉ ያ ጌላኦታራ ኦገን ጋሄትድ፥ "ቆንጨ በእያ አስ ሀይሳን ደኢ?" ያግድ ኦይችዶሶና።
12 ኤንቲ፥ "ኤ ደኤስ፤ እ ህንተፈ ስንን ደኤስ፤ ኤለስድ ቢተ። ሀች አሳይ ቃ ጎይኖ በሳን ያርሾ ያርሽያ ግሾ፥ እ ኑ ካታማ ይስ። 13 ህንተ ካታማ ገልያ ዎደ እ ማናዉ ቃ ጎይኖ በሳ ከዮና ደእሽን ህንተ እያ ደማና። እ ያርሹዋ አንጃናዉ ኮሽያ ግሾ እ ጋኮና ደእሽን አሳይ ካ ሜና። እ አንጅዳፐ ጉየ ፄገትዳይሳት ማና። ኤለ ከይተ፤ ህንተ እያ ሀእ ደማና" ያግዶሶና። 14 ኤንቲ ካታማ ገልያ ዎደ ሳሜል ጎይኖ በሳ ከያናዉ ብሸ ኤንታራ ጋሄትስ።
15 ሳኦል ያናፐ ካሰ ጋላስ ሳሜላስ ጎዳይ ሀይሳዳ ያግድ ቆንጭስስ፤ 16 "ዎንቶ ሀኖደ ብንያመ ቢታፈ እስ አስ ታ ኔኮ የዳና፤ እ ታ አሳ እስራኤለ ካለና መላ ትያ። እ ታ አሳ ፍልስፄመ ኩሸፐ አሻና፤ ታ አሳ ዋሶይ ታኮ ጋክዳ ግሾ ታ ኤንታ በአስ" ያግስ።
17 ሳሜል ሳኦላ በእዳ ዎደ ጎዳይ፥ "ታኒ ነዉ ኦድዳ ኡራይ ሀይሳ፤ እ ታ አሳ ካለና" ያግስ።
18 ሳኦል ግምበ ድርሳ ፐንግያ ማታን ደእያ ሳሜላኮ ሺቅድ፥ "ቆንጨ በእያ ኡራ ሶይ አዉነኮ ታዉ ኦዳርኪ?" ያግስ።
19 ሳሜል ዛሪድ፥ "ቆንጨ በኤይ ታና። ሀች ህንተ ታራ ምያ ግሾ ታፐ ስንትድ ጎይኖ በሳ ቢተ። ታኒ ነና ዎንቶ ጉራ የዳና፤ ነ ዎዛናን ደእያ ኡባ ታ ነዉ ኦዳና። 20 ሄ ጋላሳፐ ስን ይዳ ሀረታባ ግድኮ ኤንቲ በንትዳ ግሾ ህርጎፋ። እስራኤለ አሳ ኡባ አሞይ ኦኔ? ነናነ ነ አዋ ሶ አሳ ግደኔ?"9:20 እስራኤለ ኡባን ኮየተይ ነና ግድኪ? ያግስ።
21 ሳኦል ዛሪድ፥ "ሽን ታኒ እስራኤለ ዛረ ኡባፈ ላፋ ግድዳ ብንያመ ኮቸ ግድክና? ታ ሶ አሳይ ብንያመ ኮቻ ግዶን ጉ ግደኔ? ኔኒ አይስ ታዉ ሀይሳ መላባ ኦዳይ?" ያግስ።
22 ሄሳፈ ጉየ፥ ሳሜል ሳኦላነ እያ ኦሳንቾይ ኤፍድ፥ ዳልጋ ኬ ገልስድ ሄ በሳ ፄገትዳ ሀስታሙ ግድያ አሳ ግዶን ቦንቾ በሳን ኡትስስ። 23 ሳሜል ካ ካይሳኮ፥ "ነ ማታን ዱማ ዎሻ ጋዳ ታኒ ነዉ እምዳ አሹዋ ሀማ" ያግስ።
24 ካ ካይስ ምሳ አሹዋ ኤህድ፥ ሳኦላ ስንን ዎስ። ሳሜል ሳኦላኮ፥ "ታ ነዉ ዱማ ሻካዳ ዎዳ አሾይ ሀይሳ፤ ኤካዳ ማ። ታኒ እማታ ፄግዳ ዎደፐ ዶማዳ ሀይሳ ነዉ አሻስ" ያግስ። ሄ ጋላስ ሳኦል ሳሜላራ ምስ። 25 ኤንቲ ጎይኖ በሳፈ ዱገ ካታማ ዎን፥ ኬ ቦላ ደእያ በሳን ሳሜል ሳኦላራ ኦደትስ።
26 ሳእ ዎንትን፥ ሳሜል ሳኦላ ኬ ቦላፈ ፄግድ፥ "ደንዳ፤ ታ ነና ሞይዛና" ያግስ። ሳኦል ደንድን፥ ናምአይ ኦገ ቦላ ከይዶሶና። 27 ኤንቲ ካታማ ጋፃ ጋክሽን፥ ሳሜል ሳኦላኮ፥ "ነ ኦሳንቾይ ስን ባና መላ ኦዳ" ያግስ። ኦሳንቾይ ስን አድ ብን፥ ሳሜል ሳኦላኮ፥ "ፆሲ ግዳባ ታ ነዉ ኦዳና መላ ሀይሳን ጉ ጋምአ" ያግስ።