1 ሳሜላ ማፃፋ 27

ዳዊቲ ፍልስፄመ ባቃትስ

1 ዳዊቲ ባ ዎዛናን፥ "እስ ጋላስ ታኒ ሳኦላ ኩሸን ዳፋታና፤ ታኒ ፍልስፄመ ቢታ ባቃታናፐ አትሽን፥ ሀራባይ ታዉ ሎኤና። ያንኮ፥ ሳኦል እስራኤለ ቢታ ኡባን ታና ኮየይሳ አጋና፤ ታኒ እያ ኩሸፐ ከሳ ኤካና" ያግድ ቆፕስ።

2 ሄሳ ግሾ፥ ዳዊቲነ እያራ ደእያ ኡሱፑን ፄቱ አሳት ደንድድ፥ ጋተ ካዋ ማኦካ ናኣ አንኩሳኮ ብዶሶና። 3 ዳዊቲነ እያ አሳይ አንኩሳራ ጋተን ኡትዶሶና። አሳ ኡባይ ባ ሶ አሳ አሳ ኤክድ ብስ፤ ዳዊቲካ ባ ማቸታ፥ እዝራኤለ አክናሆሞነ ናባላ አምእዉ፥ ቃርመሎሳ ማጫስዉ፥ አብግያ ኤክድ ብስ። 4 ዳዊቲ ጋተ ባቃትስ ገይሳ ስእድ፥ ሳኦል ዛሪድ እያ ኮየይሳ አግስ።

5 ዳዊቲ ካዋ አንኩሳኮ፥ "ኔኒ ታናን ኡፋይትኮ፥ ታኒ ያን ዳና መላ ነ ካዎተን ደእያ ካታማታፐ እሱዋ ታዉ እማ። ታኒ ነ አይለይ ካዎይ ደእያ ካታማን ኔራ አይስ ኡታኔ?" ያግስ።

6 ሄ ጋላስ አንኩስ ፅቅላጋ ካታማ ዳዊታስ እሚስ፤ ሀች ጋካናዉ ፅቅላጋ ካታማይ ይሁዳ ካዎታባ ግድድ አትስ። 7 ዳዊቲ ፍልስፄመ ቢታን እስ ላይነ ኦይዱ አጌና ደእስ።

8 ዳዊቲነ እያ አሳት ፑደ ከይድ፥ ጌሹረታ፥ ጋርዘታነ አማለቃታ ኦሎሶና። በንፐ ዶምድ፥ ሄ አሳት ሹራፐ ብድ ግብፀ ጋካናዉ ደእያ ቢታን ደእዶሶና። 9 ዳዊቲ ሄ ቢታ ኦልያ ዎደ ኡባን ሄ ቢታን ደእያ ማጫ ግድን፥ አደ ግድን፥ ፓፃ አግቤና። ዶርሰነ መሄ፥ ሀረነ ግማለ ማኦ ድኤስ፤ ያትድ አንኩሳኮ ስሜስ። 10 አንኩስ፥ "ሀች አዉን ኦልደቲ?" ግድ ዳዊታ ኦይቼስ።

ዳዊቲ፥ "ይሁዳ ዱገሀ ባጋ ዎይኮ ይራማኤላ ዱገሀ ባጋ ዎይኮ ቄና ዱገሀ ባጋ ኦልዳ" ያጌስ።

11 ኤንታፈ እስ አስ ጋተ ብድ፥ "ዳዊቲ ሀይሳ ኦስ" ግድ ኦዶና መላ ዳዊቲነ እያ አሳት ማጫ አደ አሾና ዎዶሶና። ዳዊቲ ፍልስፄመ ቢታን ደእዳ ዎደ ኡባን ሀይሳዳ ኦስ። 12 አንኩስ ዳዊታን አማነትድ፥ "ዳዊቲ ባ አሳን፥ እስራኤለን ዳሮ እፀትስ፤ ሄሳ ግሾ፥ እ ታዉ መርናዉ አይለ ግዳና" ያግድ ቆፕስ።