1 ሳሜላ ማፃፋ 14

ዮናታን ፍልስፄመታ ኦልስ

1 እስ ጋላስ ሳኦላ ናአይ ዮናታን ባ ኦላ ሚሽያ ቶክያ ፓንኮ ሀይሳዳ ያግስ፤ "ሃያ፤ ሄፍንን ደእያ ፍልስፄመት ዱንካንዳ ጉታ አነ ቦስ" ያግስ። ሽን ባ አዋስ ሄሳ ኦድቤና።

2 ሄ ዎደ ሳኦል ግብአ ማታን ምግሮናን፥ ኦሮማነ ም ጋርሳን ደኤስ። እያራ ኡሱፑን ፄቱ አሳት ደኦሶና። 3 ሴሎን ጎዳ ካህነ ግድዳ ኤል ናአይ፥ ካህነይ ፍንሃስ የልዳ እካቦዳ እሻይ፥ አክፁባ ናአይ፥ አክይ ኤፉደ ማእድ፥ ኤንታ ግዶን ደኤስ። ዮናታን ኤንታ ግዶን ባይናይሳ ኦንካ ኤርቤና።

4 ዮናታን ፍልስፄመት ዱንካንዳ ጉታ ፕናናዉ ብያ ኦግያ ቦላ ኡሻቻ ባጋንነ ሀድርሳ ባጋን፥ እሶይ ቦፀፃ፥ ሀንኮይ ሳና ጌተትያ ናምኡ ፖፀትዳ ግታ ዛላት ደኦሶና። 5 ዛላታፐ እሶይ ፑደሀ ባጋን ምክማሳ ስንን ደእያ ዎደ፥ እሶይ ቃስ ዱገሀ ባጋን ግብአ ስንን ደኤስ።

6 ዮናታን ባ ኦላ ሚሽያ ቶክያ ፓንኮ፥ "ሃያ፤ ሀ ቃፃረትቦና አሳይ ዱንካንዳ ጉታ አነ ቦስ። ጎዳይ ኑ ግሾ ኦለቶና አገና፤ ዳሮ አሳን ግድን ጉ አሳን፥ አሻናይስ ጎዳ ፆነና" ያግስ።

7 እያ ኦላ ሚሽያ ቶከይስ፥ "ኔኒ ቆፕዳባ ኡባ ኦ፤ ጉየ ጎፓ፤ ታ ዎዛናይ ኔራ ደኤስ" ያግስ።

8 ዮናታን፥ "ያኮ ሃያ፤ ሄፍን ፕንድ አሳስ በንቶስ። 9 ኤንቲ፥ ‘ኑኒ ህንተኮ ያና ጋካናዉ ያን ናግተ’ ጊኮ፥ ኑኒ ደእያ በሳን ናጋናፐ አትሽን፥ ኤንታኮ ቦኮ። 10 ሽን ኤንቲ፥ ‘ኑኮ ሃ ዪተ’ ጊኮ፥ ኑኒ ኤንታኮ ከያና። ሄስ ጎዳይ ኤንታ ኑ ኩሸን አድ እምዳይሳስ ማላ ግዳና" ያግስ።

11 ኤንቲ ናምአይ ከይድ ፍልስፄመታስ በንትዳ ዎደ ፍልስፄመት፥ "ሄኮ፥ እብራወት ባንታ ቆሰትዳ ኦላፈ ዙምድ ከዮሶና" ያግዶሶና። 12 ፍልስፄመ ኦላንቾት፥ ዮናታናነ ኦላ ሚሽያ ቶከይሳ ፄግድ፥ "ሃ ኑኮ ከይተ፤ ኑኒ ህንተና እስባ በሳና" ያግዶሶና።

ሄሳ ግሾ፥ ዮናታን ባ ኦላ ሚሽያ ቶከይሳኮ፥ "ታና ካላዳ ሀ ከያ። ጎዳይ ኤንታ እስራኤለ ኩሸን አድ እሚስ" ያግስ።

13 ዮናታን ባ ኦላ ሚሽያ ቶከይሳ ካለድ፥ ቶሆንነ ኩሸን ዙምድ ከይስ። ፍልስፄመታ ዮናታን ሾጭድ የግን፥ እያ ኦላ ሚሽያ ቶከይስ ካልድ ኤንታ ዎስ። 14 ሄ ኮይሮ ኦላን ዮናታንነ እያ ኦላ ሚሽያ ቶከይስ ባጋ ቦራ ሶ ጋደን ላታሙ ግድያ አስ ዎዶሶና። 15 ሄሳፈ ጉየ፥ ጉታንንን ጎሻን፥ ኦላስ ከይዳ አሳትነ ናጎን ደእያ ፍልስፄመት ዳጋምዶሶና። ቢት ቃፅስ፤ ሄ ዳጋማይ ፆሳፈ ኪተትስ።

16 ሳኦል ብንያመ ቢታን፥ ግብአን ዎዳ ዎችያ አሳት፥ ፍልስፄመ ኦላንቾት ያራ ሃራ ፕስክ ግድ ላለተይሳ በእዶሶና። 17 ያትን፥ ሳኦል ባራ ደእያ አሳኮ፥ "አነ ኦላንቾታ ሺሽድ ኑ ግዶፈ ኦን ብዳኮ በእተ" ያግስ። ኤንቲ ሺሽድ ታይብያ ዎደ ዮናታንነ እያ ኦላ ሚሽያ ቶከይስ ባይናይሳ በእዶሶና።

18 ሳኦል ካህንያ አክያ፥ "ፆሳ ታቦትያ ሃ ኤካዳ ያ" ያግስ። ሄ ዎደ ታቦተይ እስራኤለራ ደኤስ*14:18 "ኤፉድያ ሃ ኤካዳ ያ" ያግስ። ሄ ዎደ አክይ ኤፉደ ማእድ እስራኤለ አሳ ስንን ደኤስ 19 ሳኦል ካህንያራ ሃሳይሽን፥ ፍልስፄመት ዱንካንዳ ጉታን ዎጫማይ ዳር ዳር ብስ። ሄሳ ግሾ፥ ሳኦል ካህንያ፥ "ታቦትያፐ ነ ኩሽያ ከሳ" ያግስ።

20 ሄሳፈ ጉየ፥ ሳኦልነ እያ ኦላንቾት ሺቅድ ኦላ ብዶሶና። ፍልስፄመ አሳ ኡባይ ሀናና ባ ይድ፥ ባንታ ማሻን እሶይ እሱዋ ቡዶሶና። 21 ካሰ ፍልስፄመ አሳራ ዎላ ኦላ በሳ ብዳ እብራወት ኤንታ አግድ፥ ሳኦላራነ ዮናታናራ ደእያ እስራኤለ አሳራ ዋላከትዶሶና። 22 ደረይ ዳርያ ኤፍሬማ ቢታን ቆሰትዳ ሀራ እስራኤለትካ ፍልስፄመት ባቃተይሳ ስእዶሶና። ኤንትካ እስራኤለታራ ዋላከትድ የደ ኦይክዶሶና። 23 ጎዳይ ሄ ጋላስ እስራኤለ አሳ አሽስ። ቤት-አዌናፐ ሄፍን ጋካናዉ ኦላይ ካንስ።

ዮናታና ኤሳ ሙሳ

24 ሄ ጋላስ እስራኤለ አሳይ ኮሻን ላባንዶሶና። ሳኦል፥ "ሳእ ቃማናፐ ስን ታኒ ታ ሞርከታ ሀሎ ከዮና ደእሽን፥ ካ ምያ ኦንካ ባደትዳይሳ ግዶ" ያግድ አሳ ጫቅስድ ዎስ። ሄሳ ግሾ፥ ኦላንቾታፐ ካ ዶናኮ ሺሽዳ አስ ኦንካ ባዋ።

25 ኦላንቾት ኡባይ ዎራ ግዶ ገልያ ዎደ ም ቦላ ኤስ ደኤስ። 26 ኤንቲ ዎራ ግዶን ኤስ ፆከይሳ በእዶሶና፤ ሽን ጫቁዋ ያይዳ ግሾ፥ እስ አስካ ባ ኩሽያ ዶናኮ ሺሽበና። 27 ሽን ዮናታን እያ አዋይ አሳራ ኦዳ ቃችዳይሳ ስእቤና። ሄሳ ግሾ፥ ባ ኩሸን ደእያ ፃምአ ፄራ እልሎ ኤሳን የድ ከስድ፥ ላጭን እያ አይፈይ ፄልስ። 28 ሄሳፈ ጉየ፥ ኦላንቾታፐ እሶይ፥ "ነ አዋይ ኦላንቾታ ኡባ፥ ‘ሀች ካ ምያ አስ ባደትዳይሳ ግዶ’ ያግድ፥ ጫቅስድ ዎስ፤ አሳ ኡባይ ላባንዳይ ሄሳሳ" ያግስ።

29 ዮናታን፥ "ታ አዋይ ቢታስ መቶ መስ። ታኒ ሀ ኤሳፈ ጉራ ላጭዳ አይ መላ ምንዳኮ በአ። 30 አሳይ ባ ሞርከታፐ ድእዳ ካፈ ሀች ምዳባ ግድያኮ ሎኦሽን፤ ኤንቲ ዎና ፍልስፄመታ ታይቦይካ አይ መላ ዳራነሽን" ያግስ።

31 ሄ ጋላስ እስራኤለ አሳይ ምክማሳፐ ኤሎና ጋካናዉ ፍልስፄመታ ሾጭ ስሚድ ዳቡርዶሶና። 32 ኤንቲ ድእዳ ዶርሳታ፥ ሚዛታነ ማራታ ሹክድ ሱ ጉሶና ምዶሶና። 33 እስ አስ ሳኦላኮ፥ "ሄኮ፥ አሳይ ሱራ ደእያ አሾ ምድ፥ ጎዳ ስንን ናጋራ ኦሶና" ያግስ።

ሳኦል፥ "ህንተ ናጋራ ኦደታ፤ ግታ ሹቹ ጎንዶርስድ ኤለ ታኮ ሃ ሺሽተ" ያግስ። 34 ሄሳፈ ጉየ፥ "አሳ ግዶ ብድ፥ ‘ህንተ እሶይ እሶይ ህንተ መሄታነ ዶርሳታ ታኮ ሃ ኤህተ፤ ሀይሳን ዎጋዳ ሹክድ ሚተ። ሱራ ደእያ አሾ ምድ፥ ጎዳ ስንን ናጋራ ኦፕተ’ ያጋ" ያግስ።

ሄሳ ግሾ፥ ሄ ቃማ እሶይ እሶይ ባ ቦራ ኤህድ ያን ሹክዶሶና። 35 ሳኦል ሄ በሳን ጎዳስ ያርሾ በሲ ግምብስ፤ ጎዳስ ያርሾ በሲ ግምብሽን ሀይስ እያዉ ኮይሮ።

36 ሳኦል፥ "ሀች ቃማ ፍልስፄመታ ካል፥ ብድ ሳእ ዎንታና ጋካናዉ ኤንታባ ኡባ ቦንቆስ፤ ኤንታፈ እሱዋካ አሾና ዎኦስ" ያግስ።

ኤንቲ፥ "ኤሮ፥ ነና ሎእዳባ ኦ" ያግድ ዛርዶሶና።

ሽን ካህነይ፥ "አነ ፆሳ ሸነይ አይበኮ ኦይቾስ" ያግስ።

37 ሄሳ ግሾ፥ ሳኦል፥ "ፍልስፄመ አሳ ካላዳ ቦ? ኔኒ ኤንታ እስራኤለ ኩሸን አዳ እማኔ?" ያግድ ፆሳ ኦይችስ። ሽን ሄ ጋላስ ፆሳይ እያዉ ዛሮ እምቤና።

38 ሳኦል፥ "ካለይሳታ ፄግድ፥ ኡባይ ሃይተ፤ ሀች አይባ ናጋር ኦሰትዳኮ አነ ቆርድ ደሞስ። 39 እስራኤለ አሽያ ደኦ ጎዳይ ኤርያ መላ። ታ ናአ ዮናታና ግድኮካ፥ ሀይቃናዉ በሴስ" ያግስ። ሽን አሳፐ እስ አስካ ዶና ፖግቤና።

40 ሄሳፈ ጉየ፥ ሳኦል እስራኤለ አሳኮ፥ "ህንተ ኡባይ ያ ባጋን ኤቅተ፤ ታንነ ታ ናኣ ዮናታን ሀ ባጋን ኤቃና" ያግስ።

አሳይ፥ "ኤሮ፥ ነና ሎእዳባ ኦ" ያግዶሶና።

41 ሄሳፈ ጉየ፥ ሳኦል፥ "ታዉ ልከ ዛሮ እማ" ያግድ ጎዳ እስራኤለ ፆሳ ዎስስ። ሳማይ ሳኦላ ቦላነ ዮናታና ቦላ ዎን አሳይ ጌይስ። 42 ቃስ ሳኦል፥ "ታ ቦላነ ታ ናኣ ዮናታና ቦላ ሳማ የግተ" ያግስ። ሳማይ ዮናታና ቦላ ዎስ።

43 ሳኦል ዮናታና፥ "አነ ኔኒ ኦዳባ ኦዳ" ያግስ።

ዮናታን፥ "ታኒ ጉ ኤሳ እልሎ ታ ፃምኣ ፄራን ቦቻዳ ላጫስ። ሄኮ ታኒ ሀይሳን ደአይስ፤ ሀይቆስ ጊገታስ" ያግስ።

44 ሳኦል፥ "ዮናታና፥ ኔኒ ሀይቆና እፅኮ፥ ፆሲ ታና ፕርዶ" ያግስ።

45 ሽን አሳይ ሳኦላኮ፥ "ዮናታን፥ እስራኤለስ ሄሳ መላ ግታ ፆኑዋ ኤህዳይስ ሀይቃኔ? ሄስ ፖሎ ሀነና! ደኦ ፆሲ ኤርያ መላ! እያ ሁጵያፐ እስ ብናንካ ቢታን ዎና። እ ሀች ሀይሳ ፆሳ ማዶን ኦስ" ያግዶሶና። ያትድ አሳይ ዮናታና አሽን፥ እ ሀይቆፐ አትስ።

46 ሄሳፈ ጉየ፥ ሳኦል ፍልስፄመ አሳ የደይሳ አግን ኤንቲ ባንታ ቢታ ስምዶሶና።

47 ሳኦል እስራኤለ ቦላ ካዎትዳፐ ጉየ፥ ኡባ ባጋራ ደእያ ባ ሞርከታ ኦልስ። ሄሳትካ፥ ሞአበታ፥ አሞነታ፥ ኤዶመታ፥ ሱባ ካዎታነ ፍልስፄመታ። ኦላናዉ ብዳ በሳ ኡባን ፆንስ። 48 እ ምንድ ኦለትስ፤ አማለቃታ ፆንስ፤ እስራኤለ አሳ ቦንቀይሳታ ኩሸፐ አሽስ።

49 ሳኦላ አደ ናይት ዮናታና፥ የሱዋነ ማልክሳ፤ እያዉ ባይራ ናኤ ሱንይ መራቦ፤ ካሎ ናኤ ሱንይ መልኮሎ። 50 እያ ማችያ፥ አክማሳ ናእያ አክናሆሞ። እያ ቶራ ሞጮናይ እያ አዋ እሻ ኔራ ናኣ አበኔራ። 51 ሳኦላ አዋ ቂስነ አበኔራ አዋ ኔር አብኤላ ናይታ።

52 ሳኦል ደእዳ ላይ ኡባን ፍልስፄመታራ ሞርከተን ኦለትዳ መላ ደእስ። ምኖ አስ ዎይኮ ፃላ አስ ደምዳ ዎደ ኡባን እ ሄ ኡራ ባ ኦላንቾታን ጉጄስ።