1 ሳሜላ ማፃፋ 10

1 ሄ ዎደ ሳሜል ትግያባራ ዛይተ ኤክድ፥ ሳኦላ ሁጰን ትይስ። ሳኦላ ዬርድ፥ ሀይሳዳ ያግስ፤ "ባ አሳ እስራኤለ ካለና መላ ጎዳይ ነና ትይስ።*10:1 ግርከ ብርሸይ፥ "ኔኒ እያ አሳ ካለዳ ኤንታ ዩሹዋን ደእያ ሞርከታ ኩሸፐ ኤንታ አሻና። እያ ላታ ኔኒ ካለና መላ ጎዳይ ነና ትይዳይሳስ ሀይስ ማላ" ያግድ ጉጅስ። 2 ኔኒ ሀች ታፐ ሻከታዳ ብያ ዎደ ራሄል ዱፉዋ ማታን ብንያመ ዛዋን ደእያ ፃልፃሀ ጌተትያ በሳን ናምኡ አሳታራ ጋሄታና። ኤንቲ ነና፥ ‘ነ ኮያናዉ ብዳ ሀረት በንትዶሶና፤ ሀእ ነ አዋይ ሀረታ ቆፐይሳ አግድ፥ ታ ናአይ ዋንደሻ?’ ያግድ ነዉ ህርጌስ" ያግድ ኦዳና።

3 ኔኒ ሄ በሳፈ ደንዳዳ፥ ታቦረ ግታ ም ጋካናዉ ባና። ፆሳኮ ቤተለ ብያ ሄ አሳት ያን ኔራ ጋሄታና። ኤንታፈ እሶይ ሄ ዴሻ ማር ቶክስ፤ ናምአንይ ሄ ኡይ ቶክስ፤ ሄንይ ኦጎሮ ኩም ዎይነ ቶክስ። 4 ኤንቲ ነና ሳሮና፤ ነዉ ናምኡ ኡይ እማና፤ ነ ኤንታ ኩሸፐ ሄ ኡይ ኤካናዉ ኮሼስ።

5 "ሄሳፈ ጉየ፥ ኔኒ ፍልስፄመ ኦላንቾታ ጩጋይ ደእያ ፆሳ ደርያ ግብአ ባና። ኔኒ ሄ ካታማ ጋክያ ዎደ ዲራ ካራቦራ፥ ሱሱልኤነ ዛየ ፑንድ ካእሸነ ትንብተ ኦድሸ፥ ጎይኖ በሳፈ ዎያ ናበ ጩጋራ ጋሄታና። 6 ጎዳ አያናይ ነ ቦላ ዎልቃን ዎና፤ ኔኒ ኤንታራ ትንብተ ኦዳና፤ ኔኒ ላመታዳ ሀራ አስ ግዳና። 7 ሀ ማላት ፖለትያ ዎደ ፆሳይ ኔራ ደእያ ግሾ ነ ኦናዉ ዳንዳእያባ ኡባ ኦ።

8 "ኔኒ ታፐ ስንታዳ ጋልጋላ ዎ። ታኒ ፁሳ ያርሾነ ሳሮተ ያርሾ ያርሻናዉ ኔኮ ባና። ታ ኔኮ ባዳ ነ ኦናባ ኦዳና ጋካናዉ ላፑን ጋላስ ጋምአ" ያግስ።

ሳኦል ካዎትስ

9 ሳኦል ሳሜላፐ ሻከትዳ ዎደ ፆሳይ ሳኦላ ዎዛና ላምስ፤ ሳሜል ኦድዳ ማላት ኡባይ ሄ ጋላስ ሀንዶሶና። 10 ሳኦልነ እያ አይለይ ግብአ ጋክያ ዎደ ናበ ጩጋይ እያራ ጋሄትስ። ፆሳ አያናይ እያ ቦላ ዎልቃራ ዎን እ ኤንታ ግዶን ትንብተ ኦደትስ። 11 ሳኦላ ካሰ ኤርያ ኡባይ እ ናበታራ ትንብተ ኦደተይሳ በእዳ ዎደ፥ "ቂሳ ናአይ ዋንዴ? ሳኦል ናበ ያሬ?" ያግዶሶና። 12 ሄ በሳን ደእያ እስ ኡራይ፥ "ኑ ኤንታ አዋይ ኦነኮ ኤርዉ?" ያግድ ኦይችስ። ሄሳ ግሾ፥ "ሳኦል ናበ ኮቼ?" ገይስ ሀይሰ ግድስ። 13 ሳኦል ትንብተ ኦደይሳ ዉርስዳፐ ጉየ ጎይኖ ዙማ ቦላ ከይስ።

14 ሳኦላ አዋ እሻይ ሳኦላነ እያ አይልያ፥ "አዉ ብደቲ?" ያግስ።

ሳኦል፥ "ሀረታ ኮያናዉ ብዳ፤ ሀረት በንቶና እፅን ሳሜላ ኦይቻናዉ ብዳ" ያግስ።

15 ሳኦላ አዋ እሻይ፥ "ሀያና ሳሜል ነዉ ግዳባ ታዉ ኦዳርኪ" ያግስ።

16 ሳኦል፥ "ሀረት በንትዳይሳ ናበይ ሳሜል ኑስ ጌሽድ ኦድስ" ያግስ። ሽን "ነ ካዎ ግዳና" ግድ ሳሜል እያዉ ኦድዳይሳ ባ አዋ እሻስ ኦድቤና።

17 ሄሳፈ ጉየ፥ ሳሜል ምፅጳን እስራኤለ አሳ ጎዳ ስንን ሺሽስ። 18 ኤንታ፥ "ጎዳይ፥ እስራኤለ ፆሳይ ሀይሳዳ ያጌስ፤ ‘ታኒ እስራኤለ ግብፀፈ ከሳስ፤ ግብፀ አሳ ኩሸፐነ ህንተና ኡንኤያ ካዎተታ ኡባ ኩሸፐ አሻስ።’ 19 ሽን ሀች ህንተና ህንተ መቱዋፐነ ዋያፐ አሽያ ታና ህንተ ፆሳ እፅደታ። ‘አካይ፥ ኑስ ካዎ ካዎ’ ያግደታ። ሄሳ ግሾ፥ ሀእ ህንተ፥ ህንተ ኮቻን ኮቻን ግድድ ጎዳ ስን ሺቅተ" ያግስ።

20 ሳሜል እስራኤለ ዛረ ሺሽን፥ ብንያመ ኮቻይ ዶረትስ። 21 ብንያመ ኮቻ ሺሽን፥ ማፅራ ኮቻይ ዶረትስ። ዉርሰን ቂሳ ናአይ ሳኦል ዶረትስ፤ ኤንቲ እያ ኮይዶሶና፥ ሽን እ በንትቤና። 22 ሄሳ ግሾ ኤንቲ፥ "አደይ ሀ በሳ ይዴ?" ያግድ ጎዳ ኦይችዶሶና።

ጎዳይ፥ "ኤ፥ ሳኦል ሚሸ ግዶን ቆሰትድ ኡትስ" ያግስ።

23 ኤንቲ ዎፅ ብድ፥ ቆሰትዳ በሳፈ ከስ ኤህዶሶና። አሳ ግዶን እ ኤቅያ ዎደ አስ ኡባይ እያ ሀሸፐ ጋርሳራ አትያ አዱሳ አስ። 24 ሳሜል አሳኮ፥ "ጎዳይ ዶርዳ አድያ በእቴ? እያ ዳንያ አስ ሀ አሳ ግዶን ኦንካ ባዋ" ያግስ።

አሳ ኡባይ ባንታ ቃላ ቁ ኦድ፥ "ካዎይ ብራታ ቱስ ግዶ" ያግስ።

25 ሄሳፈ ጉየ፥ ሳሜል ካዎተ ዎጋ አሳስ ኦድስ፤ ፃ ማፃፋን ሄ ዎጋ ፃፍድ ጎዳ ስንን ዎስ። ያትድ ሳሜል አሳ ኡባ ባ ሶ ሶ ሞይዝስ።

26 ሳኦል ባ ሶ ግብአ ብስ፤ ፆሳይ ኤንታ ዎዛና ቦችዳ ምኖ አሳት ሳኦላራ ብዶሶና። 27 ሽን እስ እስ ፓና አሳት፥ "ሀ አደይ ኑና ዋትድ አሻኔ?" ያግዶሶና። ኤንቲ እያ ካድ፥ እያዉ አይ እሞታካ እምቦኮና። ሽን ሳኦል ስእ ግስ።