1 ቅርያት-ይኣርማ አሳይ ይድ፥ ጎዳ ታቦትያ ኤፍድ ደረ ሁጰን ደእያ አምናዳበ ሶን ዎዶሶና። ጎዳ ታቦትያ ናጋና መላ አምናዳበ ናኣ አላዛራ ዱማይድ ሱንዶሶና።
ሳሜላ ሹመተ
2 ታቦተይ ቅርያት-ይኣርማን ዳሮ ዎደ ጋምእስ፤ ያን ላታሙ ላይ ኡትስ። እስራኤለ አሳ ኡባይ አዛንድ ጎዳ ኮይዶሶና።
3 ሳሜል እስራኤለ አሳኮ፥ "ኩመ ዎዛናፐ ህንተ ጎዳኮ ስምዳባ ግድኮ፥ አላጋ ፆሳታነ አስታሮተ ኤቃ ህንተ ግዶፈ ድግተ። ህንተናተ ጎዳስ ሼተ፤ እያ ፃላላስ ኪተትተ፤ እ ህንተና ፍልስፄመታ ኩሸፐ አሻና" ያግስ። 4 ሄሳ ግሾ፥ እስራኤለ አሳይ ባኣለነ አስታሮተ ኤቃ ባንታ ግዶፈ ድግድ፥ ጎዳ ፃላላ ጎይንዶሶና።
5 ሄሳፈ ጉየ፥ ሳሜል፥ "እስራኤለታ፥ ኡባይ ምፅጳ ሺቅተ፤ ታኒ ያን ህንተዉ ጎዳ ዎሳና" ያግስ። 6 ኤንቲ ምፅጳ ሺቅድ ሃ ዱቅድ፥ ጎዳ ስንን ጉስዶሶና፤ ሄ ጋላስ ፆምዶሶና፤ ሄ በሳን፥ "ኑኒ ጎዳ ቦላ ናጋራ ኦዳ" ያግድ ፓፅዶሶና። ምፅጳን ሳሜል እስራኤለ አሳ ቦላ ዳይናትስ።
7 እስራኤለት ምፅጳን ሺቅዳይሳ ፍልስፄመ አሳይ ስእዳ ዎደ ኤንታ ኦላናዉ ከይዶሶና። እስራኤለት ሄሳ ስእድ፥ ፍልስፄመታስ ያይዶሶና። 8 እስራኤለ አሳይ ሳሜላኮ፥ "ፍልስፄመ አሳ ኩሸፐ ኑና አሻና መላ ኔኒ ጎዳ፥ ኑ ፆሳ ዎሳ አጎፋ" ያግዶሶና። 9 ሳሜል እስ ምያ ዶርሳ ናአ ኤክድ፥ ኩመ ፁሳ ያርሾ ኦድ ጎዳስ ያርሽስ፤ እስራኤለ አሳ ግሾ ጎዳ ዎስስ፤ ጎዳይ እያ ዎሳ ስእስ።
10 ሳሜል ፁሳ ያርሾ ያርሽያ ዎደ ፍልስፄመት እስራኤለታ ኦላናዉ ሺቅዶሶና። ሽን ሄ ጋላስ ፍልስፄመታ ቦላ ጎዳይ ግታ ዳዳ ጉንድ ዳጋንን፥ ኤንቲ እስራኤለታ ስንፈ ባቃትዶሶና። 11 እስራኤለት ምፅጳፈ ከይድ፥ ፍልስፄመታ የደድ፥ ቤት-ካራፐ ጋርሳ ባጋራ ደእያ በሳ ጋካናዉ ኦገ ቦላ ዎዶሶና።
12 ሄሳፈ ጉየ፥ ሳሜል እስ ሹቹ ኤክድ፥ ምፅጳፈነ ሸናፐ ግዶን ኤስስ፤ "ሀእ ጋካናዉ ጎዳይ ኑና ማድስ" ያግድ ሄ በሳ አበንኤዘራ ግድ ሱንስ።7:12 አበንኤዘራ፦ ሀ ሱን ብርሸይ "ማዶ ሹቹ" ጉሱ። 13 ፍልስፄመ አሳይ ፆነትዶሶና፤ ኤንቲ እስራኤለ ቢታ ቦላ ናምአን ደንድቦኮና። ሳሜል ደእዳ ላይ ኡባን ጎዳ ኩሸይ ፍልስፄመ አሳ ቦላ ዴፅስ። 14 ፍልስፄመ አሳይ ኤቅሮናፐ ጋተ ጋካናዉ እስራኤለፐ ድእዳ ካታማት እስራኤለስ ስምዶሶና። እስራኤለ አሳይ ባንታ ካሰ ዛዋ ፍልስፄመ አሳ ኩሸፐ ዎ ኤክዶሶና። እስራኤለ አሳይነ አሞረ አሳይ ሳሮ ደእስ።
15 ሳሜል ባ ደኦ ላይ ኡባን እስራኤለ ቦላ ፕርዴስ። 16 ሳሜል ላይን ላይን ቤተለ፥ ጋልጋላነ ምፅጳ ዩይድ እስራኤለ ቦላ ፕርዴስ። 17 እያ ኬይ ራማን ደእያ ግሾ ያ ስሚድ ሄ በሳንካ እስራኤለ ቦላ ፕርዴስ። እ ራማን ጎዳስ ያርሾ በሲ ኬፅስ።