1 Coríntios 5

አሳ ግዶን ደእያ ዬላያ ኦሶ

1 ህንተ ግዶን ላይማተ ደኤይስ ዝግረቴስ። ሄሳ መላ ላይማተ ሀር አቶሽን፥ አማኖና አሳይካ ኦኮና። ህንተ ግዶን ባ አዋ ማቸራ ቱንዳ አስ ደኤስ።✝5:1 ዛረ 22:30. 2 ህንተ ሄሳን ቂሮታናዉነ ዬላታናዉ በሰነ፥ ሽን ኦቶርትደታ። ሄሳ መላ ቦርሶባ ኦዳ ኡራ ህንተ ግዶፈ ከሳናዉ በሰኔ?

3 ታኒ አሾን ህንተራ ዶና እፅኮካ አያናን ታ ህንተራ ደአይስ። ታኒ ህንተራ ደእያ አሳዳ ሀናዳ ሄሳ መላ ኦሱዋ ኦዳ ኡራ ቦላ ፕርዳስ። 4 ኑ ጎዳ የሱስ ክርስቶሳ ሱንን ህንተ ሺቅያ ዎደ ታኒ አያናን ህንተራ ዳና። ሄሳን ጎዳ የሱስ ክርስቶሳ ዎልቃይ ህንተራ ግዳና። 5 ሄ ኡራ ናጋራ አሾይ*5:5 ናጋራ አሾይ፦ ናጋራ መይ ዎይኮ ናጋራ አሳተይ። ይድ፥ እያ አያናይ ጎዳ የሱሳ ፕርዳ ጋላሳን አታና መላ እ፥ ፃላሄስ አድ እመቶ።

6 ህንተ ጬቆይ ሎኦ ግደና። ጉ እርሾይ ሙኑቃ ኡባ ደንይሳ ኤረከትዬ?✝5:6 ጋላ 5:9. 7 ህንተ ሀእ እርሾይ ባይና ሙኑቃ ግዳና መላ፥ ህንተፈ ናጋራ እርሾ ከስተ። ኑስ ፓስካ ዶርሰ ግድዳ ክርስቶስ ያርሸትስ።✝5:7 ከሳ 12:5. 8 ሄስ ግሾ፥ ገነይነ ኢታተ ደእያ እርሾራ ግዶናሽን፥ ቱማተነ ጌሻተ ደእያ ኡይራ ኑ ባልያ ቦንቾስ።✝5:8 ከሳ 13:7፤ ዛረ 16:3.

9 ታ ካሰ ፃፍዳ ዳብዳብያን ህንተ ላይማትያ አሳራ ጋሄቶና መላ ህንተዉ ኦዳስ። 10 ሄሳ ጉሳይ ሀ አላምያን ደእያ ላይማተይሳታራ ዎይኮ ኡዘታራ ዎይኮ ካይሶታራ ዎይኮ ኤቃ ጎይነይሳታራ ፖሎ ጋሄቶፍተ ጉሱ ግደና። ሄሳ ግድኮ፥ ሀ አላምያፐ ህንተ ከያናዉ በሴስ ሽን አትስ። 11 ሽን አማናይስ ያግሸ ላይማተይሳታራ ዎይኮ ኡዘታራ ዎይኮ ኤቃ ጎይነይሳታራ ዎይኮ ጫየይሳታራ ዎይኮ ማተይሳታራ ዎይኮ ካይሶታራ ጋሄቶፍተ ጋዳ ህንተዉ ኦዳይስ። ሄሳ መላ አሳራ ሀር አቶሽን፥ ካካ ሞፕተ።

12 ዎሳ ኬፈ ካረራ ደኤይሳታ ቦላ ፕርዳናዉ ታና አይበ ጋይ? ዎሳ ኬን ደኤይሳታ ቦላ ህንተ ፕርደከትዬ? 13 ሽን ካረራ ደኤይሳታ ቦላ ፆሳይ ፕርዳና። ሄ ኢታባ ኦያ ኡራ ህንተ ግዶፈ ከስተ።✝5:13 ዛረ 13:5፤ 17:7.