1 ጬቀተስ ጎእ ባይናይሳ ኤራይስ። ሽን ጬቀታናዉ ኮሽኮ፥ ጎዳፐ ኤክዳ ቆንጨን ጬቃና። 2 ታማነ ኦይዱ ላይፈ ካሰ፥ ክርስቶሳ አማንያ እስ ኡራይ ሄን ሳሉዋ ብዳይሳ ታ ኤራይስ። ሄ ኡራይ አሾን ዎይኮ አሾፐ ካረራ ብዳኮ ታ ኤርከ፤ ፆሳይ ኤሬስ። 3 ሄ ኡራይ ሄን ሳሉዋ ኤከትዳይሳ ኤራይስ። ሽን እ አሾን ዎይኮ አሾፐ ካረራ ኤከትዳኮ ታ ኤርከ፤ ፆሳይ ኤሬስ። 4 ሄ ኡራይ ጋናተ ኤከትድ አስ ቆንጭሳናዉነ አስ ኦዳናዉ ዳንዳኦናባ ስእስ። 5 ታኒ ሄ አድያባን ጬቀታና፥ ሽን ታኒ ታ ዳቡራፐ አትሽን፥ ታናን ጬቀትያባይ ባዋ። 6 ታኒ ቱማ ኦደትያ ግሾ፥ ጬቀታናዉ ኮይኮካ ኤያ ግድከ። ሽን አስ ታ ኦይሳ በኤይሳፈነ ስኤይሳፈ አድ ቆፖና መላ ጋዳ ጬቀተ አጋይስ።

7 ታዉ ቆንጭዳ ግታ ቆንጨን ታ ኦቶርቶና መላ ታና ዋይሳናዉ ታ አሹዋን ጫድያ ፃላህያ ኪታንቾይ ታዉ እመትስ። 8 ሀ ዋይስያባ ታፐ ድጋና መላ ታኒ ጎዳ ሄ ቶሆ ዎሳስ። 9 ሽን ጎዳይ፥ "ታ ዎልቃይ ነ ዳቡራን ቆንጭያ ግሾ ታ አ ኬሀተይ ነዉ ግዳና" ያግስ። ክርስቶሳ ዎልቃይ ታናን ቆንጫና መላ ታ ዳቡራን ኡፋይታሸ ጬቀታይስ። 10 ታኒ ክርስቶሳ ግሾ፥ ዳቡርያ ዎደ ጫየትያ ዎደ ዋየትያ ዎደ ጎደትያ ዎደ መቶትያ ዎደ ታ ዳቡራን ኡፋይታይስ። አይስ ጊኮ፥ ታ ዳቡርያ ዎደ፥ ሄ ዎደ ምናይስ።

11 ታኒ ኤያ አሳዳ ጬቀታስ። ሄሳዳ ታ ጬቀታና መላ ኦዳይ ህንተና። ታ፥ ታ ሁጰን ኤረቶና አስ ግድኮካ፥ "ግታ ሀዋረታ" ጌተተይሳታፐ ጉፅከ። ሄሳ ታዉ ማርካታናዉ በሰይ ህንተናሽን። 12 ታ ህንተ ግዶን ደአሸ ዳንዳአን ኦዳ ማላታትነ ማላት ታ ቱማ ሀዋረ ግደይሳ በሶሶና። 13 ታ ህንተዉ ቶሆ ግዶናይሳፈ አትሽን፥ ሀራ ዎሳ ኬታፐ ህንተ አይብን ጉፅደቲ? ሄስ ባላ ግድኮ ታና ማርተ።

14 ታኒ ህንተኮ ባናዉ ጊገትሽን ሀይስ ታዉ ሄን። ታ ህንተናፐ አትሽን፥ ህንተዉ ደእያባ ኮዮና ግሾ ህንተና ዋይሳናዉ ኮይከ። የልዳይሳት ባንታ ናይታስ ሻሎ ምንጆሶናፐ አትሽን፥ ናይት ባንታና የልዳይሳታስ ሻሎ ምንጆኮና። 15 ታ ህንተ ግሾ፥ ታዉ ደእያባነ ታና አ እምንካ ታና ኡፋይሴስ። ያትን፥ ታኒ ህንተና ሄሳዳ ኬሀ ሲቅያ ዎደ ህንተ ታና ጉራ ሲቀቲ?

16 ግድኮካ፥ ታ ህንተዉ ቶሆ ግድከ፤ ዋይሳብከ፤ ሽን ህንተና ጭሞንነ ገነን ኦይክዳባ ህንተዉ ዳኖና አገና። 17 ሀር አቶሽን፥ ታ ህንተኮ ኪትዳ አሳታፐ ህንተና ጭምዳ አስ ደኢ? 18 ትቶይ ህንተኮ ባና መላ ታኒ ዎሳስ፤ ቃስ አማንያ እሻካ እያራ የዳስ። ያትን፥ ትቶይ ህንተና ጭምዴ? ኑኒ ኑ ኦሱዋ እስ አያናን ኦቦኮ? ቃስ ኑ ሀኖይካ እስኖ ግደኔ?

19 ኑ ኡባ ዎደ ህንተ ስንን ኑና ፅልሳናዉ ሞተትያባ ህንተዉ ዳኒ? ኑ ክርስቶሳን ደእድ ፆሳ ስንን ሀእ ጋካናዉ ኦዶስ። ኑ ሲቆ እሻቶ፥ ኑ ሀ ኡባ ኦይ ህንተና ድቻናሳ። 20 ታ ህንተኮ ብያ ዎደ ኦን ኤር ህንተ ታ ኮየይሳዳ ሀኖና፥ ቃስ ታካ ህንተ ኮየይሳዳ ሀኖና ጋሄቶና አጎኮ ጋዳ ያያይስ። ቃስ ኦን ኤር ህንተ ግዶን ፓላም፥ ቃናተይ፥ ሀንቆይ፥ ዪቀይ፥ ዝግርስ፥ አሳ ሱን ኢሶይ፥ ኦቶሮይነ ካች ዶና አገና ጋዳ ያያይስ። 21 ታኒ ናምአን ህንተኮ ብያ ዎደ ፆሳይ ህንተ ስንን ታና ካዉሻና ጋዳ ያያይስ። ካሰ ናጋራ ኦድ ሄ ባንታ ኦዳ ቱናተፈ፥ ላይማተፈነ ዬላይያ ኦሱዋፐ ስምቦና አሳታ በአዳ አዛኖና አግከ ጋዳ ያያይስ።