2 Coríntios 2

1 ታኒ ናምአን ህንተኮ ቢከ ጋዳ ቆፋ ቃችዳይ ህንተና አዛንና አጋናሳ። 2 ታኒ ህንተና አዛንኮካ ታ አዛንዳ ህንተፈ ሀር ታና ኡፋይሳናዉ ደኤይ ኦኔ? 3 ታኒ ህንተዉ ሄ ዳብዳብያ ፃፍዳይ፥ ታ ህንተና በአናዉ ብያ ዎደ ታና ኡፋይሳናዉ በሲያ አሳን ታ አዛናናዉ ኮዮና ግሾሳ። ታ ኡፋይትያ ዎደ ህንተ ኡባይካ ኡፋይታናይሳ ታ አማናይስ። 4 ታኒ ዳሮ ዋየንነ ኡንአን ቃስ ዳሮ አፉን ፃፍዳይ፥ ህንተና አዛንናሳ ግዶናሽን፥ ታኒ ህንተና ኡባ አይ መላ ዶስያኮ ህንተና ኤርሳና መላሳ።

ቆህዳ አስ አቶ ጉሱ

5 አሰ አዛንዳ ኦንካ ደእኮ ታ እያ ናቁዋ ዳርሳናዉ ኮይከፈ አትሽን፥ ታና ግዶናሽን፥ ህንተፈ ዳሮታ አዛንስ። 6 ህንተፈ ዳርያ አሳይ ሄ ኡራ ሴርዳ ሴራይ እያዉ ግዳና። 7 ሄሳ ግሾ፥ ሄ ኡራይ ዳሮ አዛንድ፥ ኡፋይስ ቃንፆና መላ ህንተ እያ ማራናዉነ ምንናዉ በሴስ። 8 ህንተ እያ ሲቀይሳ ዛር እያዉ ቆንጭሳና መላ ታ ህንተና ዎሳይስ። 9 ታ ሄ ዳብዳብያ ህንተዉ ፃፍዳይ፥ ህንተ ፓጨትድ፥ ኡባባን ታዉ ኪተተይሳ ኤራናዉ ኮይዳ ግሾሳ። 10 ህንተ ማርያ ኡራ ታካ ማራና። ታኒ ማራናባይ አይብ ደእኮካ፥ ክርስቶሳ ስንን ህንተ ግሾ ጋዳ ማራስ። 11 ታኒ ሄሳ ኦዳይ ፃላህያ ጭሞ ኦሱዋ ኑ ኤርያ ግሾ፥ ፃላሄን ጭመቶና አታና መላሳ።

ክርስቶሳን ደእያ ፆኖ

12 ታኒ ክርስቶሳ ዎንገላ ሳባካናዉ ፅሮኣዳ ብዳ ዎደ፥ ጎዳይ ያን ታዉ ኦሶ ኦገ ጊግስድ ዎስ።✝2:12 ሀዋ 20:1. 13 ሽን ታኒ ታ እሻ ትቶ ያን ደማቦና ግሾ ታ ዎዛናይ ሸምፕቤና። ሄሳ ግሾ፥ ያን ደእያ አሳ ሳሮዳ እያ ኮያናዉ ማቀዶነ ባስ።

14 ሽን ክርስቶሳ ባጋራ ኡባ ዎደ ኑና ፆኖን ካለያነ ሽቶ መላ ሳውያ ክርስቶሳባ ኑ ኤርያ ትምርትያ ኡባ በሲ ጋና መላ ኦያ ፆሳ ጋላት ጋኮ። 15 ኑኒ አትያ አሳ ግዶንነ ይያ አሳ ግዶን ክርስቶሳ ባጋራ ፆሳስ እመትዳ ሳውያ ሽቶ መላ። 16 ያ አሳስ ሀይቆኮ ኤፍያ ሀይቆ ፔኖ፤ ቃስ አትያ አሳስ ደኦኮ ኤፍያ ደኦ ሳዎ፤ ያትን፥ ሄሳ መላ ኦሶስ ግዳናይ ኦኔ? 17 ኑኒ ፆሳ ቃላ ዎ ደማናዉ ኮይድ ዋላክድ ዛልእያ ዳሮ አሳ መላ ግዶኮ። ሽን ፆሳይ ኪትዳ ሱረ አሳታ መላ ክርስቶሳን ደእድ ፆሳ ስንን ቃላ ኦዶስ።