2 Tessalonicenses 2

ጌላ ኡራ

1 ኑ እሻቶ፥ ኑ ጎዳ የሱስ ክርስቶሳ ዩሳባነ ኑ እያራ ጋሄታናዉ ሺቃናባስ ኑ ህንተና ዎሶስ።✝2:1 እሳ 2:10. 2 ትንብተን ዎይኮ ሀራ አሳፐ ስእዳ ቃላን ዎይኮ ኑፐ ኤክዳ ኪታዳ ኦድ፥ "ጎዳ ጋላሳይ ጋክስ" ግድ ህንተ ዎዛናይ ዳጋሞፎነ ዋባቆፖ። 3 ህንተና ኦንካ አይ ኦገንካ ባለፎ። ካሰትድ ጌላተይ ቆንጮናነ ዮይ በሲያ ጌላ ኡራይ ዮና ደእሽን፥ ጎዳ ጋላሳይ ጋከና። 4 አስ ጎይንያባነ ፆሳያባ ኡባ እ እፃናነ ባና ቁ ኦና። ሀር አቶሽን፥ ፆሳ ኬ ገል ኡትድ፥ "ታኒ ፆሰ" ጋና።✝2:4 ዳነ 11:36፤ ህዝ 28:2.

5 ታኒ ህንተራ ደአሸ ህንተዉ ኦድዳይሳ አኬከከቲ? 6 እ ባ ጋላሳን ያናፐ አትሽን፥ ሀእ ያናይሳ አይብ እያ ተቅያኮ ህንተ ኤሬታ።

7 አሳስ ቆንጭቦና ጌላተ ፁራ ዎልቃይ ሀእካ ኦስ፥ ሽን ሀእ እያ ተቀይስ ደኤስ። እያ ተቀይስ ኦገፐ ክቻና ጋካናዉ እ ቆንጨና። 8 ሄሳፈ ጉየ፥ ጌላ ኡራይ ቆንጫና፥ ሽን ጎዳ የሱሲ ባ ዶናፐ ከይያ ሸምፑዋን፥ ባ ቦንቾ ዩሳን እያ ዎና።✝2:8 እሳ 11:4. 9 ጌላ ኡራይ፥ ፃላሄ ዎልቃን ይድ ዎርዶ ማላታታነ ማላልስያባታ ኦና።✝2:9 ማቶ 24:24. 10 ሄሳዳካ፥ ዮስ ደእያ አሳታ ዱማ ዱማ ጭምያ ኢታ ኦሶን ባለና። ኤንቲ ይዳይ አሽያ ቱማ ዶስድ ኤኮና እፅዳ ግሾሳ። 11 ሄሳ ግሾ፥ ኤንቲ ዎርዶ ግድያባ አማናና መላ ፆሳይ ዎልቃማ ባለሶ ኤንታ ቦላ የዳና። 12 ሄስካ፥ ቱማ አማኖና አሳት፥ ናጋራ ኦሶን ኡፋይተይሳት ኡባይ ፕርደታና መላሳ።

አማንያ አስ ግዳ

13 ጎዳይ ዶስያ ኑ እሻቶ፥ ኑኒ ፆሳ ህንተ ግሾ፥ ኡባ ዎደ ጋላታናዉ በሴስ። ህንተ አታና መላ ፆሳይ ጌሻ አያና ዎልቃን ህንተና ጌሽዳይሳነ ህንተካ ቱማ አማንዳይሳን እ ህንተና ባይራዳ ዶርስ። 14 ፆሳይ፥ ኑ ህንተዉ ኦድዳ ዎንገላ ባጋራ ህንተና ፄግዳይ፥ ህንተ ኑ ጎዳ የሱስ ክርስቶሳራ እስፈ ቦንቸታናሳ። 15 ህዛ፥ ኑ እሻቶ፥ ምንድ ኤቅተ። ኑኒ ህንተና ኑ ዶናን ግድን ዎይኮ ዳብዳብያን ግድን ታማርስዳ ትምርትያ ኦይክተ።

16,17 ፆሳይ ኑ አዋይ ኑና ዶሴስ። እ ኑስ ኬሀ፤ እ መርና ምንነ ሎኦ ኡፋይሳ ኑስ እሚስ። ህንተ ኡባ ዎደ ሎኦባ ኦናዉነ ኦደታናዉ ምንና መላነ ማዳና መላ ኑ ጎዳ የሱስ ክርስቶሳነ ፆሳ ኑ አዋ ዎሶስ።