Atos 15

የሩሳላመ ሺቁዋ

1 እስ እስ አሳት ይሁዳፐ አንፆከ ብድ፥ "ሙሰ ዎጋ ህንተ ቃፃረቶና እፅኮ አታናዉ ዳንዳኤከታ" ግድ አማነይሳታ ታማርሶ ዶምዶሶና።✝15:1 ሌወ 12:3. 2 ሄስ ጳዉሎሳነ ባርናባሳ ኤንታራ ዳሮ ፓላማናዳነ ካጫናዳ ኦስ። ሄሳ ግሾ፥ አንፆከን ደእያ እስ እስ አሳት ጳዉሎሳራነ ባርናባሳራ የሩሳላመ ብድ ሀዋረታራነ ጭማታራ ጋሄትድ ሄ ኦዳ ብላናዉ ቆፋይ ቃሸትስ።

3 ዎሳ ኬይ ኤንታ ኪትን ብዶሶና። ኤንቲ ስሮፍንቀ ሳማረራ አሸ አይሁደ ግዶናይሳት ፆሳኮ ዋንድ ስምዳኮ ኦድዶሶና። ሄስ አማነይሳታ ኡባ ዳሮ ኡፋይስስ። 4 ኤንቲ የሩሳላመ ጋክዳ ዎደ ዎሳ ኬይ፥ ሀዋረትነ ጭማት ኤንታ ሞክዶሶና። ፆሳይ ባንታራ ኦዳባ ኡባ ኦድዶሶና። 5 ሽን ፋርሳወታ ባጋፈ አማንዳ እስ እስ አሳት ደንድ ኤቅድ፥ "አይሁደ ግዶናሽን አማንዳ አሳት ቃፃረታናዉነ ሙሰ ህገ ናጋናዉ በሴስ" ያግዶሶና።

6 ሀዋረትነ ጭማት ሄሳ ዞረታናዉ ሺቅዶሶና። 7 ዳሮ ዞረትዳፐ ጉየ፥ ጰፅሮስ ደንድ ኤቅድ፥ "ታ እሻቶ፥ አይሁደ ግዶናይሳት ዎንገላ ቃላ ታ ዶናፐ ስእድ አማናና መላ ካሰትድ ታና ፆሳይ ህንተ ግዶፈ ዶርዳይሳ ህንተ ኤሬታ።✝15:7 ሀዋ 10:1-43. 8 አሳ ዎዛና ኤርያ ፆሳይ ጌሻ አያና ኑስ እምዳይሳዳ ኤንታዉካ እምድ ቱማይስ።✝15:8 ሀዋ 2:4፤ 10:44. 9 አማኖን ኤንታ ዎዛና ጌሽዳ ግሾ ኑ ግዶንነ ኤንታ ግዶን ዱማተ ዎቤና። 10 ሄሳ ግሾ፥ ኑ አዋትነ ኑኒ ቶካናዉ ዳንዳእቦና ቃምባራ አማነይሳታ ሞርገን ዎድ ሀእ አይስ ህንተ ፆሳ ፓጨቲ? 11 ጎዳ የሱስ ክርስቶሳ አ ኬሀተን ኤንቲ አትዳይሳዳ ኑካ አትዳይሳ አማኖስ" ያግስ።

12 አሳይ ስእ ግድ፥ ባርናባስነ ጳዉሎስ አይሁደ ግዶና አሳ ግዶን ባንታ ባጋራ ፆሳይ ኦዳ ማላታታነ ኦራባ ኡባ ኦድሽን ስኦሶና።

13 ኤንቲ ሃሳያ ኦንግዳፐ ጉየ ያይቆብ፥ "እሻቶ፥ ታ ገይሳ ስእተ። 14 ፆሳይ አይሁደ ግዶናይሳታ ግዶፈ ባ አሰ ዶራናዉ ኮይድ ኤንታና ኮይሮ ዋትድ ቆፕዳኮ ስሞን ኦድስ። 15 ናበታ ቃላይ ሀይሳራ እስኖ። ጌሻ ማፃፋን፥

16 " ‘ሀይሳፈ ጉየ፥ ታኒ ስማና፥

ኩንድዳ ዳዊታ ካዎተ ደንና።✝15:16 አሞ 9:11-12.

ላለትዳ ኬካ ዛራ ኤሳና።

17 አትዳ አሳ ኡባይ ታኮ ያና፥

ታኒ ፄግዳ አይሁደ ግዶና አሳ ኡባይ ታና ኮያና።

18 በንፐ ዶማዳ ሄስ ኤረታና መላ ኦዳ

ፆሳይ፥ ታኒ ያጋይስ’ ያጌስ።

19 "ሄሳ ግሾ፥ ታ ቆፋይ ፆሳኮ ስምያ አይሁደ ግዶናይሳታ ኑኒ ዋይሶናኮ ሎኦ። 20 ሽን ኤንቲ ኤቃስ ያርሸትድ ቱንዳባ ሞና መላ፥ ላይማቶና መላ፥ ባዉታ ሞና መላነ ሱ ኡዮና መላ ኤንታዉ ኑኒ ዳብዳበ ፃፋናዉ ኮሼስ።✝15:20 ከሳ 34:15-17፤ ሌወ 17:10-16፤ 18:6-23. 21 ሙሰ ህገይ በንፐ ዶምድ ሳምባታን ሳምባታን አይሁደ ዎሳ ኬታን ናባበትሸ ካታማ ኡባን ሳባከቴስ" ያግስ።

22 ሄሳፈ ጉየ፥ ሀዋረትነ ጭማት ዎሳ ኬ አሳ ኡባራ እስፈ ባንታ ግዶፈ ጉ አሳታ ዶርድ ጳዉሎሳራነ ባርናባሳራ አንፆከ የዳናዉ ቆፋ ቃችዶሶና። ኤንቲ ዳሮ ቦንቸትዳ ናምኡ አሳታ ባርሳባሳ ጌተትያ ይሁዳነ ስላሰ ዶርዶሶና። 23 ሀይሳዳ ጌተትድ ፃፈትዳ ዳብዳበ ኤንታ ቦላ የድዶሶና፦ "ኑኒ ሀዋረትነ ጭማት ህንተ እሻት፥ አንፆከን፥ ሶረንነ ክልቀን ደእያ አይሁደ ግዶና እሻታስ ኑ ሳሮዋ ኪቶስ።

24 "ኑኒ ኪቶና አሳት ኑ ግዶፈ ብድ፥ ‘ህንተ ቃፃረታናዉነ ህግያ ናጋናዉ በሴስ’ ግድ፥ ህንተና ዋይስዳይሳነ ይሎይዳይሳ ስእዳ። 25 ኑኒ ዶስያ ባርናባሳነ ጳዉሎሳ ዶረትዳ አሳታራ እስፈ ህንተኮ ኪታናዉ እስ ዎዛናን ኑ ቆፋ ቃችዳ። 26 ኤንቲ ኑ ጎዳ የሱስ ክርስቶሳ ግሾ ባንታ ደኡዋ አድ እምዶሶና። 27 ሄሳ ግሾ፥ ኑኒ ፃፍዳይሳ ኤንቲ ባንታ ዶናን ጉጅድ ህንተዉ ኦዳና መላ ይሁዳነ ስላሰ ኪትዳ።

28 "ሀ ኮሸይሳታፐ አትሽን፥ ሀራ ቶሆ ህንተና ቶሶና መላ ኑነ ጌሻ አያናይ ኦዳ ቃችዳ። 29 ኤቃስ ያርሸትድ ቱንዳባ ሞፕተ፥ ሱ ኡዮፕተ፥ ባዉታ ሞፕተ፥ ላይማቶፕተ። ሀ ኡባፈ ህንተ ሁጵያ ናግኮ ህንተ ሎኦባ ኦታ። ህዛ፥ ሳሮ ደእተ" ያግዶሶና።

30 ሄሳ ግሾ፥ ኪተትዳይሳት ሞይዘትድ አንፆከ ብድ አማንያ አሳ ሺሽድ፥ ዳብዳበ እምዶሶና። 31 ኤንቲ ሄ ምንያ ዳብዳብያ ናባብዳ ዎደ ኡፋይትዶሶና። 32 ቃስ ይሁድነ ስላሰይ ባንታ ሁጰን ናበ ግድያ ግሾ አማነይሳታ ሎይ ዞርድ ምንዶሶና። 33 ኤንቲ አንፆከን ጉ ጋላስ ኡትዳፐ ጉየ እሻት ሎኦራ ሞይዝን ባንታና ኪትዳይሳታኮ ስምዶሶና። 34 *15:34 እስ እስ ማፃፋታን ፓይዶ 34 ባዋ። [ሽን ስላሰይ ያን አታናዉ ኮይስ]።

35 ቃስ ጳዉሎስነ ባርናባስ ሀራ ዳሮ አሳታራ እስፈ ጎዳ ቃላ ታማርስሸነ ዎንገላ ኦድሸ አንፆከን ጋምእዶሶና።

ጳዉሎሳነ ባርናባሳ ሻከተ

36 ጉ ጋላሳፐ ጉየ ጳዉሎስ ባርናባሳኮ፥ "ኑኒ ጎዳ ቃላ ኦድዳ ካታማ ኡባን አማነይሳት ዋንድ ደእያኮ ጉየ ስምሸ ፆሞስ በኦስ" ያግስ። 37 ባርናባስ ማርቆሳ ጌተትያ ዮሃንሳ ባንታራ ኤፋናዉ ኮይስ። 38 ሽን ጳዉሎስ ማርቆሳ ባንታራ ኤፋናዉ ኮይቤና። ጋሶይካ፥ እ ጵንፍለን ሻከትድ ኤንታራ ኦናዉ ብቤና።✝15:38 ሀዋ 13:13. 39 ኤንታ ግዶን ኢታ ኦሽ ከይን እሶይ እሱዋፈ ሻከትዶሶና። ባርናባስ ማርቆሳ ኤክድ ማርካበራ ቆጵሮሳ ብስ። 40 ሽን ጳዉሎስ ስላሰ ዶርስ፤ አማነይሳት ጳዉሎሳ ፆሳ አ ኬሀተስ ሀዳራ እምዳፐ ጉየ፥ እ ከይድ ብስ። 41 ያትድ፥ ዎሳ ኬታ ምንሸ ሶረራነ ክልቅያራ አስ።