1 ጳዉሎሳራነ ስላሰራ አምፍጶልሳራነ አጶሎናራ አድ ተሰሎንቀ ብዶሶና። ያን አይሁደ ዎሳ ኬ ደኤስ። 2 ጳዉሎስ ካሰይሳዳ ያ ገልስ። ሄሳን ሄ ሳምንታ ፆሳ ቃላፐ አሳስ ኦድስ። 3 ክርስቶስ ዋየ ኤካናዉነ ሀይቆፐ ደንዳናዉ በሰይሳ ኤንታዉ ቆንጭስድ ኦድሸ፥ "የሱሲ ሀ ታኒ ህንተዉ ኦደይስ ክርስቶሳ" ያግስ። 4 ኤንታፈ እሶት እሶት ኦዳይ ቱማ ግደይሳ ማእድ ጳዉሎሳራነ ስላሰራ እስፍዶሶና። ሄሳዳካ፥ ፆሳ ጎይንያ ዳሮ ግርከ አሳይነ ዳሮ ቦንቸትዳ ማጫሳትካ ኤንታራ እስፍዶሶና።

5 ሽን አይሁደት ቃናትድ እስ እስ ኦሶይ ባይና ኢታ አሳታ ኦገፐ ሺሽዶሶና። ካታማን ቡቀ ከስዶሶና፤ ጳዉሎሳነ ስላሰ አሳስ አድ እማናዉ ኮይድ ያሶና ኬ ተቅዶሶና። 6 ጳዉሎስነ ስላ ኤንታዉ በንቶና እፅን፥ ያሶናነ እስ እስ አማነይሳታ ካታማ ሀላቃታኮ ጎች ኤፍድ፥ "ሀይሳቲ ቢታ ኡባ ቡቀይሳት ሀእ ኑኮ ይዶሶና። 7 ያሶን ኤንታ ባ ሶን ዎስ። ሀይሳቲ፥ ‘የሱሳ ጌተትያ ሀራ ካዎይ ደኤስ’ ግድ ቄሳረ ኪታ መንሶና" ያግድ ቁ ግዳ ቃላን ኦድዶሶና።

8 ሺቅዳ አሳይነ ካታማ ሀላቃት ሄሳ ስእድ ሀናናባ ይዶሶና። 9 ሀላቃት ያሶናነ ሀራታ ዋሰራ ብልዶሶና።

10 አማነይሳት ጳዉሎሳነ ስላሰ ቃማራ ቤርያ የድዶሶና። ቤርያ ጋክድ፥ አይሁደ ዎሳ ኬ ገልዶሶና። 11 ቤርያ አሳይ ተሰሎንቀ አሳፐ አዳ ሱረታ። ኤንቲ ቃላ ኩመ ዎዛናፐ ኤክዶሶና፤ ጳዉሎስ ግዳይስ ቱማ ግደይሳ ሻክ ኤራናዉ ጋላስ ጋላስ ጌሻ ማፃፋታ ፕልጎሶና። 12 ሄሳ ግሾ፥ ኤንታፈ ዳሮት፥ ግርከታፐካ ቦንቸትዳ ዳሮ ማጫሳትነ ዳሮ አደት አማንዶሶና።

13 ሽን ተሰሎንቀን ደእያ አይሁደት ጳዉሎስ ፆሳ ቃላ ቤርያንካ ኦድዳይሳ ስእዳ ዎደ ቤርያ ይድ አሳ ቡቅዶሶና። 14 ሄሳፈ ጉየ፥ አማነይሳት ኤለስድ ጳዉሎሳ አባ ማት የድዶሶና። ሽን ስላሰይነ ፅሞትዮስ ቤርያን አትዶሶና። 15 ጳዉሎሳ ሞይዝዳ አሳት አቴና ጋዶሶና። ሄ አሳት ስላሰይነ ፅሞትዮስ ባንታዉ ዳንዳኤትዳ መላ ኤለስድ ባኮ ያና መላ ጳዉሎስ ኪትዳ ኪታ ኤክድ ቤርያ ስምዶሶና።

16 ጳዉሎስ አቴናን ስላሰነ ፅሞትዮሳ ናግሸ፥ ካታማን ኤቅ ኩምዳይሳ በእድ ይሎትስ። 17 ሄሳ ግሾ፥ አይሁደ ዎሳ ኬን አይሁደታራነ ፆሳ ጎይንያ አይሁደ ግዶና አሳራ ቃስ ባራ ጋሄትያ አሳራ ኡባ ጋላስ ፓላሜስ። 18 ኤፕቆሮሰነ እስቶይከ ጌተትያ ጩጋታፐ እስ እስ ኤራንቾት ጳዉሎሳራ ፓላምዶሶና። ኤንታፈ እሶት እሶት፥ "ሀ ዮያማይ አይ ኦዳናዉ ኮዪ?" ያግዶሶና።

ሀራት ጳዉሎስ የሱሳባነ ሀይቆፐ እ ደንድዳይሳ ባንታዉ ኦድዳ ግሾ፥ "ኦራ ፆሳታባ ኦድያ ዳኔስ" ያግዶሶና።

19 ጳዉሎሳ ኦይክድ አርዮስፓጎሳ ጌተትያ ሺቆ በሳ ኤፍድ፥ "ሀ ኔኒ ታማርስያ ኦራባይ አይበኮ ኑና ኤርስኪ? 20 አይስ ጊኮ፥ ኔኒ ኑስ ኦራባ ኦዳሳ፤ ህዛ ሄስ አይበኮ ኑኒ ኤራናዉ ኮዮስ" ያግዶሶና። 21 አቴና አሳ ኡባይነ ያን ደእያ እማ አሳይ ኦራባ ኦደቶናነ ስኦና ፔኦኮና።

22 ጳዉሎስ አርዮስፓጎሳ ስንን ኤቅድ፥ "አቴና አሳቶ፥ ፆሳታስ ኡባባን ህንተ ዳሮ ያየይሳ ታኒ በአይስ። 23 ታኒ ህንተ ካታማራ ዩያሸ ህንተ ጎይንያ በሳታ በእያ ዎደ፥ ‘ኤረቶና ፆሳስ’ ጌተትድ ፃፈትዳ ያርሾ በሳ ደማስ። ሀ ህንተ ኤሮናሽን ጎይነይሳ ታኒ ህንተዉ ኦዳይስ። 24 ሳአነ ሳአን ደእያ ኡባባ መዳ ፆሳይ፥ ሳሎነ ሳአ ጎዳይ፥ አስ ኬፅዳ ኬን ዴና።✝ 25 እ ደኦ፥ ሸምፖነ ኡባባ አሳ ኡባስ እምያ ግሾ ፓጭ ደእያ አሳዳ አሳ ማደ ኮየና። 26 ፆሳይ አሳ ኮቸ ኡባ እስ አድያፈ መድ ቢታ ኡባን ዎስ። ያትድ ኤንቲ ዳና ዎድያስነ በሳስ ዛዋ እሚስ። 27 እ ሄሳ ኦዳይ አስ እያ ኮያና መላነ ፕልግድ ደማና መላሳ። ሀንኮካ እ ኑፐ ጌምቤና። 28 ህንተፈ እስ እስ የፀይሳት፥ ‘ኑኒ እያ ናይታ’ ግዳይሳዳ፥ ‘ኑኒ እያን ፓፃ ደኦስ፥ ቃፆስ።’ 29 ህዛ፥ ኑኒ ፆሳ ናይታ ግድያ ግሾ፥ ‘ፆሳይ አሳ ሂላተንነ ቆፋን ዎርቃፈ ዎይኮ ብራፐ ዎይኮ ሹቻፈ ኦሰትዳባ ዳኔስ’ ያግድ ቆፓናዉ በሰና። 30 ሄሳ ግሾ፥ ፆሳይ በን ዎደ አሳይ ኤሮና ኦዳይሳ አግድ አስ። ሽን ሀእ ኡባ በሳን ደእያ አሳይ ናጋራፐ ስማና መላ ኪቴስ። 31 አይስ ጊኮ፥ ፆሳይ ባ ዶርዳ አድያን ሳአን ደእያ አሳ ኡባ ቦላ ፅሎ ፕርዳ ፕርዳናዉ ቃማ ጊግስ ዎስ። እያ ሀይቆፐ ደንድ ሄሳ አሳ ኡባስ ቱማይስ" ያግስ።

32 ኤንታፈ እስ እስ አሳት ሀይቆፐ ደንዶባ ጳዉሎሳፐ ስእድ፥ እያ ቦላ ቀልቅስዶሶና። ሽን ሀራት፥ "ኑኒ ሄሳ ኔፐ ጉጅድ ስአናዉ ኮዮስ" ያግዶሶና። 33 ሄሳ ግሾ፥ ጳዉሎስ ኤንታ ግዶፈ ከይስ። 34 ሽን እስ እስ አደት ጳዉሎሳራ ጋከትድ አማንዶሶና። ኤንታ ግዶፈ አርዮስፓጎሳን ሺቁዋን ደእያ ድዮናስዮሳ ጌተትያ አደይ፥ ዳማርሶ ጌተትያ እስ ማጫስያነ ሀራት ደኦሶና።