Daniel 6

ዳነል ጋሞ ኦላን

1 ካዎይ ዳርዮስ ባ ካዎተ ኡባ ግዶን ባፐ ጋርሳራ ቢታ ሃርያ ፄታነ ላታሙ አሳታ ሹማናዉ ቆፕስ። 2 ካዋስ አይብካ ፓጮና መላ ሹማታ አዋተን ፄላና መላ ሄ አሳታ ሀላቃ ኦድ ዶርስ፤ ዶረትዳይሳታፐ እሶይ ዳነላ። 3 ዳነል ኦሶ ኦናዉ ባዉ ደእያ ዱማ ኤራን ሀራ ሀላቃታፐነ ሹማታፐ አድ በንትስ። ሄሳ ግሾ፥ ካዎይ እያ ባ ኩመ ካዎተ ቦላ ሹማናዉ ቆፕስ።

4 ቢታ ሹማትነ ሀላቃት ዳነላ ሞታናዉ፥ እ አይስያ አይሱዋ ቦላ ባላ ደማናዉ ኮይዶሶና። ሽን እ፥ ባና ናግያነ አማነትዳ አስ ግድያ ግሾ፥ እያ ሞታናዉ እያ ቦላ አይ ባላካ ደምቦኮና። 5 ዉርሰን ኤንቲ፥ "እያ ፆሳ ህግያ ባጋራ ግዶና እፅኮ፥ ሀራ ባጋራ ዳነላ ሞትያባ ደሞኮ" ያግዶሶና።

6 ሄሳፈ ጉየ፥ ቢታ ሹማትነ ሀላቃት እስፈ ካዋኮ ብድ፥ ሀይሳዳ ያግዶሶና፦ "ካዋዉ ዳርዮሳ፥ መርናዉ ካዎታ! 7 ኑኒ ነ ካዎተ ኦሶ ኦያ ሀላቃት፥ ሹማት፥ አይሰይሳት፥ ዞረይሳትነ ቢታ ሃረይሳት ኡባይ ዞረትዳ እስ ዞረይ ደኤስ። ሄስካ ሀስታሙ ጋላስ ጋካናዉ፥ አይ አስካ ካዋ ዎሳናፐ አትሽን፥ ሀራ አይ አስ ዎይኮ አይ ፆሰ ዎሶናዳ፥ ኔኒ አዋጆ ከሳና መላሳ። ሄ አዋጁዋ ኤኮናይ ጋሞ ኦላን የገታና መላ ኔኒ ኪታ። 8 ህዛ ካዋዉ፥ ሀ አዋጆይ ሻረቶና ሜዶናነ ፋርሰ ህገዳ ምኖነ ላመቶናይሳ ግዳና መላ ፓራማ" ያግዶሶና። 9 ሄሳ ግሾ፥ ካዎይ ዳርዮስ አዋጁዋ ፃፍድ ፓራምስ።

10 ዳነል አዋጆይ ፓራመትድ ከይዳይሳ ኤርዳ ዎደ ባ ሶ ብስ፤ ፖቀ ቦላ ደእያ ክፍልያ ገልስ። ሄ ክፍልያ ማስኮተይ የሩሳላመ ባጋ ስሚድ ዶየትድ ደእሽን፥ ካሰ ዎሰይሳዳ ጉልባትድ፥ ባ ፆሳ ጋላትሸ፥ እስ ጋላሳን ሄ ቶሆ ዎሴስ።

11 ሄ አሳት እስፈ ብድ፥ ዳነል ባ ፆሳ ዎስሽንነ ባ ጎዳ ማዶ ኦይችሽን ደምዶሶና። 12 ኤንቲ ካዋኮ ብድ፥ "ካዋዉ፥ ሀስታሙ ጋላሳታ ግዶን ነ አትሽን፥ ሀራ አይ አሰ ዎይኮ አይ ፆሰ ዎስያ ኦንካ ጋሞ ኦላን የገታና መላ አዋጆ ከሳብኪ?" ያግዶሶና።

ካዎይ ዛሪድ፥ "ኤ አዋጃይ ከይስ፤ ሻረቶና ሜዶናነ ፋርሰ ህገዳ ምንዳይሳ" ያግስ።

13 ኤንቲ፥ "ካዋዉ፥ ሄኮ ይሁዳፐ ድኤትድ፥ ይዳ አሳፐ እሶይ፥ ዳነል፥ ነዉ ግድን ነ ፓራማዳ ከስዳ ነ አዋጁዋካ ኪተተና። እ ሀእ ጋካናዉ ጋላሳን ሄ ቶሆ ባ ፆሳ ዎሴስ" ያግዶሶና።

14 ካዎይ ሄሳ ስእዳ ዎደ ዳሮ አዛንስ፤ ዳነላ አሻናዉ ቆፕድ፥ አው ዉላና ጋካናዉ እያ አሻና ኦገ ኡባ ኮይስ። 15 ሄ ዎደ አሳት እስፈ ካዋኮ ብድ፥ "ካዋዉ፥ ሜዶናነ ፋርሰ ህግያዳ፥ ካዎይ አዋጅዳ አዋጆይ ዎይኮ ኪታይ ላመቶናይሳ ኤራ" ያግዶሶና።

16 ካዋ ኪታን፥ ዳነላ ኤህድ፥ ጋሞ ኦላን የግዶሶና። ካዎይ ዳነላኮ፥ "ነ ኡባ ዎደ ጎይንያ ፆሳይ ነና አሾ" ያግስ። 17 ኤንቲ ሹቹ ኤህድ፥ ኦላ ዶና ጎርድዶሶና። ኦንካ ዳነላ ቦላ ኦሰትዳባይ ላመቶና መላ፥ ካዎይ ባ ማታመነ ባ ሞርናታ ማታመ ሹቻ ቦላ ዎስ። 18 ካዎይ ባ ጋ ስሚድ፥ ካ ሞናነ ኡፋይስያባ ባኮ ሺሾና፥ ስኮ ይድ አቅስ።

19 ካዎይ ዎንታ ጉራ ደንድድ፥ ኤለስድ ጋሞ ኦላኮ ብስ። 20 እ አዛንሸ ያ ጋክድ፥ "ደኦ ፆሳ አይልያዉ፥ ዳነላ፥ ኔኒ ኡባ ዎደ ጎይንያ ነ ፆሳይ፥ ነና ጋሞታፐ አሻናዉ ዳንዳእዴ?" ያግድ ፄግስ።

21 ዳነል ዛሪድ፥ "ካዋዉ፥ መርናዉ ካዎታ! 22 ታ ፆሳይ ባ ኪታንቹዋ ኪትድ፥ ጋሞታ ዶና ጎርድስ፤ ኤንቲ ታና ቦችቦኮና። ታኒ እያ ስንን ፅሎ፤ ቃስ ካዋዉ፥ ነ ስንንካ ባላ ኦብከ" ያግስ።

23 ካዎይ ዳሮ ኡፋይትድ፥ ዳነላ ኦላፈ ከሳና መላ ኪትስ። ዳነል ኦላፈ ከይስ፤ እ ባ ፆሳን አማነትዳ ግሾ፥ እያ አሳተ ቦላ ቆሆይ በንትቤና። 24 ካዎይ ዳነላ ሞትዳ አሳታ ኤሀና መላ ኪትስ። ኤንቲ ኦይከትድ፥ ባንታ ማቸታራነ ባንታ ናይታራ ይድ፥ ኡባይ ጋሞ ኦላን የገትዶሶና። ኤንቲ ኦላ ዉርሰ ጋኮና ደእሽን፥ ጋሞት ጉፕ ኤክድ፥ ኤንታ መቀ መንረ አግዶሶና።

25 ካዎይ ዳርዮስ አሳስ፥ ካዎተታስነ ዱማ ዱማ ዶናን ኦደትያ ኮቻታስ ሀይሳዳ ያግድ ፃፍስ፦

"ሳሮይ ህንተዉ ግዶ!

26 "ታ ካዎተን ደእያ አሳ ኡባይ ዳነላ ፆሳ ያያና መላነ ኮኮራና መላ ታኒ አዋጆ ከሳስ።

"እ መርናዉ ደእያ ደኦ ፆሳ፤

እያ ካዎተይ ፖሎ የና፤

እያ ካዎተስ ዛው ባዋ።

27 እ፥ አሼስ፤ መቶፐ ከስድ ኤኬስ፤

ሳሎንነ ሳአን ማላታነ ማላታታ ኦስ፤

እ፥ ዳነላ ጋሞታ ዶናፐ አሽስ" ያግስ።

28 ዳነል ዳርዮሳ ካዎተ ዎደነ ፋርሰ ካዋ ቅሮሳ ካዎተ ዎደ ኡባን እንጀትን ደእስ።