ታቦተይ የሩሳላመ ስምስ
(1 ታር 13:1-14፤ 15:25—16:6)
1 እስራኤለ ግዶፈ ዶረትዳ ሀስታሙ ሙኩሉ አሳታ ዳዊቲ ዛሪድ ሺሽስ። 2 ዳዊቲነ እያ አሳ ኡባይ ይሁዳ ባላ6:2 ይሁዳ ባላ፦ ቅርያት ይኣርመ ጉሱ። ካታማፐ ደንድድ፥ ክሩበታፐ ግዶን ባ ካዎተ አራታ ቦላ ኡትዳ ኡባፈ ዎልቃማ ጎዳ ሱንን ፄገትዳ ፆሳ ታቦትያ ኤሀናዉ ብዶሶና። 3 ኤንቲ ፆሳ ታቦትያ ኦራ ጋረን ዎድ፥ ደረ ሁጰን ደእያ አምናዳበ ሶፐ ኤህዶሶና። አምናዳበ ናይት ኦዝነ አህዮይ ኦራ ጋርያ ካለሶና። 4 ደረ ሁጰን ደእያ አምናዳበ ሶፐ ፆሳ ታቦትያ ኤህያ ዎደ አህዮይ ታቦትያፐ ስንራ ሄመቴስ። 5 ዳዊቲነ እስራኤለ አሳ ኡባይ ዲን፥ ማስንቆን፥ ካራቦን ዳላንነ ሻሾተን ካእሸ ባንታ ኩመ ዎልቃን ጎዳ ስንን ኡፋይትድ ቦንቾሶና።
6 ናኮን ካ ቡክያ ዉዱማ ጋክያ ዎደ ቦራት በትን፥ ኦዝ ባ ኩሽያ የድድ፥ ፆሳ ታቦትያ ኦይክስ። 7 ኦዝ ታቦትያ ቦችዳ ግሾ ጎዳ ሀንቆይ እያ ቦላ ኤፅስ። ፆሳይ እያ ሾጭን ሄ በሳን ፆሳ ታቦትያ ማታን ሀይቅስ። 8 ጎዳ ሀንቆይ ኦዛ ሾጭዳ ግሾ ዳዊቲ አዛንስ። ሄ በሳይ ሀች ጋካናዉ ኦዝ ሾጨትዳ በሳ ጌተቴስ።
9 ሄ ጋላስ ዳዊቲ ጎዳ ያይዳ ግሾ "ጎዳ ታቦተይ ታኮ ዋንድ ያኔ?" ያግስ። 10 ሄሳ ግሾ፥ እ ጎዳ ታቦትያ ባራ ዳዊታ ካታማ ኤሀናዉ ኮይቤና። ሄሳ አግድ ጋተ አድያ አብዳራ ሶ ኤፍስ። 11 ጎዳ ታቦተይ አብዳራ ሶን ሄ አጌና ጋምእስ፤ ጎዳይ አብዳራነ እያ ሶ አሳ ኡባ አንጅስ።
12 ፆሳ ታቦትያ ግሾ ጎዳይ አብዳራ ሶ አሳነ እያዉ ደእያ ኡባ አንጅዳይሳ ካዎይ ዳዊቲ ስእስ። ሄሳ ግሾ፥ ዳዊቲ አብዳራ ሶ ብድ፥ ፆሳ ታቦትያ ዳዊታ ካታማ ኡፋይሳን ኤህስ። 13 ዳዊቲ ጎዳ ታቦትያ ቶክዳ አሳት ኡሱፑና ታንጎ ታንግዳ ዎደ ኤንታ ኤስድ፥ እስ ኮርማነ እስ አንቃራ ማር ያርሽስ። 14 ዳዊቲ ሊኖፐ ኦሰትዳ ኤፉደ ማእድ፥ ባዉ ደእያ ዎልቃ ኡባን ጎዳ ስንን ዱርስ። 15 ዳዊቲነ እስራኤለ አሳ ኡባይ ኡፋይሳን እልልሸነ ሞይዘ ፑንሸ ጎዳ ታቦትያ ዳዊታ ካታማ ኤህዶሶና።
16 ጎዳ ታቦተይ ዳዊታ ካታማ ገልያ ዎደ ሳኦላ ናእያ መልኮላ ማስኮተራ ፄላዳ፥ ካዎይ ዳዊቲ ጎዳ ስንን ጉፕሽንነ ዱርሽን በአዳ ባ ዎዛናን ካሱ።
17 ዳዊቲ ጎዳ ታቦትያ ዎናዉ ቶልዳ ዱንካንያ ግዶን ታቦትያ ዎን፥ ዳዊቲ ፁሳ ያርሾነ እስፈተ ያርሾ ጎዳስ ያርሽስ። 18 ዳዊቲ ፁሳ ያርሾነ እስፈተ ያርሾ ያርሽዳፐ ጉየ ኡባፈ ዎልቃማ ጎዳ ሱንን አሳ አንጅስ። 19 እስራኤለ አሳ ኡባስ፥ ማጫስ አደስ ሁጰን ሁጰን እስ እስ ኡይ፥ እስ እስ ቃንፆ አሾነ እስ እስ ዎይነ ኑካ ግሽስ። ሄሳፈ ጉየ አሳ ኡባይ ባ ሶ ሶ ስምስ።
20 ዳዊቲ ባ ሶ አሳ አንጃናዉ ሶ ስምዳ ዎደ ሳኦላ ናእያ መልኮላ እያ ሞካናዉ ከያዳ፥ "ፓና አሳት ካሎ ሄመተይሳዳ ሀች እስራኤለ ካዎይ ባ ማጫ አይለታ ስንን ካሎትድ አይ መላ ቦንቸትደ!" ያጋሱ።
21 ዳዊቲ፥ "ነ አዋፐነ እያ ሶ አሳፐ አድ ባ አሳ እስራኤለ ካለና መላ ታና ዶርዳ ጎዳ ስንን ዱራስ። ታኒ ጎዳ ቦንቾስ ዱርሳ አግከ። 22 ታኒ ሀይሳፈ አዳ ቡሮ ታና ቶቻና፤ ታናተ ዝቅ ኦና። ሽን ኔኒ ግዳ ማጫ አይለታ ስንን ታ ቦንቸታና" ያግስ።
23 ሳኦላ ናእያ መልኮላ ሀይቃና ጋካናዉ ናአ የላቡኩ።