2 ሳሜላ ማፃፋ 17

1 ሄሳፈ ጉየ አክፆፈል፥ "ሀች ቃማ ታኒ ታማነ ናምኡ ሙኩሉ አሳታ ዶራዳ ዳዊታ የደዳ ኦይካና። 2 እ ዳቡርድ ዎልቃ ይድ ደእሽን ታኒ እያ ቦላ ዎና። ታኒ እያ ዳጋንና፤ ያን እያራ ደእያ አሳ ኡባይ ባቃትያ ዎደ ታኒ ካዋ ፃላላ ሾጫና። 3 ያታዳ ታኒ አሳ ኡባ ኔኮ ዛራና። ኔኒ እስ አሳ ፃላላ ዎናዉ ኮያሳ፤ ሀንኮ አሳይ ሳሮ አታና" ያግስ። 4 አክፆፈላ ዞረይ አበሰሎመነ እስራኤለ ጭማታ ኡባ ኡፋይስስ።

5 አበሰሎመይ፥ "ቃስ አርካያ ኮቻ ኩሳ ፄግተ፤ እ ግያባ አነ ስኦስ" ያግስ። 6 ኩስ እያኮ ይዳ ዎደ አበሰሎመይ፥ "አክፆፈል ዞርዳ ዞረይ ሀይሳ፤ ኑኒ እ ግያባ ኦናዉ በሲ? በሶናባ ግድኮ፥ ነ ቆፋይ አይቤ?" ያግስ።

7 ኩስ፥ "አክፆፈል ዞርዳ ዞረይ ሀ ዎድያን ሎኦ ግደና። 8 ነ አዋይነ ነ አዋ አሳት ምኖ ኦላንቾታ ግደይሳነ ባ ማራታ ቦንቀትዳ ማሄ መላ ያሸይሳታ ግደይሳ ኔኒ ኤራሳ። ነ አዋይ ኦላ ሜዘትዳ አስ፤ እ ቃማ ባ ኦላንቾታራ አቀና። 9 እ ሀኖደ ጎንጎሎ ግዶን ዎይኮ ሀራ በሳን ቆሰትድ ኡትስ። እ ህንተ ጩጋታ ኮይሮትድ ቆህኮ፥ ሄሳ ስእዳ ኦንካ፥ ‘አበሰሎመ ካልድ ብዳ አሳይ ሾጨትዶሶና’ ያጋና። 10 ነ አዋይ ቶራ ቃራ ግደይሳነ እያራ ደእያ አሳይ ምኖ ግደይሳ እስራኤለ አሳ ኡባይ ኤርያ ግሾ፥ ሀር አቶሽን ጋሞዳ ምኖታ ዎዛናይ ትልአና።

11 "ሽን ታኒ ነና ዞረይ ሀይሳ፤ አባ ጋፃን ደእያ ሻፈ መላ ዳርዳ፥ ዳነፐ በርሳበ ጋካናዉ ደእያ እስራኤለ ኡባ ኔኮ ሺሻ፤ ያታዳ ኔኒ ኤንታ ኦላስ ካለ። 12 ኑኒ እያ ደምዳ በሳ አዉንካ ሾጫና፤ አክ ሳአን ዎያዳ ኑኒ እያ ቦላ ዎና። እያ ግድን ዎይኮ እያራ ደእያ አሳ ግድን እሶይካ ፓፃ አተና። 13 እ ካታማ ገልኮካ፥ እስራኤለ አሳ ኡባይ ዎዶሮ ኤህድ፥ ካታማ ግዶን እስ ሹች አጎና ሄ ካታማ ጎችድ ዛንጋራን የጋና" ያግስ።

14 አበሰሎመይነ እስራኤለ አሳ ኡባይ፥ "አርካያ ኮቻ ኩሳ ዞረይ አክፆፈላ ዞርያፐ ሎኦ" ያግዶሶና። ጎዳይ አበሰሎመ ቦላ ኢታባ ኤሀናዉ ቆፕዳ ግሾ አክፆፈላ ዞርያ ኤኮናዳ ኦስ።

15 ኩስ ካህነታ ሳዶቃነ አብያታራ፥ "አክፆፈል አበሰሎመነ እስራኤለ ጭማታ ሀይሳ ሀይሳ ግድ ዞርስ፤ ታንካ ኤንታ ሀይሳ ሀይሳ ጋዳ ዞራስ። 16 ሀእ ዳዊታኮ ኤሶን ኪትድ፥ ‘ባዞን ደእያ ሻፋ ጋፃን ሀች ቃማ አቆፓ፤ ሄፍን ፕና ክቻ! ሄስ ሀኖና እፅኮ፥ ካዎይነ እያራ ደእያ አሳ ኡባይ ያና’ ያግድ ኦድተ" ያግስ።

17 ዮናታንነ አክማስ ቆንጨን ካታማ ገልሽን ኤንታ አስ በኦና መላ አይኖጌላ ጌተትያ በሳን ኡትድ ናጎሶና። እስ ማጫ አይልያ ያዳ ኤንታዉ ኦድን፥ ኤንቲ ብድ ካዋ ዳዊታስ ኦዶሶና። 18 ሽን እስ ፓንይ ኤንታ በእድ አበሰሎመስ ኦድስ። ሄሳ ግሾ፥ ኤንቲ ናምአይ ሄ በሳፈ ኤሶን ክችድ ብራቅማ ካታማን እስ አድያ ሶ ጋክዶሶና። ሄ አድያ ሶ ማታን ሃ ኦል ደኤስ፤ ኤንቲ ሄ ኦላን ገልዶሶና። 19 ሄ አድያ ማችያ ኦንካ ኤሮናዳ ኦላ ዶና ካማዳ እያ ቦላ ካ ምጫሱ።

20 አበሰሎመ አይለት አድያ ሶ ይድ ማችዉ፥ "አክማስነ ዮናታን አዉን ደኦና?" ያግድ ኦይችዶሶና።

ማችያ፥ "ኤንቲ ሻፋ ፕንድ ብዶሶና" ያጋሱ። ኤንቲ ኮይን፥ በንቶና እፅን፥ የሩሳላመ ስምዶሶና።

21 ሄ አሳት ብዳፐ ጉየ፥ ናምኡ አሳት ኦላፈ ከይድ፥ ካዋ ዳዊታስ ኦዳናዉ ብዶሶና። ዳዊታኮ፥ "አክፆፈል ህንተ ቦላ ሀይሳ ሀይሳ ኦና ግድ ዞር ዎዳ ግሾ ኤሶን ደንድድ፥ ሻፋ ፕንተ" ያግዶሶና። 22 ዳዊቲነ እያራ ደእያ አሳ ኡባይ ዮርዳኖሰ ፕንድ ብዶሶና። ሳእ ዎንትያ ዎደ ኡባይ ፕንድ ዉርዶሶና።

23 አክፆፈል ባ ዞረይ ኤከትቦናይሳ ኤርዳ ዎደ ባ ሀርያ ኮርድ ባ ደእያ ካታማ ብስ። አክፆፈል ባ ሶ ጊግስድ ሱለትድ፥ ሀይቅድ ባ አዋ ዱፎን ሞገትስ።

24 አበሰሎመይነ እያራ ደእያ አሳ ኡባይ ዮርዳኖሰ ፕንያ ዎደ ዳዊቲ ማሀናይማ ካታማ ጋክስ። 25 አበሰሎመይ ባ ኦላንቾታ ቦላ እዮኣባ በሳን አማሳያ ሹምስ። አማሳይ እስራኤለ አድያ ዮቶራ ናአ። ዮቶር ናኦሳ ናእዉ፥ እዮኣባ አይዉ ፃሩያ ምችዉ አብግያ ኤክስ። 26 እስራኤለትነ አበሰሎመይ ጋላዳ ቢታን ዱንካንዶሶና።

27 ዳዊቲ ማሀናይማ ካታማ ጋክያ ዎደ አሞነ ቢታን ራባፐ ይዳ ናኦሳ ናአይ ሾብ፥ ሎዶባራ ካታማፐ ይዳ አምኤላ ናአይ ማክርነ ኦሮጋልማ ካታማፐ ይዳ ጋላዳ አደይ ባርዝለይ፥ 28 ሂፅያባታ፥ ከረታነ ሻተታ ኤህዶሶና። ቃስ ኤንቲ ግስተ፥ ባንጋ፥ ለ፥ ሻሽ፥ ቆምኦሎነ ምስረ፥ 29 ኤስ፥ ፕላ፥ መቃ ማነ ዶርሰ ዳዊታነ እያ አሳይ ማና መላ ኤክድ ይዶሶና። ሄሳ ኤንቲ ኤህዳይ፥ "አሳይ ባዞን ኮሻትስ፥ ዳቡርስ፥ ሳሞትስ" ግድ ቆፕዳ ግሾሳ።