እያቡስተ ሀይቁዋ
1 ሳኦላ ናአይ እያቡስተይ አበኔር ከብሮናን ሀይቅዳይሳ ስእዳ ዎደ እያ ዎዛናይ ትልእስ፤ እስራኤለ አሳ ኡባይካ ዳጋምስ። 2 ሳኦላ ናኣ እያቡስተስ ኦላ ካለያ ናምኡ ሀላቃት ደኦሶና፤ እሱዋ ሱንይ ባአና፤ ሀንኮይ ቃስ ራካባ። ኤንቲ ብንያመ ኮቸ ግድዳ ባኣሮተ አድያ እርሞና ናይታ። ባኣሮተይ ብንያመ ባጋዳ ታይበቴስ። 3 ባኣሮታን ደእዳ ኮይሮ አሳት ግታይማ ቢታ ባቃትድ፥ ሀች ጋካናዉ በተ አሳዳ ያን ደእዶሶና።
4 ሳኦላ ናኣ ዮናታናስ ናምኡ ቶሆይ ስልዳ ናእ ደኤስ፤ ሳኦላነ ዮናታና ሀይቁዋ ዎረይ እዝራኤለፐ ስኤትያ ዎደ እ እቻሹ ላይ ናአ። ሄ ናኣ ድችያራ እያ ኤካዳ ባቃትሽን ናአይ ኩንድን እያ ቶሆይ ስልስ፤ ሄ ናኣ ሱንይ መምፕቦስተ።
5 ባኣሮተ አድያ እርሞና ናይት ረካብነ ባኣን እያቡስተ ሶ ብድ ሴታ ጋላስ ጋክዶሶና። ኤንቲ ጋክያ ዎደ እ ሸምፓናዉ አልጋ ቦላ ዝንእስ። 6 ኤንቲ ግስተ ኮይያ አሳዳ ሀንድ ሶ ገልድ፥ እያ ኡሉዋን ጫድዶሶና። ረካብነ እያ እሻ ባኣን ለፓራ ከይድ ብዶሶና።
7 እያቡስተይ ቆልአን አርሳን ዝንእዳይሳ ደምድ፥ እያዉ ኡሉዋን ጫድድ ዎዶሶና፤ እያ ሁጵያ ቃንፅ ኤክድ፥ አራባ ጋ ኤፍያ ኦግያ ኦይክድ፥ ቃማራ ብዶሶና። 8 እያቡስተ ሁጵያ ከብሮናን ደእያ ዳዊታስ ኤህዶሶና። ካዋ፥ "ነና ዎናዉ ኮይያ ነ ሞርክያ ሳኦላ ናኣ እያቡስተ ሁጵያ ሀይሳ በአ። ሳኦላ ቦላነ እያ ናይታ ቦላ ካዋ ኑ ጎዳ ግሾ ፆሳይ ሀች ሀሎ ከይስ" ያግዶሶና።
9 ሽን ባኣሮተ አድያ እርሞና ናይታ ረካባነ እያ እሻ ባአና ዳዊቲ ሀይሳዳ ያግስ፤ "መቶ ኡባፈ ታና አሽዳ ደኦ ጎዳይ ኤርያ መላ። 10 ታዉ ምሽራቾ ኦድያ አሳዳ፥ ‘ሳኦል ሀይቅስ’ ያግድ ታዉ ኦድን፥ ታኒ እያ ፅቅላጋን ኦይካዳ ዎስ፤ ታኒ እያ ምሽራቹዋስ እምዳ ዎይቶይ ሀይሳ። 11 ባ ሶን ባ አርሳን ዝንእዳ ፅሎ አድያ ዎዳ ኢታ አሳታስ እያ ሃሉዋ ከየይስ አይ መላ ኢታንደሻ! እያ ሱ ታኒ ህንተ ኩሸፐ አቻና፤ ህንተና ታኒ ቢታ ቦላፈ ይሳና!" ያግስ።
12 ረካባነ ባአና ዎና መላ ዳዊቲ ባ ኦላንቾታ ኪትን፥ ኦላንቾት ኤንታ ዎዶሶና። ኤንታ ኩሽያነ ቶሁዋ ቃንፅድ፥ ከብሮናን ኦላ ሃ ማታን ካቅዶሶና። እያቡስተ ሁጵያ ኤፍድ፥ አበኔራ ዱፎን ከብሮናን ሞግዶሶና።