ዳዊታነ ሲባ
1 ዳዊቲ ደርያ ሁጵያራ ሄፍን አሽን፥ ሲባ ጌተትያ መምፕቦስተ አይለይ እያራ ጋሄትስ። ናምኡ ፄቱ ኡይ፥ እስ ፄቱ ዛብበ ኑካ፥ እስ ፄቱ ትያ አይፈ፥ እስ ኦጎሮ ዎይነ ኡሹ ናምኡ ሀረታን ጫንስ።
2 ካዎይ፥ "ሀይሳ አይስ ኤሀዲ?" ያግድ ኦይችስ።
ሲብ፥ "ሀረታ፥ ካዋ ሶ አሳይ ቶጋና መላ፥ ኡይነ ትይያ አይፍያ አሳይ ማና መላነ ዎይነ ኡሻይ ባዞን ዳቡርያ አሳት ኡያና መላሳ" ያግስ።
3 ካዎይ፥ "ነ ጎዳ ናኣ ናአይ አዉን ደኢ?" ያግድ ኦይችስ።
ሲብ፥ " ‘እስራኤለ አሳይ ታ አዋ ካዎተ ሀች ታዉ ዛር እማና’ ያግድ የሩሳላመን ኡትስ" ያግስ።
4 ካዎይ፥ "መምፕቦስተስ ደእያባ ኡባይ ነዉ ግዶ" ያግስ።
ሲብ፥ "አቤት ጎዳዉ፥ ካዋዉ! ታኒ ነ ስንን ቴሞ ደማይስ" ያግድ ቢታን ጉፋንዳ ዝጋይስ።
ዳዊታነ ሳም
5 ካዎይ ዳዊቲ ብራቅማ ካታማ ያ ዎደ ሳኦላ ዳቦ ግድዳ እስ አደይ ያፐ ከይስ። እያ ሱንይ ጌራ ናኣ ሳም። እ ዳዊታ ባድሸ ከይስ። 6 ኦላንቾትነ ካዋ ናገይሳት ኡሻቻራነ ሀድርሳራ ዳዊታ ተቅድ ደእሽን፥ ሳም ዳዊታ ቦላነ ካዋ ሞርናታ ቦላ ሹቹ ሆልስ። 7 ሳም ዳዊታ ባድሸ፥ "ክቻ፤ ሀ ኢታይ ክቻ! አሳ ሱ ጉስያ ሀ ፓናይስ ክቻ። 8 ኔኒ ሳኦላ በሳን ካዎታዳሳ፤ ኔኒ ጉስዳ ሳኦላ ሶ አሳ ሱ ኡባ ጎዳይ ነ ቦላ ዛርስ። ጎዳይ ካዎተ ነ ናኣ አበሰሎመስ እሚስ፤ ኔኒ ሱ ጉስዳ አስ ግድያ ግሾ፥ ነዉ ዮ ዎደይ ጋክስ" ያግስ።
9 ሄሳፈ ጉየ፥ ፃሩያ ናአይ አብስ፥ ካዋኮ፥ "ሀ ባዉታ ካናይ፥ ታ ጎዳ ካዋ አይስ ባዲ? ታኒ ባዳ እያ ቆያ ቃንፃና" ያግስ።
10 ካዎይ፥ "ህንተኖ፥ ፃሩያ ናይቶ፥ ህንተራ ታራ አይብ ጋ? ጎዳይ፥ ‘ዳዊታ ባዳ’ ያግዳ ግሾ እ ባድያባ ግድኮ፥ ‘ኔኒ አይስ ሄሳ ኦይ?’ ያግድ ኦይቻናዉ ዳንዳኤይ ኦኔ?" ያግስ።
11 ሄሳፈ ጉየ፥ ዳዊቲ አብሳነ ባ ሞርናታ፥ "ታ ናአይ፥ ታ አሾይ፥ ታና ዎናዉ ኮዬስ፤ ያትን፥ ሀ ብንያመ አደይ ዋት አጋነ! ጎዳይ እያ ኪትዳ ግሾ እ ባዴስ፥ እያ ቦቾፍተ። 12 ኦን ኤር፥ ጎዳይ ታ መቱዋ በእድ፥ ታኒ ሀች ኤክያ ባደ ግሾ ታዉ ኬሀ ቆፓኔኮ" ያግስ።
13 ሄሳፈ ጉየ፥ ዳዊቲነ እያ አሳይ ኦግያ ኦይክድ ቦሶና። ሳም ዙማ ምያራ ብሸ ዳዊታ ባዴስ፤ ሹቹ ሆሌስ፤ እያ ቦላ ቢታ ላሌስ። 14 ካዎይነ እያራ ደእያ አሳት ባንታ ብያ በሳ ዳቡርድ ጋክን ካዎይ ያን ሸምፕስ።
አበሰሎመነ እያ ሞርናታ
15 አበሰሎመይነ እስራኤለ አሳ ኡባይ የሩሳላመ ገልዶሶና፤ አክፆፈል ኤንታራ ደኤስ። 16 ዳዊታ ላገይ አርካያ ኮቻይ ኩስ አበሰሎመኮ ይድ፥ "ካዎይ ብራታ ቱሱ ግዶ! ካዎይ ሙኩሉ ላይ ካዎቶ!" ያግስ።
17 አበሰሎመይ፥ "ኔኒ ነ ላግያ ዶስያ ዶሶይ ሀይሴ? ነ ላግያራ አይስ ባብኪ?" ያግስ።
18 ኩስ፥ "አካይ! ጎዳይ፥ ሀ አሳይነ እስራኤለ አሳይ ዶርዳይሳስ ታኒ አቃና፤ ታኒ እያራ አታና። 19 ህዛ ታኒ ታ ጎዳ ናኣስ ኦና ኦደስ ኦኔ? ታኒ ነ አዋስ ኦዳይሳዳ ሀእ ነዉካ ኦና" ያግስ።
20 አበሰሎመይ አክፆፈላኮ፥ "ኔኒ አነ ኑና ዞራ፤ ኑኒ አይ ኦኖ?" ያግስ።
21 አክፆፈል፥ "ካዎ ጋ ናጋናዉ ሶን አትዳ ነ አዋ ላገታራ ባዳ ዝንአ። ኔኒ ነ አዋ ካዉሽዳይሳ እስራኤለ አሳ ኡባይ ስአና፤ ኔራ ደእያ ኡባ ኩሸይ ምናና" ያግስ። 22 ካዎ ኬ ፖቅያ ቦላ አበሰሎመስ ዱንካነ ቶክዶሶና፤ አሳ ኡባይ ፄልሽን አበሰሎመይ ገልድ ባ አዋ ላገታራ ዝንእስ።
23 ሄ ዎደ አክፆፈል ዞርያ ዞረይ እስ አስ ጎዳ ኦይችድ ኤክያ ዞረ መላ። ዳዊቲነ አበሰሎመይ አክፆፈላ ዞርያ ሄሳዳ ኦድ ኤክዶሶና።