2 ሳሜላ ማፃፋ 10

ዳዊቲ ሶረታነ አሞነታ ፆንስ

1 ሄሳፈ ጉየ፥ አሞነታ ካዎይ ሀይቅን እያ ናአይ ሀኑኒ እያ በሳን ካዎትስ። 2 ዳዊቲ፥ "እያ አዋይ ታዉ ኬህዳይሳዳ ናኦሳ ናኣ ሀኑናስ ታካ ኬሀና" ያግስ። ሄሳ ግሾ፥ እያ ምንናዉ ዳዊቲ አሰ እያኮ ኪትስ።

ዳዊቲ ኪትዳ አሳይ አሞነ ቢታ ጋክዳ ዎደ፥ 3 አሞነ ሀላቃት ባንታ ጎዳ ሀኑናኮ፥ "ዳዊቲ ሀ አሳ ኪትዳይ ነ አዋ ቦንችድ ነና ምንናዉ ኮይዳ ግሾ ዳኒ? እ አሰ ኪትዳይ ሀ ካታማ ዎች በእድ ኦላናሳ" ያግዶሶና። 4 ሀኑኒ ዳዊቲ ኪትዳ አሳታ ኦይክድ፥ ኤንታ ቡቻፈ ባጋ ሜድስ፤ ኤንታ ማኡዋ ጋርሳፈ ዱለ ጋካናዉ ቃንፅድ ኤንታ የድስ።

5 ዳዊቲ ሄሳ ስእድ፥ ኤንቲ ዬላትዳ ግሾ፥ "ህንተ ቡቻይ ድጫና ጋካናዉ እያርኮን ደእሽተ፤ ሄሳፈ ጉየ ሃ ዪተ" ያግድ አሰ ኪትስ።

6 አሞነት ዳዊቲ ኤንታ ሞርክዳይሳ ኤርዳ ዎደ ቤት-ረሆባነ ሱባን ደእያ አራመ አሳፐ ላታሙ ሙኩሉ ቶሆ ኦላንቾታ፥ ፆባፐ ታማነ ናምኡ ሙኩሉ አሳታነ ማካ ካዉዋፐ እስ ሙኩሉ አሳታ ሻምዶሶና።

7 ዳዊቲ ሄሳ ስእዳ ዎደ እዮኣባ ኩመ ኦላንቾታራ ኤንታ ቦላ የድስ። 8 አሞነት ከይድ፥ ካታማ ፐንግያን ኦላስ ሳልፕዶሶና፤ ሱባፈነ ረሆባፐ ይዳ አራመ አሳት፥ ፆባ አሳትነ ማካ አሳት ደንባን ዱማ ሳልፕዶሶና።

9 እዮኣብ ባና ኦል ስንራነ ጉየራ ተቅዳይሳ በእድ፥ እስራኤለ ኦላንቾታፐ ምኖታ ዶርድ ሶረ አሳታ ስንን ኤስስ። 10 አትዳ አሳታ ባ እሻ አብስ ኪታና መላ ኦድ አሞነታ ስንን ሳልፕስስ። 11 እዮኣብ አብሳኮ፥ "ሶረ አሳት ታ ቦላ ዎልቃምኮ ነ ያዳ ታና ማዳ፤ አሞነ አሳት ነ ቦላ ዎልቃምኮ ታ ባዳ ነና ማዳና። 12 ህዛ ምና! ኑ አሳ ግሾነ ኑ ፆሳ ካታማታ ግሾ፥ አነ ምን ኦለቶስ። ጎዳይ ባና ሎእያባ ኦ" ያግስ።

13 እዮኣብነ እያራ ደእያ ኦላንቾት ሶረ አሳታ ኦላናዉ ከይዶሶና፤ ሶረ አሳት እያ ስንፈ ባቃትዶሶና። 14 ሶረ አሳት ባቃትዳይሳ አሞነ አሳት በእዳ ዎደ ኤንትካ አብሳ ስንፈ ባቃትድ፥ ካታማ ገልዶሶና። እዮኣብ አሞነታ ኦለይሳ አግድ፥ የሩሳላመ ስምስ።

15 ሶረ አሳት እስራኤለ አሳይ ኤንታ ፆንዳይሳ ኤርዳ ዎደ ባንታ ኦላንቾታ ኡባ ሺሽዶሶና። 16 ካዎይ ሀዳድዘር ሶረ አሳታ ኤፍራፂሳ ሻፋ ሄፍንፈ ኪትድ ኤህስን፥ ኤላማ ብዶሶና። አድራዛራ ቶራ ሞጮናይ ሾባክ ኤንታ ካለስ።

17 ዳዊቲ ሄሳ ስእዳ ዎደ፥ እስራኤለ ኦላንቾታ ሺሽድ፥ ዮርዳኖሰ ሻፋ ፕንድ ኤላማ ጋክስ። ሶረ አሳት በሰ ኦይክድ፥ ጊግድ፥ ዳዊታራ ኦለትዶሶና። 18 ሽን ሶረ አሳት እስራኤለታ ስንፈ ባቃትዶሶና። ዳዊቲይ ሶረ ኦላንቾታፐ ፓራ ጋረ ላግያ ላፑን ፄቱ አሳታነ ኦይታሙ ሙኩሉ ቶሆ ኦላንቾታ ዎስ። ኤንታ ቶራ ሞጮና ሾባክካ ሄ በሳን ሾጨትድ ሀይቅስ። 19 አድራዛራስ ሃረትድ ደእያ ካዎት እስራኤለት ኤንታ ፆንዳይሳ ኤርዳ ዎደ እስራኤለታራ ስገትድ፥ ኤንታዉ ሃረትዶሶና። ሄሳፈ ስምን፥ ሶረ አሳት አሞነ አሳታ ማዳናዉ ያይዶሶና።