1 ጎዳይ ሳኦላ ኩሸፐነ እያ ሞርከታ ኡባ ኩሸፐ አሽዳ ጋላስ ዳዊቲ ጎዳስ ሀ ማዝሙርያ የፅስ።

2 ጎዳይ ታ ዛላ፤

ታዉ ሚፃ፤

እ ታና አሸይሳ።

3 ታ ፆሳይ ታኒ ባቃታዳ አትያ ዛላ፤

እ ታ ጎንዳልያ፤

እ ታ አቶተ ዎልቃ።

እ ታኒ ባቃታዳ አትያ በሲ፤

ነ ታና ማካላንቾታ ኩሸፐ አሻሳ።

4 ጋላት በሲያ ጎዳ ታኒ ፄጋና፤

ታኒ ታ ሞርከታፐ አታና።

5 ሀይቆ ዙለይ ታና ተቅስ፤

ዮ ድኦይ ታና ዳጋንስ።

6 ስኦለ ዎዶሮይ ታና ቃቻና ሀኔስ፤

ሀይቆይ ፅሄዳ ታና ኦይክስ።

7 ታና መቶይ ኡንኤን ጎዳ ፄጋስ፤

ታና ማዳና መላ ታ ፆሳኮ ዋሳስ።

እ ባ ኬን ታ ቃላ ስእስ፤

ታ ዋስዳ ዋሶይ እያ ሀይን ዎስ።

8 ፆሳይ ሀንቀትዳ ግሾ፥

ቢት ቃፅስ፤ ቡቀትስ፤

ሳሎታ ፃጶይ ኮኮርስ፤ ቃፅስ

9 እያ ሲያፐ ጩያይ ከይስ፤

እያ ዶናፐ ታማ ላጮይነ

ፁግያ ቦንቆይ ከይስ።

10 ሳሉዋ ጳልቅድ ዱገ ዎስ፤

እያ ቶሁዋፐ ጋርሳራ ሳካና ም ደኤስ።

11 ክሩበታን ኡትድ ፓልስ፤

ጫርኮ ቀፍያ ቦላ ኡትድ ብስ።

12 ባና ማን ተቅስ፤

እያ ዱንካነይ እራራ ስከትዳ ሻራ።

13 እያ ስንን ደእያ ፖኡዋፐ

ታማ ቦንቆይ ከዬስ።

14 ጎዳይ ሳሎፐ ጉምስ፤

ኡባፈ ቃ ፆሳይ ባ ቃላ ስስስ።

15 ባ ዶንግያ ዱክድ፥ ባ ሞርከታ ላልስ፤

ዎልአን ፖኦ ኪትድ፥ ኤንታ የደስ።

16 ጎዳይ ሴርዳ ዎደነ

ሀንቀትድ ፔኑቅዳ ዎደ፥

አባ ግዶን ቢታይ በንትስ፤

ሳኣ ባሶይካ ቆንጭስ።

17 ጎዳይ ቦላፈ ኩሸ የድድ፥

ታና ኦይክስ፤

ጪሞ ሃፈ ታና ከስስ።

18 እ ታና ታ ዎልቃማ ሞርከታፐ፥

ታ ዎልቃፈ ቦላ ግድዳ ታና እፀይሳታፐ አሽስ።

19 ታ መቱዋ ጋላስ ኤንቲ ታ ቦላ ደንድዶሶና፤

ሽን ጎዳይ ታና ዘምፕሰይሳ።

20 እ ታና ዳልጋ በሲ ከስስ፤

ታናን ኡፋይትዳ ግሾ ታና አሽስ።

21 ታ ፅሎተዳ ጎዳይ ታዉ ቃንፅስ፤

ታ ኩሸ ጌሻተዳ ታዉ ዛርስ።

22 አይስ ጊኮ ታኒ ጎዳ ኦግያ ካላስ፤

ቃስ ታ ፆሳ አጋዳ ኢታ ኦብከ።

23 ታኒ እያ ህግያ ኡባ ናጋስ፤

እያ ዎጋ ፖላናይሳ አጋብከ።

24 ታኒ እያ ስንን ሱረ ደአስ፤

ታና ናጋራፐ ናጋስ።

25 ጎዳይ ታዉ ታ ፅሎተዳነ

ታ ጌሻተዳ ዛርስ።

26 ኔኒ ኬሀታስ ኬሀ፤

ሱረታስ ኔኒ ሱረ።

27 ጌሻታስ ኔኒ ጌሽ፤

ሽን ጌላታስ ኔኒ ሞርከ።

28 ባንታና ካዉሸይሳታ አሻሳ፤

ሽን ኦቶራንቾታ ካዉሻሳ።

29 አቤት ጎዳዉ፥ ታ ፆምፐይ ነና፤

ጎዳይ ታ ማ ፖእስስ።

30 ነ ማዱዋን ታ ሞርከታ የዳ ባና፤

ታ ፆሳን ግምበ ድርሳ ጉፓ አና።

31 ፆሳ ኦገይ ሱረ፤

ጎዳ ቃላይ ጌሽ፤

እያኮ ባቃትያ ኡባስ እ ጎንዳለ።

32 ጎዳይ አትሽን፥ ሀራ ፆሲ ኦኔ?

ኑ ፆሳይ አትሽን፥ ሀራ ዛል ኦኔ?

33 ፆሳይ ታዉ ምኖ ሚፃ፤

እ ታ ኦግያ ፖሎ ኦስ።

34 እ ታ ቶሁዋ ገንኤ ቶሆዳ ምንስ፤

ታና ቃ በሳን ምንድ ኤሴስ።

35 እ ታ ኩሽያ ኦላስ ሎህሴስ፤

ታ ቀሰይ ናሰ ብራታ ዶንገ ዱኬስ።

36 ታና አሽያ ነ ጎንዳልያ ታዉ እማዳሳ፤

ነ ካትሶይ ታና ግታዬስ።

37 ታ ሄመ ዳልግሳሳ፤

ታ ጋድያ ምንሳ።

38 ታ ሞርከታ የደዳ መንረስ፤

ኤንቲ ዮና ደእሽን ጉየ ስምከ።

39 ኤንቲ ዛሪድ ደንዶና መላ ሾጫስ፤

ታ ቶሁዋፐ ጋርሳን ኩንድዶሶና።

40 ኦላስ ታዉ ዎልቃ ዳንጭሳዳሳ፤

ታ ሞርከታ ታዉ ጉልባትሳዳሳ።

41 ታ ሞርከታ ታ ስንፈ ባቃትሳዳሳ፤

ታና እፀይሳታ ይሳስ።

42 ማደ ኮይድ ዋስዶሶና፤

ሽን ኦንካ ኤንታ አሽቤና።

ጎዳ ኤንቲ ፄግዶሶና፤

ሽን እ ኤንታዉ ኮይቤና።

43 ታኒ ኤንታ ባናዳ ሊቅሳስ፤

ኦገ ኡርቃዳ ኤንታ የስ።

44 ማካላ ታ አሳፐ ታና አሻዳሳ፤

ካዎተታ ቦላ ታና ሹማዳሳ፤

ታ ኤሮና አሳይ ታዉ ሃረትስ።

45 አላጋ ደረይ ታና አዳሼስ፤

ታ ዎርያ ስእድ ታዉ ኪተቶሶና።

46 ኤንቲ ዎልቃ ይዶሶና፤

ባንታ ሚፃፐ ኮኮርሸ ከይድ ዮሶና።

47 ጎዳይ ደኦን ደኤስ! ታ ዛላይ አንጀቶ።

ታና አሽያ ዛላይ ቁ ቁ ጎ።

48 እ ታ ሃሉዋ ከይያ ፆሳ፤

ካዎተታ ታፐ ጋርሳን ሃርሴስ።

49 ታ ሞርከታፐ ታና አሼስ፤

ታ ሞርከታ ቦላ ታና ቁ ቁ ኦሳ፤

ኦዳ መያ አሳፐ ታና አሻሳ።

50 አቤት ጎዳዉ ታኒ ካዎተታ ግዶን ነና ጋላታና፤

ነ ሱን የፃና።

51 ፆሳይ ባ ካዋስ ግታ ፆኖ እሜስ፤

ባ ትይዳ ዳዊታስነ እያ ኮቻስ፥

መርና ሲቁዋ በሴስ።