2 ሳሜላ ማፃፋ 15

አበሰሎመ ማቁዋ

1 ሄሳፈ ጉየ፥ አበሰሎመይ እስ ፓራ ጋረ፥ ፓራታነ ባ ስንን ዎፃናዉ እሻታሙ አሳታ ጊግስስ። 2 አበሰሎመይ ጉራ ደንድድ፥ ካታማ ፐንግያን ኤቄስ። ሞቶይ ደእያ አይ አስካ ካዋ ስን ፕርዳስ ብያ ዎደ አበሰሎመይ ፄግድ፥ "ኔኒ አዉ ካታማፐ ያይ?" ያግድ ኦይቼስ። ሄ ኡራይ፥ "ታ ነ አይለይ እስራኤለ ዛረ እሱዋፈ ያስ" ያግድ እያዉ ዛሬስ። 3 አበሰሎመይ፥ "ሄኮ፥ ነ ኦዳይ ሎኦነ ሱረ፤ ሽን ካዋ ባጋፈ ነና ስአናይ ባዋ" ያጌስ። 4 አበሰሎመይ ጉጅድ፥ "ታ እስራኤለ ቦላ ፕርዳናዉ ሹመትዳባ ግዳርክናሽን። ሄስ ሀንዳኮ፥ ሞቶይ ዎይኮ ኦድ ደእያ ኦንካ ታኮ ይን፥ ታኒ እያዉ ሱረ ፕርዳ ፕርዳናሽን" ያጌስ።

5 ኦንካ እያኮ ይድ እያዉ ዝግያ ዎደ አበሰሎመይ ባ ኩሽያ የድድ ሄ አድያ ኦይክድ ዬሬስ። 6 ፕርደታናዉ ካዋኮ ያ እስራኤለ ኡባስ አበሰሎመይ ሄሳዳ ሀንድ እስራኤለ አሳ ዎዛና ኤክስ።

7 ኦይዱ ላይፈ ጉየ፥ አበሰሎመይ፥ "ታኒ ጎዳስ ቃንግዳ ቃንገ ጋናዉ ከብሮና ባና። 8 ታኒ ነ አይለይ ሶረ ቢታን ገሹራ ካታማን ደአሸ፥ ‘ታና ጎዳይ የሩሳላመ ጉየ ዛርኮ፥ ጎዳስ ጎይናና’ ያጋዳ ቃንጋስ" ያግስ።

9 ካዎይ፥ "ሳሮ ባ" ግን፥ እ ደንድድ ከብሮና ካታማ ብስ።

10 ሽን አበሰሎመይ እስራኤለ ዛረ ኡባስ ቆሳን ኪታ የድድ፥ "ሞይዘ ፑኖ ህንተ ስእዳ ዎደ፥ ‘አበሰሎመይ ከብሮናን ካዎትስ’ ያግተ" ያግስ። 11 አበሰሎመይ ፄግን፥ የሩሳላመፐ እያራ ብዳ አሳታ ታይቦይ ናምኡ ፄታ። ኤንቲ ሄ ሀኖታባ አይኮካ ኤሮና አሽከተን ብዶሶና። 12 አበሰሎመይ ያርሾ ያርሽያ ዎደ ዳዊታ ዞርያ አሳፐ እሱዋ አክፆፈላ ግሎ ካታማፐ ፄግስስ። ካዋ ቦላ ደንድዳ ማቆይ ጎብስ፤ አበሰሎመ ካልያ አሳ ታይቦይ ጉጅ ጉጅ ብስ።

ዳዊቲ ባቃትስ

13 እስ ኪተትዳ አስ ይድ ዳዊታኮ፥ "እስራኤለ አሳ ዎዛናይ አበሰሎመራ ደኤስ" ያግስ።

14 ዳዊቲ ባራ የሩሳላመን ደእያ ባ ሞርናታኮ፥ "ደንድተ! ኑኒ ባቃቶስ! ያኖና እፅኮ፥ ኑ ግዶፈ አይ አስካ አበሰሎመፐ ከስ ኤከና። ኑኒ ኤለስድ ባናዉ ኮሼስ፤ ሀንኮደ፥ እ ኤለስ ይድ ኑና ይሳና፤ ኑ ካታማ ማሻን ቡና" ያግስ።

15 ካዋ ሞርናት፥ "ኑ ጎዳይ፥ ካዎይ ዶርዳ ኡባ ኑኒ ነ አይለት ኦናዉ ጊግድ ኡትዳ" ያግዶሶና።

16 ካዎይ ከይድ ቶሆራ ብስ፤ እያ ሶ አሳይነ እያ ሞርናት ኡባይ እያራ ብስ፤ ሽን ባ ጋዋ ናጋና መላ ታሙ ላገታ ሶን አሽስ። 17 ካዎይ ከይን አሳ ኡባይ እያራ ሃሆን ደእያ እስ ኬ ማታን ኤቅዶሶና። 18 እያ አሳት ኡባይ እያፐ ስንራ ሳልፕድ አዶሶና፤ ኤንታ ካልድ ካዋ ናገይሳት ሳልፕዶሶና። ቃስ ኤንታ ካልድ ጋተ ካታማፐ ይዳ ኡሱፑን ፄቱ አሳት፥ ካዋ ስንራ ሳልፕድ አዶሶና።

19 ካዎይ ጋተ አድያ እታያኮ፥ "ኔኒ ኑራ አይስ ያይ? ጉየ ስማዳ፥ ካዋ አበሰሎመራ ደኣሻ። ኔኒ አሳ ቢታ አስ፤ ነ ድኤታዳ ይዳ አስ። 20 ኔኒ ዝነ ያዳሳ፤ ታኒ ታ ሁጰን ብያ ሶ ኤሮና ደአሸ፥ ነና ዋታዳ ዳቡርሶ? ጉየ ስማ፤ ነ ቢታ አስ ኔራ ኤፋ። ጎዳይ ነዉ ኬሆነ አማነቶ!" ያግስ።

21 ሽን እታይ፥ "ደኦ ጎዳይ ኤርያ መላ፥ ታ ጎዳይ ካዎይ ኤርያ መላ፥ ታ ጎዳይ ካዎይ ደእያ አዉንካ፥ ፓፃን ግድን ሀይቆን ታኒ ነ አይለይ ኔፐ ሻከትከ" ያግስ።

22 ዳዊቲ፥ "ሎኦ! ባ፥ አ" ያግስ። ጋተ አደይ እታይ አሳራነ ናይታራ አሳ ኡባራ ብስ።

23 ሄ አሳ ኡባይ ብያ ዎደ ሄ ቢታ አሳይ ባንታ ቃላ ቁ ኦድ ዬክዶሶና። ካዎይ ቀድሮና ዛንጋራ ፕንስ፤ አሳ ኡባይ መላ ቢታኮ ስሚድ ብስ።

24 ካህነይ ሳዶቅ ሄ በሳን ደኤስ፤ ፆሳ ጫቆ ታቦትያ ቶክያ ሌወትነ ካህንያ አብያታር ያን ደኦሶና። አሳ ኡባይ ካታማፐ ከይድ ዉራና ጋካናዉ ፆሳ ታቦትያ ሳአን ሸምፕስዶሶና።

25 ሄሳፈ ጉየ ካዎይ ሳዶቃኮ፥ "ፆሳ ታቦትያ ካታማ ጉየ ዛራ። ጎዳይ ታናን ኡፋይትያባ ግድኮ፥ እስ ጋላስ ጉየ ዛሪድ ባ ታቦትያነ ባ ኬ በሳና። 26 ሽን እ፥ ‘ነናን ኡፋይትከ’ ጊኮ፥ እ ባና ሎእያባ ኦ፤ ታኒ ጊገታ ኡታስ" ያግስ።

27 ቃስ ካዎይ ካህንያ ሳዶቃኮ፥ አነ አኬካ "ኔኒ ነ ናኣ አክማሳነ አብያታራ ናኣ ዮናታና ኤክዳ ካታማ ሳሮ ባ። 28 ህንተ ታዉ ኪታና ጋካናዉ ታኒ መላ ቢታን ደእያ ሻፋ ፕኑዋን ደአሻና" ያግስ። 29 ሄሳ ግሾ፥ ሳዶቅነ አብያታር ፆሳ ታቦትያ የሩሳላመ ጉየ ኤፍድ ያን ደእዶሶና።

30 ሽን ዳዊቲ ዬክሸ ሻማሆ ደርያ ቦላ ከይስ። እ አዛኖን ባ ሁጵያ ጉሉንትድ መላ ቶሆን ሄመትስ፤ እያራ ደእያ አሳት ጉሉንትድ ዬክሸ ፑደ ከይዶሶና። 31 አክፆፈል አበሰሎመራ ማቀትዳይሳ ዳዊቲ ስእዳ ዎደ "ጎዳዉ፥ አክፆፈላ ዞርያ ኤያተ ላማ" ያግድ ዎስስ።

32 ዳዊቲ አሳይ ፆሳ ጎይንያ ዙማ ሁጰ ጋክዳ ዎደ፥ አርካያ አድያ*15:32 አርካያ አድያ ገይስ በሰ ግዶናሽን ኮቸ ግዳናዉ ዳንዳኤስ። ኩስ ባ ማኡዋ ዳክድ፥ ባ ሁጵያን ባና ቆልድ፥ ዳዊታራ ጋሄታናዉ ይስ። 33 ዳዊቲ፥ "ኔኒ ታራ ቢኮ ታዉ ቶሆ ግዳና። 34 ሽን ኔኒ ካታማ ጉየ ስማዳ አበሰሎመኮ፥ ‘ካዋዉ፥ ሀይሳፈ ካሰ ታኒ ነ አዋ አይለ ግድዳይሳዳ ሀእ ነዉካ አይለ ግዳና’ ያግኮ፥ አክፆፈላ ዞርያ ላላዳ ታና ማዳና። 35 ካህነት ሳዶቅነ አብያታር ኔራ ያን ደኦሶና ግዶኮና? ኔኒ ካዎ ጋን ስእያባ ኡባ ኤንታዉ ኦዳ። 36 ሳዶቃ ናኣ አክማስነ አብያታራ ናኣ ዮናታን ያን ኤንታራ ደኦሶና፤ ኔኒ ስእያባ ኡባ ኤንታ ቦላ ታዉ ኪታ" ያግስ።

37 አበሰሎመይ የሩሳላመ ገልሽን፥ ዳዊታ ላገይ ኩስ ካታማ ጋክስ።