2 ሳሜላ ማፃፋ 21

ጋባኦናታ ሀሎ ከሳ

1 ዳዊታ ካዎተ ላይን ቢታይ ሄ ላይ ኩመ ኮሻትስ። ሄሳ ግሾ፥ ዳዊታ ጎዳ ኦይችን፥ ጎዳይ፥ "ሄስ ሀንዳይ ሳኦልነ እያ ሶ አሳይ ጋባኦና አሳ ዎዳ ግሾ ሱ ጎመይ ኤንታ ጋክስ" ያግስ።

2 ያትን ካዎይ ጋባኦና አሳ ፄግድ ኦድስስ። ጋባኦና አሳት እስራኤለ ዛረ ግዶናሽን፥ ኤንቲ አሞረ አሳፐ አትዳይሳታ። እስራኤለት ኤንታ አሻናዉ ኤንታራ ጫቅዶሶና፤ ሽን ሳኦል እስራኤለስነ ይሁዳስ ምሸትዳ ግሾ፥ ኤንታ ኩመ ይሳናዉ ኮይስ። 3 ዳዊቲ ጋባኦና አሳ፥ "ታኒ ህንተዉ አይ ኦ? ጎዳ ላታ ህንተ አንጃና መላ ታኒ ህንተና አይ አጮ?" ያግስ።

4 ኤንቲ ዛሪድ፥ "ኑኒ ሳኦላፐ ዎይኮ እያ ሶ አሳፐ ዎርቃ ዎይኮ ብራ ኦይቾኮ። ቃስ እስራኤለ ግዶፈ እስ አስካ ዎናዉ ኑስ ማት ባዋ" ያግዶሶና።

ዳዊቲ፥ "ያትን፥ ታኒ ህንተዉ አይ ኦና መላ ኮዬቲ?" ያግድ ኦይችስ።

5 ኤንቲ፥ "ሳኦል ኑና ይስስ፤ ኑፐ አይ አስካ እስራኤለ ቢታን አዉንካ ፓፃ ዶና መላ ማቀትስ። 6 ሄሳ ግሾ፥ ሳኦላ ኮቻፈ ላፑን አደታ ኑስ እማ። ጎዳይ ዶርድ እያ ካዎዳ ሳኦላ ካታማን፥ ግብአን፥ ጎዳ ስንን ኑኒ ኤንታ ካቃና" ያግዶሶና።

ካዎይ፥ "ታኒ ኤንታ ህንተዉ አዳ እማና" ያግስ።

7 ሳኦላ ናአይ ዮናታንነ ዳዊቲ ጎዳ ስንን ጫቅዳ ጫቁዋ ግሾ፥ ሳኦላ ናኣ፥ ዮናታና ናኣ መምፕቦስተ ካዎይ አሽስ። 8 ሽን ካዎይ ዳዊቲ እዮሄላ ናእያ ራፅፋ ሳኦላስ የልዳ ናምኡ አደ ናይታ፥ አርሞናነ መምፕቦስተ፥ ቃስ ሳኦላ ናእያ መሮባ፥ ማሆላ አድያ ባርዝለ ናኣ አድርኤላስ የልዳ እቻሹ አደ ናይታ ኤክስ። 9 ጋባኦና አሳስ አድ እምን፥ ኤንቲ ጎዳ ስንን ዙማ ሁጰን ካቅዶሶና፤ ላፑናይ እስፈ ሀይቅዶሶና። ኤንቲ ባንጋ ጫካ ዶምያ ዎደ ሀይቅዶሶና።

10 እዮሄላ ናእያ ራፅፋ ካዮ አፍላ ኤካዳ ዛላ ቦላ ባዉ ሂፃዳ፥ ካ ጫክያ ዎድያፐ ብድ አሀታ ቦላ እር ቡካና ጋካናዉ ጋላስ ካፎይ፥ ቃማ ዶእ ቦቾናዳ ናጋሱ።

11 ሳኦላ ላገያ፥ እዮሄላ ናእያ ራፅፋ ኦዳይሳ ዳዊቲ ስእስ። 12 ዳዊቲ ብድ፥ ሳኦላ መቀነ እያ ናኣ ዮናታና መቀ ጋላዳን ደእያ ያበሳ አሳፐ ኤክስ። ፍልስፄመት ሳኦላነ እያ ናይታ ግልቦአ ደርያ ቦላ ዎድ፥ ቤት-ሳና ጉታራፐ ያበሳ አሳይ ካይሶትድ ኤክዶሶና። 13 ዳዊቲ ሳኦላ መቀነ እያ ናኣ ዮናታና መቀ ሄ በሳፈ ኤህስ። ቃስ ካቀትዳ ላፑን አሳታ መቀካ ሺሽስ። 14 ሳኦላ መቀነ እያ ናኣ ዮናታና መቀ ብንያመ ቢታን ፀላ ካታማን እያ አዋ ቂሳ ዱፉዋን ሞግዶሶና። ካዎይ ኪትዳባ ኡባ ኤንቲ ፖልዶሶና። ሄሳፈ ጉየ፥ ኤንቲ ሄ ቢታ ግሾ ዎስዳ ዎሳ ፆሳይ ስእስ።

ፍልስፄመታራ ኦለትዳ ኦላ

15 ፍልስፄመታ ግዶንነ እስራኤለ አሳ ግዶን ዛሪድ ኦል ደንድን፥ ዳዊቲ ባ አሳራ ብስ። ፍልስፄመታራ ኦለትድ ዳዊቲ ዳቡርስ። 16 ራፋያ ያራፐ ይሽብብኖባ ጌተትያ አደይ ደኤስ። ናሰ ብራታፐ ኦሰትዳ እ ኦይክያ ቶራይ ሄ ክሎ ግራመነ ባጋ፤ እ ኦራ ማሽ ዳንጭድ፥ ዳዊታ ዎናዉ ቆፕድ ደኤስ። 17 ሽን ፃሩያ ናአይ አብስ ዳዊታ አሽስ፤ እ ፍልስፄመ አድያ ዎስ። ሄሳፈ ጉየ፥ ዳዊታ አሳይ፥ "እስራኤለ ፆምፐይ ቶኦናዳ ኔኒ ዛራዳ ኑራ ኦላ ባካ" ያግድ ጫቅዶሶና።

18 ጎባ ጌተትያ በሳን ፍልስፄመታራ ሀራ ኦል ደንድስ። ሄ ዎደ ኩሳታ አደይ ሳባክ፥ ራፋ ያራ ግድዳ ሳፋ ጌተትያ ኡራ ዎስ። 19 ቃስካ ሄ በሳን ፍልስፄመታራ ሀራ ኦል ደንድን፥ ቤተለመፐ ይዳ ያእራ ናኣ፥ ኤልሀናን፥ ቶራ ቶማይ ዋንዳራሸ መላ ግድዳ ጋተ አድያ ጎልያዳ ዎስ።

20 ቃስካ ጋተን ሀራ ኦል ደንድስ። ሄ በሳን እስ አዱሳ አደይ ደኤስ። ሄ አድያስ እስ እስ ኩሽያንነ እስ እስ ቶሁዋን ኡሱፑን፥ ዎል ቦላ ላታማነ ኦይዱ ብራት ደኦሶና። እካ ራፋያ ያራፐ ግድዳ አስ። 21 ሄ አደይ እስራኤለ ቡሻይዳ ዎደ ዳዊታ እሻ ሳማ ናአይ ዮናታን እያ ዎስ።

22 ሀ ኦይዳት ጋተን ደእያ ራፋያ ያራታ። ኤንታ ዳዊቲነ እያ አሳይ ዎዶሶና።