1 ሄሳ ግሾ፥ ታኒ፥ ጳዉሎስ፥ አይሁደ ግዶና ህንተ ግሾ ክርስቶስ የሱሳን ቃሾ አስ ግዳስ። 2 ታ ህንተና ማዳና መላ ፆሳይ ባ አ ኬሀተን ታዉ እምዳ ሀ ኦሱዋባ ህንተ ሎይ ስእደታ። 3 ታ ህንተዉ ካሰ ቃንን ፃፍዳይሳዳ ፆሳይ ባ ፁራ ቆንጨን ታዉ ቆንጭስስ። 4 ታ ፃፍዳይሳ ህንተ ናባብያ ዎደ ክርስቶሳ ፁራ ታ አይ መላ ኤርዳኮ ህንተ አኬካናዉ ዳንዳኤታ።✝ 5 ሀ ፁራይ ጌሻ ሀዋረታስነ ናበታስ ሀእ አያና ባጋራ ቆንጭዳይሳዳ በን ዎደ አሳስ ሄሳዳ ቆንጭስቤና። 6 ፁራይ ሀይሳ: አይሁደ ግዶና አሳይ ዎንገላ ባጋራ እስራኤለታራ እስፈ ፆሳ አንጁዋ ላቶሶና። እስራኤለታራ እስ ኬ አስ ግዶሶና፤ ክርስቶስ የሱሳ ባጋራ ፆሳ ኡፋይሳ ቃላ ኤኮሶና።

7 ፆሳይ ባ ኦያ ዎልቃ ባጋራ ታዉ እምዳ አ ኬሀተን ሀ ዎንገላስ ኦሳንቾ ግዳስ። 8 ታኒ ጌሻታ ኡባፈ ላፋ ግድኮካ አይሁደ ግዶና አሳስ ዛው ባይና ክርስቶሳ ዱረተ ዎንገላ ኦዳና መላ ሀ አ ኬሀተይ ታዉ እመትስ። 9 ቃስ ካሰ ዎድያን ኡባ መዳ ፆሳን ቆሰትድ ደእያ ፁራስ፥ ፆሳ ቆፋይ አይበኮ ቆንጭሳናዉ አ ኬሀተይ ታዉ እመትስ። 10 ፆሳይ ሄሳ ኦዳይ ሀእ ዎድያን ዎሳ ኬ ባጋራ ሳሎን ደእያ ሀላቃታስነ ሃረይሳታስ ባ ዱማ ዱማ ቆንጨ ኤርሳናሳ። 11 ፆሳይ ባ መርና ቆፋ ኑ ጎዳ ክርስቶስ የሱሳ ባጋራ ፖላናዉ ሄሳ ኦስ። 12 ኑ አማኖን ያሽ ባይና ፆሳኮ ሺቃና መላ ክርስቶስ ኑስ ምኖተነ ላአተ እሚስ።

13 ታኒ ህንተ ግሾ ዋየ ኤክያ ግሾ፥ ህንተ ታ ዋያን ዬላቶናዳ ህንተና ዎሳይስ፤ ታኒ ህንተ ቦንቹዋስ ዋየታይስ።

14 ታኒ አዋ ስንን ጉልባታዳ ዎሰይ ሄሳ ግሾሳ። 15 ሳሎንነ ሳአን ደእያ እስ እስ ሶ አሳይ እያን ሱንቴስ። 16 ፆሳይ ባ ቦንቾ ዱረተፈ ህንተ ጋርሳ አሳተ ምንያ ዎልቃ ባ አያና ባጋራ እማና መላ ህንተዉ ዎሳይስ። 17 ቃስ አማኖን ክርስቶስ ህንተ ዎዛናን ዳና መላነ ህንተ ሲቆን ፃጶ የድድ ምንድ ዳና መላ ዎሳይስ። 18 ሄሳዳካ፥ ክርስቶሳ ሲቆይ አይ መላ ዳልገኮ፥ አዱሰኮ፥ ቀኮነ ጪሞኮ ጌሻታ ኡባራ፥ ህንተ አኬካና ዎልቃ ደማና መላ ዎሳይስ። 19 ኤራተፈ አያ ክርስቶሳ ሲቁዋ ህንተ ኤራና መላ ቃስ ደኦ እምያ ፆሳ ዎልቃን ህንተ ኩማና መላ ታ ዎሳይስ።

20 ህዛ፥ ኑ ግዶን ኦያ ባ ዎልቃ ባጋራ ኑኒ ዎሰይሳፈ ዎይኮ ቆፐይሳፈ አድ ኦናዉ ዳንዳእያ ፆሳስ፥ 21 ዎሳ ኬንነ ክርስቶስ የሱሳን ዎደ ኡባን መርናፐ መርና ጋካናዉ ቦንቾይ ግዶ። አምንእ።