1 ሳናኦራ ካዎይ አምራፌል፥ ኤልሳረ ካዎይ አርዮክ፥ ኤላማ ካዎይ ኮሎዶጎሞርነ ጎይማ ካዎይ ትዳለይ ኦይዱ ካዎተት ዎላ፥ 2 እቻሹ ካዎተታራ፥ ሶዶመ ካዋ በራራ፥ ጋሞራ ካዋ በርሳራ፥ አዳማ ካዋ ሰንአበራ፥ ፅቦይማ ካዋ ሳምባራነ ዞኣራ ጌተትያ ቤላ ካዉዋራ ኦለታናዉ ደንድዶሶና። 3 ሀ እቻሹ ካዎተት እስፈ ሺቅድ ማፅነ አባ ጌተትያ ስድማ ዛንጋራን ባንታ ቶራ ሺሽዶሶና። 4 ሀ ካዎተት ታማነ ናምኡ ላይ ኮሎዶጎሞራስ ሃረትዶሶና ሽን ታማነ ሄን ላይን እያዉ ኪተቶና እፅዶሶና። 5 ታማነ ኦይዳን ላይን ኮሎዶጎሞርነ እያራ ቶቢዳ ካዎተት ባንታ ኦላንቾታ ኤክ ብድ ራፋይመታ አስታሮተን ደእያ ቃርናይማን፥ ዙዛይተታ ሃማን፥ ኤምመታ ሳወን ደእያ ቅራታይማን፤ 6 ቃስ ሆራ ቢታ አሳታካ ደረይ ዳርያ ሳይረ ቢታን ኦል ፆንድ፥ መላ ቢታ ማታን ደእያ ኤልፋራና ጌተትያ በሳ ጋካናዉ ጎድዶሶና። 7 ያፐ ስሚድ፥ ቃደሳ ጌተትያ አይን ምስፓታ ይዶሶና። አማለቃታ ቢታ ኡባነ ሀዛዞን ታማረን ደእያ አሞረታ ቢታ ኦል ፆንድ ኦይክዶሶና።

8 ሄሳፈ ጉየ፥ ሶዶመ ካዎይ፥ ጋሞራ ካዎይ፥ አዳማ ካዎይ፥ ዘቦይማ ካዎይ፥ ዞኣረ ጌተትያ ቤላ ካዎይ ደንድድ ስድማ ዛንጋራን ኦላስ ጊግዶሶና። 9 ሀ እቻሹ ካዎተት፥ ኤላማ ካዋራ፥ ጎይማ ካዋራ፥ ሳናኦራ ካዋራነ ኤልሳረ ካዋራ ሀ ኦይዱ ካዎተታራ ኦለትዶሶና። 10 ሄ ዎደ ስድማ ዛንጋራን ማደዳ ኦይክያባት ደእያ ኦላት ደኦሶና። ሶዶመ ካዎይነ ጋሞራ ካዎት ኦላፐ አታናዉ ባቃትሸ ሄ ኦላን ዉልዶሶና። ሽን ሀንኮ ሄ ካዎተት ዙማኮ ባቃትድ አትዶሶና። 11 ኦይዱ ካዎተት ሶዶመንነ ጋሞራን ደእያባ ኡባ ሀር አቶሽን፥ ኤንታ ካካ ቦንቅድ ኤፍዶሶና። 12 አብራመ እሻ ናአይ ሎፀይ ሶዶመን ደእያ አስ ግድያ ግሾ እካ ባዉ ደእያባ ኡባራ ድኤትስ።

13 ሄሳፈ ጉየ፥ ድኤት ብዳ አሳፐ ከስ ኤክዳ እስ አስ ይድ ሀንዳባ ኡባ እብራወ አድያ አብራሃመስ ኦድስ። ሄ ዎደ አብራመይ አሞረ አድያ ማምረ ግታ ምታ ማታን ደኤስ። ማምረይነ እያ እሻት አስኮልነ አኔር ኦላ ዛራናዉ አብራመራ ጫቅድ ኡትዶሶና። 14 አብራመይ ባ እሻ ናአይ ድኤትዳይሳ ስእዳ ዎደ ባ ሶን የለት ድጭድ ሎህዳ 318 ቶራንቾታ ኤክድ ኤንታ ገዶ ካልድ ዳነ ካታማ ጋካናዉ ብስ። 15 እ ባራ ኤክ ብዳ ቶራንቾታ ቃማ ጩጋን ጩጋን ሻክድ ሞርከታ ኦልድ ፆንስ። ዳማስቆፈ ፑደሀ ባጋራ ደእያ ሆበ ጌተትያ በሲ ጋካናዉ ጎድስ። 16 ያትድ ደኤትዳባ ኡባ፥ ባ እሻ ናአ ሎፀነ እያዉ ደእያባ ኡባ፥ ማጫሳነ ሀራ አሳታ ዎስስ ኤክስ።

17 አብራመይ ኮሎዶጎሞርነ እያራ ቶቢዳ ካዎታ ፆንድ ስምያ ዎደ ሶዶመ ካዎይ፥ ካዎታ ዛንጋራ ጌተትያ ሳወ ዛንጋራን እያ ሞካናዉ ከይስ።

18 ኡባፈ ቃ ፆሳ ካህነይ፥ ሳሌማ ካዎይ ማልከፃደቅ ኡይነ ዎይነ ኤክድ ይስ። 19 እ ሀይሳዳ አብራመ አንጅስ፤

"ሳሎነ ሳአ መዳ፥

ኡባፈ ቃ ፆሳይ ነና አንጆ።

20 ነ ሞርከታ ነ ኩሸን አድ እምዳ፥

ኡባፈ ቃ ፆሳይ ጋላተቶ" ያግድ አንጅስ።

አብራመይ ባ ደምዳባ ኡባፈ አስራታ ከስድ ማልከፃደቃስ እሚስ።

21 ሶዶመ ካዎይ አብራመኮ፥ "ሻሉዋ ነ ኤካዳ፥ አሳ ታዉ እማ" ያግስ።

22 ሽን አብራመይ ሶዶመ ካዋኮ፥ "ታኒ ጎዳስ፥ ሳሉዋነ ሳአ መዳ ኡባፈ ቃ ፆሳስ ታ ኩሽያ ደንስ። 23 ኔኒ፥ ‘አብራመ ዱረ ኦዳይ ታና ጎናዳ’ ሀር አቶሽን ክረ ዎይኮ ጫማ ዎዶሮካ ኤክከ። 24 ታ አሳት ምዳይሳፈ አትሽን ታ አይብባካ ኤክከ። ቃስ ታራ ብዳ አኔር፥ አስኮልነ ማምረይ ባንታና ጋክያባ ኤኮ" ያግስ።