ቃፃሮይ ቃላ ጫቁዋስ ማላ
1 አብራመስ ላይ ኡዱፉን ታማነ ኡዱፉና ግድያ ዎደ፥ ጎዳይ እያዉ ቆንጭድ፥ "ታኒ ኡባ ዳንዳእያ ፆሳ፥ ታዉ ኪተታ፥ ታ ስንን ፖሎ ግዳ። 2 ታ ግዶንነ ነ ግዶን ደእያ ጫቁዋ ታ ምንና፤ ታኒ ነ ዘረ ታይባናዉ ዳንዳኤቶናዳ ኦና" ያግስ። 3 አብራመይ ባ ሶምኡዋራ ሳአን ዱገ ጉፋንን ፆሳይ እያኮ፥ 4 "ሄኮ ታ ነዉ ጫቅያ ጫቆይ ሀይሳ፤ ነ ዳሮ ካዎተታስ አዋ ግዳና። 5 ታ ነና ዳሮ ካዎተታስ አዋ ኦና ግሾ ህዛፐ ነ ሱንይ አብራመ17:5 አብራመ፦ እብራወ ዶናን አብራመ ጉሳይ ቦንቸትዳ አዋ ጉሱ። ግድ ፄገተና፥ ሽን ነ ሱንይ አብራሃመ17:5 አብራሃመ፦ እብራወ ዶናን አብራሃመ ጉሳይ ዳሮ ደርያስ ዎይኮ ካዎተታስ አዋ ጉሱ። ግድ ፄገታና። 6 ታኒ ነ የለተ ዳርሳና፥ ታ ነና ዳሮ ደረ ከሳና፥ ካዎት ኔፐ ከያና። 7 ታኒ ነዉነ ኔፐ ጉየን ነ ሼሻስ ፆሰ ግዳና መላ መርና ጫቁዋ ታ ግዶንነ ነ ግዶን፥ ኔፐ ጉየራ ያ ነ ሼሻ ግዱዋን፥ የለተፈ የለተ ጋካናስ ታ ጫቃስ። 8 ኔኒ ሀእ በተ ግዳዳ ደእያ ካናነ ቢታ ኡባ ነዉነ ኔፐ ጉየራ ያ ነ ሼሻስ መርና ላታ ግዳና መላ ነዉ እማና፤ ቃስ ታኒ ኤንታ ፆሳ ግዳና" ያግስ።
9 ቃስካ ፆሳይ አብራሃመ፥ "ነና ግድኮ ታ ጫቁዋ ናጋ፤ ነካ ኔፐ ጉየራ ያ ነ ሼሻት፥ የለተፈ የለተ ጋካናዉ ናግተ። 10 ታ ግዱዋንነ ነ ግዱዋን፥ ኔፐ ጉየራ ያ ነ ሼሻ ግዶን ህንተ ናጋና ጫቆይ ሀይሳ፤ ህንተ ግዱዋን ደእያ አደ ኡባይ ቃፃረቶ። 11 ህንተ አደተ ኮሁዋ ዶካልተ፤ ሄስ ታ ግዶንነ ህንተ ግዶን ደእያ ጫቁዋስ ማላ ግዳና። 12 ህዛፐ ያና የለተን አደ ናይት ኡባይ የለትዳ ሆስፑን ጋላሳን ቃፃረቶ። ነ ሶን የለትዳይሳታ ግድን፥ ዎይኮ አላጋፐ ሚሸን ሻመትዳ አይለታ ግድን፥ ነ ዘረፈ ግዶናይሳታ ዶካላ። 13 ነ ሶን የለትዳይሳታ ግድን ዎይኮ ሚሸን ሻመትዳይሳት ቃፃረታናዉ በሴስ። ሀይሳን ህንተ አሹዋን ደእያ ታ ጫቆይ መርና ጫቆ ግዳና። 14 ኦንካ ቃፃረቶና ደእያ አደ አስ ኡባይ ታ ጫቁዋ መንዳ ግሾ ባ አሳፐ ዱፆ" ያግስ።
15 ፆሳይ አብራሃመኮ፥ "ህዛፐ ነ ማቸ ሱንይ ሶራ ግድ ፄገቶፎ፤ ሀችፈ ዶምድ እ ሱንይ ሳራ ጌተቶ። 16 ታኒ እዮ አንጃና፤ ታኒ ኢፐ ነዉ አደ ናአ እማና። ታኒ እዮ አንጃና ግሾ እያ ካዎተታስ አዮ ግዳና፤ ደርያ ካዎት ኢፐ ከያና" ያግስ።
17 አብራሃመይ ባ ሶምኡዋራ ሳአን ጉፋንድ፥ "ሀይ አሳዉ፥ ፄቱ ላይ አስ ናአ የላኔ? ኡዱፉን ታሙ ላይ ግድዳ ሳርካ ናአ የላኔ?" ያግድ ባ ዎዛናን ሚጭስ። 18 አብራሃመይ ፆሳኮ፥ "እስማኤል ታና ላታና መላ ነ እያ አንጃርክ" ያግስ።
19 ሽን ፆሳይ፥ "አካይ፥ ነ ማችያ ሳራ ነዉ አደ ናአ የላና፥ ኔኒ እያ ይሳቃ17:19 ይሳቃ፦ ሀ ሱን ብርሸይ "እ ሚጬስ" ጉሱ ጋዳ ሱንና። ታኒ እያፐ ጉየራ ያ እያ ዘረስ መርና ጫቆ ግዳና መላ እያራ ታ ጫቁዋ ጫቃና። 20 እስማኤላባ ነ ታና ኦይችዳ ኦይሻ ስአስ። ታኒ እያካ አንጃና። ታ እያ አይፍሳና፥ እያ የለተ ሎይ ዳርሳና። እ ታማነ ናምኡ ሃረይሳታስ አዋ ግዳና። ታኒ እያ ግታ ካዎተ ከሳና። 21 ሽን ታ ጫቁዋ ዎንቶ ላይ ሀኖደ ሳራ ነዉ የልያ ናአ ይሳቃራ ጫቃና" ያግስ። 22 ፆሳይ አብራሃመራ ኦደትድ ኦንግዳፐ ጉየ እያፐ ሻከትድ ፑደ ብስ።
23 ሄ ጋላስ አብራሃመይ ባ ናአ እስማኤላ፥ ባ ሶን የለትዳይሳታነ ባ ሚሸን ሻምዳይሳታ፥ ባ ሶን ደእያ አደ አሳ ኡባ ፆሳይ እያ ኪትዳይሳዳ ቃፃርስ 24 አብራሃመይ ቃፃረትያ ዎደ እያዉ ላይ ኡዱፉን ታማነ ኡዱፉና። 25 እያ ናአይ እስማኤል ቃፃረትያ ዎደ ታማነ ሄ ላይ ናአ። 26 አብራሃመይነ እያ ናአ እስማኤል ናምአትካ ሄ ጋላስ ቃፃረትዶሶና። 27 አብራሃመ ሶን ደእያ አደ ኡባይ፥ እያ ሶን የለትዳይሳትነ ሚሸን ሻመትዳይሳት ኡባይ እያራ ቃፃረትዶሶና።